Yumi Mas Gat Gudhan
1 Aposol Pol i gat tingting se ol Kristin oli mas gat gudhan long minista wok blong olgeta. Hem i raetem ol tok ya se: “Yu mas traehad long evri rod blong kam we yu wan man blong God we God i stap harem gud long yu. Long fes blong hem, yu mas kam we yu no gat sem long ol wok blong yu, we yu wan man we yu stap tijim ol man long trutok blong God, long stret fasin nomo.”—2 Tim. 2:15.
2 Fasin blong gat gudhan long minista wok blong yumi i no wan samting we yumi kasem taem yumi bon. Hemia wan samting we yumi mas traehad blong kasem. Yumi mas “traehad long evri rod”—hemia i min se sipos yumi wantem kam wan minista we i gat gudhan, yumi mas hadwok from. ?Be wanem samting i save givhan long yumi blong kasem mak ya?
3 Yumi Lanem Tok Blong God: Taem yumi mekem minista wok blong yumi, ol samting we yumi lanem long Baebol oli givhan bigwan long yumi. Sipos yumi save gud long ol tijing blong Baebol, bambae i isi moa long yumi blong “tijim ol man long trutok blong God.” Taswe, i impoten tumas we yumi tekem taem blong stadi wanwan.—1 Tim. 4:15, 16.
4 Sipos yumi wantem save moa samting long saed blong Baebol, “yumi mas strong blong holem trutok ya we yumi harem finis, blong bambae yumi no lusum rod blong yumi.” Blong mekem olsem, yumi mas holemtaet ol samting we yumi lanem long taem blong ol miting. (Hib. 2:1) Ol Pablik Tok oli soemaot plante gudfala poen we yumi save yusum long minista wok blong yumi. No maet sam poen olsem oli save kamaot bakegen long taem blong buk stadi. Tiokratik Skul i givhan long yumi blong kam sam tija we oli gat guhdan. Long Miting Blong Halpem Yumi Blong Mekem Disaepol, yumi save kasem sam nambawan advaes mo yumi save luk sam pleplei we oli givhan long yumi blong kam sam minista we oli naf gud. Be sipos yumi wantem lanem wan samting long ol miting ya, i klia nomo se yumi mas mekem rere ol defren haf blong ol miting. Taem i gat wan miting, yumi mas lesin gud mo yumi mas givim ansa.
5 Yumi Folem Ol Advaes: Pol i talem long ol Kristin blong kongregesen blong Filipae se oli mas mekem ol samting we oli lanem from ol fasin mo ol tok blong hem. (Fil. 4:9) Yumi tu, yumi mas mekem ol samting we yumi lanem from ogenaesesen blong Jeova. Long ol pej 17 mo 18 blong Wajtaoa blong Ogis 1, 1989, Sosaete i talem long yumi olsem wanem blong mekem ples we yumi prij long hem i kam ‘nyu’ bakegen. Wajtaoa ya i talem wan taem moa long yumi se yumi mas mekem sam fas tok we oli nyuwan, sam fas tok we oli pulum tingting blong man. Ol tok blong yumi oli mas pusum man blong mekem wan samting. Be wan narafala advaes we i stap long haf ya i olsem: Bifo we yumi lego haos blong wan man, man ya i mas filim we bambae yumi save visitim hem bakegen. Haf ya i soemaot klia se yumi mas faenemaot olgeta we oli rili intres long trutok mo yumi mas traem toktok wetem ol defren famle we oli stap laef wan ples nomo. Sipos yumi folem ol advaes ya, mo yumi mekem ol samting we yumi lanem, ale yumi gat gudhan long minista wok blong yumi.
6 ?Yu yu yusum oltaem Reasoning buk taem yu prij? Buk ya i gat fulap haf we i save givhan long yumi. Sipos yumi yusum gud ol fas tok mo olgeta rod we buk ya i talemaot blong winim tok we ol man i sakem long yumi, bambae yumi naf blong givim wetnes long ol man long wan fasin we i gud moa. Be moa yet, sipos yumi rere oltaem long stampa tok blong prij mo yumi strong blong faenemaot sam wei blong seremaot ol buk, bambae yumi karem plante frut long minista wok blong yumi.
7 ?Olsem wanem long yu? ?Yu yu wantem kam gud moa long minista wok blong yu? Sipos yu yu wantem kasem help olsem, yu save go luk elda we i lukaot long wok blong prij long kongregesen no yu save go luk brata we i lukaot long buk-stadi blong yu. Yumi evriwan i save gat gudhan long minista wok blong yumi. Yes, yumi olgeta i naf blong “tijim ol man long trutok blong God.” I no longtaem, Jeova God bambae i smasem rabis wol ya. Go kasem taem ya, yumi wanwan i glad nomo blong givhan long ol man blong mekem se plante moa oli sef. Taem yumi stap mekem olsem, yumi ona long Jeova God.—Jon 15:8.