Yumi Gohed Nomo Blong Karem Moa Frut
1 30 yia afta we Jisas i ded mo i girap bakegen long ded, aposol Pol i raetem wan leta long kongregesen blong Kolosi. Hem i talem we trutok blong gud nyus blong Kraes i karem frut mo i goaot moa yet long olgeta ples long wol. (Kol. 1:5, 6) Tede, ol Wetnes blong Jeova oli mekem sem samting nomo long wan fasin we i bigwan moa. Olsem Baebol i talem, oli talemaot gud nyus blong Kingdom “gogo i finisim olgeta ples long wol.” (Ol Wok 1:8; Jon 14:12) Long tiokratik yia 1989, namba blong ol pablisa blong Kingdom i go antap long 5,6 %, mo yumi kasem wan nyufala namba bakegen. I gat 3,787,188 pablisa long 212 kantri.
2 Long ol kantri we wok blong talemaot gud nyus blong Kingdom i tabu, Sosaete i no kasem evri ripot. Be ol ripot we Sosaete i kasem oli soemaot we namba blong ol pablisa i gru long 7,6 %. Nating we plante trabol oli stap long ol kantri ya, ol pablisa ‘oli wok strong blong kasem gud frut oltaem.’ (Luk 8:15) Long samfala ples, ol trabol olsem oli finis, be long sam narafala ples oli stap sem mak nomo.
3 Long ol kantri we wok blong talemaot gud nyus i fri nomo, yumi mitim sam trabol we i narafala. Plante man oli no kea long trutok, samting ya i tru moa long ol ples we laef i isi mo ol man oli no hadwok tumas blong kasem ol samting long saed blong bodi. Ol man blong Jeova oli mas lukaotgud blong no folem sem tingting olsem. Yumi no wantem ronem ol samting long saed blong bodi olsem ol pleplei, mo ol narafala samting bakegen, from we ol samting ya oli save tekem taem we yumi spenem blong mekem ol tiokratik wok. Sipos yumi foldaon long trap olsem, bambae yumi no kea mo bambae yumi no moa wok strong blong karem gud frut.—Luk 21:34-36.
YUMI MAS STANAP STRONG MO YUMI MAS TRAEHAD OLTAEM
4 Nating we yumi gat trabol no no gat, yumi mas stanap strong oltaem. Sam kantri oli trabol longtaem finis. Be ol brata blong yumi oli traehad blong prij. Nating we oli kasem trabol, be oli stanap strong. Taswe God i glad long olgeta mo naoia oli stap kasem ol gudfala frut. (Rom 5:3-5; Gal. 6:9) Nomata wanem trabol i kasem yumi, yumi evriwan i wantem gohed nomo blong stanap strong. Yumi mas talemaot gud nyus blong Kingdom mo yumi mas pruvum oltaem we yumi fasgud long God. Fasin blong yumi blong stanap strong i sevem sol blong yumi, yes, hem i givim laef long yumi.—Mak 13:10; Luk 21:19.
5 Sipos yumi wok strong long wok we Jeova i givim long yumi mo sipos yumi no les blong go prij, yumi stap soemaot we yumi tinghae long ol samting blong speret. Long sam kantri, i no gat transpot i go naraples, no maet i hadwok blong faenem ol samting we man i nidim long laef, mo ol trabol long saed blong ekonomi oli kam antap oltaem. Be nating, wok blong talemaot gud nyus i ron gud nomo. Long sam kantri ya, evri manis ol pablisa oli mekem bitwin 14 mo 17 haoa long wok blong prij, mo namba blong ol paenia i go antap oltaem. Taswe, sipos laef blong yumi hem i isi nomo from yumi gat plante flas samting long saed blong bodi, yumi save tingbaot eksampel blong ol brata blong yumi. ?Olsem wanem long yu? ?Yu yu gat rod blong joen moa long wok blong talemaot Kingdom mo long wok blong mekem disaepol?
?YUMI SAVE MEKEM MOA WOK?
6 Maet bambae yumi mas mekem narafala plan blong yusum taem we yumi gat blong mekem moa long wok blong prij. ?Sipos evri sandei yumi spenem wan haoa long wok blong prij, maet yumi save spenem wan moa haoa blong mekem ol visit no maet yumi save mekem wan Baebol-stadi? ?Sipos yumi mekem oltaem Baebol-stadi nomo, ating yumi save prij wan haoa long evri haos wanwan? ?Sipos no, yumi save mekem sam visit bifo we yumi go mekem stadi blong yumi? Long sarede, taem yumi seremaot ol magasin long 2 haoa finis, maet yumi save karem sam magasin oli go long wan we i tekem oltaem ol magasin no maet yumi save traem mekem sam visit. Sipos kongregesen i jusum olgeta blong mekem olsem, olgeta we oli laef long taon oli save tekem evri jans blong talemaot trutok long ol rod. Sipos yumi folem ol advaes ya mo plante bakegen, bambae yumi spenem moa taem long wok blong prij. Sipos yumi hadwok, bambae yumi save kasem gud frut.
7 Sipos yumi gobak blong mekem ol visit blong yumi, bambae yumi gat plante moa Baebol-stadi. Samting ya i min we fulap man bakegen bambae oli save long trutok mo bambae oli givhan long yumi blong mekem wok blong talemaot gud nyus blong Kingdom.—Mat.28:19, 20.
YUMI MAS PREA OLTAEM
8 Sipos yumi wantem gohed blong karem frut, yumi mas askem long Jeova blong hem i blesem wok blong yumi, mo yumi mas folem ol samting we tabu speret blong hem i soemaot long yumi. Taem we yumi prea long hem, yumi save tokbaot wok blong yumi. Samting ya i givhan long yumi blong no fogetem we yumi stap joen wetem God blong mekem wok ya blong hem. (1 Korin 3:9) Wetem help blong Jeova, bambae yumi save stanap strong long wok blong prij, nating we yumi no kasem gudfala frut kwiktaem. Long sam eria, ol pablisa oli bin wok strong long plante yia, nao biaen nomo, namba blong ol pablisa i go antap. Taem yumi stap tingbaot fyuja, yumi mas askem long God blong hem i givhan long yumi mo i lidim yumi oltaem, ale yumi no kam slak be yumi fulumapgud wok ya blong yumi. (2 Tim. 4:5) Wok blong talemaot Kingdom mo wok blong mekem disaepol, tufala i karem plante frut oltaem.
9 Jisas i soemaot long yumi we yumi mas prea oltaem. (Luk 18:1) Pol i raetem ol tok ya, se: “Oltaem yufala i mas stap prea.” (1 Tes. 5:17) Tede, yumi gat plante gudfala risen blong prea oltaem long Jeova: Evri yia, plante moa man oli kam joen wetem ol man blong God, ale yumi mas wok strong blong lukaot gud long olgeta. Yumi wantem givhan long ol narafala blong olgeta tu oli stanap strong mo oli karem frut oltaem. Yumi mas tinghae long ol nid blong evri pablisa wanwan mo i sem mak nomo long saed blong ogenaesesen blong Jeova. Yumi evriwan i luksave we i impoten tumas we yumi givim presen mane i go long Jeova blong mekem se wok blong talemaot gud nyus mo wok blong prentem ol buk i gohed oltaem. Taswe bambae yumi prea long Jeova blong hem i halpem oltaem ol man we oli fraetgud long hem, ale oli rere nomo blong givim.—2 Korin 9:8-11.
10 Plante ples long wol oli fri nomo blong yumi prij long hem naoia, taswe tiokratik wok blong yumi i kam bigwan moa mo tok ya blong Baebol long Kolosi 4:2 i kamtru, se: “Yufala i mas mekem we tingting blong yufala blong prea, i longfala. Ae blong yufala i mas no hevi, mo oltaem yufala i mas stap talem tangkyu long God.” From samting ya nao, yumi mas prea oltaem from olgeta brata blong yumi blong oli gohed oltaem blong karem plante frut mo blong oli givhan long ol “sipsip” we oli stap long ol ples we bifo i hadwok blong prij long hem.
YUMI TALEM TANGKYU
11 Yumi glad tumas long ol nambawan blesing long saed blong speret we yumi stap kasem tede mo yumi gat bigfala tangkyu long God from. Bambae yumi talem tangkyu long hem mo long prea, bambae yumi askem long hem blong blesem wok we ‘slef we i stret mo waes’ wetem Hed-kampani blong hem oli stap mekem. Olgeta oli gat tingting daon mo oli stanap strong blong givhan long yumi mo ol “sipsip” long ful wol. Samting ya i mekem we yumi glad tumas long ol hadwok we oli stap mekem.
12 Olgeta we oli stap sakem ol sid blong Kingdom oli seremaot plante plante buk. (Mat. 13:3-8, 18-23) Nating we olgeta ya oli mekem bigfala wok finis, plante moa man oli stap askem ol Baebol mo ol buk we yumi stap yusum blong stadi long Baebol. Ripot blong prij blong ol Wetnes long evri ples long wol i soemaot gud we wan bigfala wok blong planem mo wasem olgeta sid blong Kingdom i stap gohed. Wok ya i stanap long ol visit mo ol Baebol-stadi blong ol pablisa. Yumi evriwan i traehad blong kam gud moa long ol impoten haf blong wok blong yumi. Be long semtaem, yumi stap talem tangkyu from we Jeova i stap gohed nomo blong blesem wok, ale wok i gru. Yes, yumi stap prea long hem blong hem i blesem yumi olsem.—1 Korin 3:6, 7.
SAM NARAFALA NID
13 Ol Kristin oli stap laef long wol be oli no joen wetem wol ya, taswe oltaem nomo bambae oli stap kasem moa traem. Bisnes ya bambae i moa nogud from we yumi stap long ol las dei blong wol ya. Samfala man oli laef long ples we ol man oli agensem olgeta no oli stap kasem narafala trabol bakegen. Sam narafala oli mas mekem ol Kristin wok blong olgeta long sam kantri we faet i gohed long hem. Sam brata blong yumi oli lusum evri samting blong olgeta from we graon i seksek, hariken i kam, no bigfala win i kasem ples blong ol. Taem samting olsem i kamaot, yumi mas prea from ol brata blong yumi we oli stap long ol ples we trabol i kasem. (Ridim Ol Wok 12:5; 2 Korin 1:11) Maet samtaem i gat nid blong luk olgeta haeman no blong raetem leta long olgeta blong tokbaot wok blong yumi we oli putum tabu long hem, no blong tokbaot ol trabol we oli mekem long ol brata blong yumi no sam narafala bisnes bakegen we oli laenap wetem ol wok blong Kingdom. Taem i olsem, bambae yumi traehad oltaem blong mekem wan samting, mo bambae yumi askem long Jeova blong hem i mekem we olgeta man ya oli mekem i gud long ol fren blong yumi.—1 Tim. 2:1, 2.
14 Ol famle oli stap kasem plante traem from nogud wol ya we Setan i bos long hem. (2 Korin 4:4) Olgeta we oli mared, samtaem oli mitim sam bigfala trabol. Yumi mas halpem olgeta blong oli prea long God blong hem i halpem olgeta, mo yumi tu yumi mas prea from ol. (1 Korin 7:5; 1 Pita 3:7) Olgeta we oli stap long hed blong famle oli mas luksave se Jeova i rere oltaem blong lesin mo ansa long ol prea blong ol. Samting ya i tru tumas taem oli wantem we hem i givhan long olgeta blong oli lidimgud haos blong ol. (Jaj. 13:8; Fil. 4:6, 7) Ol yangfala mo ol pikinini oli kasem plante traem tu, maet long skul, long ples blong wok, taem we oli mekem trep no maet long sam narafala taem bakegen. Prea i givhan long yumi blong yumi blokem ol rabis fasin blong wol we oli nogud. Mo tu, sipos yumi gohed blong mekem samting we Jeova i glad long hem, prea i save halpem yumi blong karem gud frut.—Mat. 6:13; Efes. 6:13-18; 1 Jon 3:22.
15 Jeova i stap ansa long ol prea blong yumi. (Ol Sam 65:2) Yumi mas putum ol trabol blong yumi long han blong hem. (Ol Sam 55:22) Prea i givhan long yumi blong yumi tinghae long olgeta wok blong Kingdom mo ol brata blong yumi raonabaot long wol. Maet yumi stap tingtinggud long gudfala wok we ol elda oli mekem long kongregesen, no wok we ol brata oli mekem blong lukaot gud long ol man blong Jeova we oli kam plante oltaem. Ating yumi stap givhan long olgeta we oli sik long saed blong speret no maet yumi fiksimap sam narafala trabol we oli smol no ating samfala oli bigwan. Be taem yumi mekem olgeta samting olsem, yumi no mas foget long wan samting: Oltaem yumi mas prea long Jeova mo yumi mas tokbaot ol bisnes ya long hem. (1 Tes. 5:25; Jem. 5:14-16) Yes, yumi mas putum ol trabol blong yumi long han blong Jeova. Yumi save se nomata wanem samting we yumi askem long hem—sipos samting ya i stret long tingting blong hem—bambae hem i ansa long prea blong yumi. (1 Pita 5:7; 1 Jon 5:14) Yumi mas wok strong long wok blong Kingdom mo yumi mas lukaot Jeova oltaem blong hem i givhan long yumi blong yumi gohed mo yumi stanap strong blong karem frut oltaem.