Yufala i No Kam Slak
1 Ripot blong yia i soemaot se long evri ples long wol ol man blong Jeova oli stap kam plante moa. Long ol kantri wanwan, Sosaete i rejistarem sam nyufala namba bakegen.
2 ?Be olsem wanem long teritori blong yufala? ?Yufala i kam slak from we ol man oli no kea long yufala? ?Ol man oli no harem gud long mesej blong Kingdom we yufala i talemaot long olgeta? ?I gat plante man oli no stap long haos? ?Smol man nomo oli intres? Sipos i olsem, maet advaes we Pol i givim long Galesia 6:9 i save leftemap tingting blong yufala bakegen. Pol i talem se: “Bambae yumi no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi.” Tru tumas, fasin blong mekem ol gudfala fasin i min tu se talemaot gud nyus blong Kingdom long olgeta haos wanwan. Yumi mas gohed blong prij, nating se ol man oli lesin no oli no lesin, mo yumi mas mekem olsem go kasem we Jeova i talem se wok ya i finis. (Aes. 6:8) Yes, long ol teritori we i hadwok blong prij long olgeta tu, yumi save faenem sam “sipsip.”
3 ?Yumi save mekem wanem blong no kam slak long minista wok? Maet yumi save jenisim fas tok blong yumi. Reasoning buk i givim sam nambawan advaes we yumi save folem. ?Yu yu traem olgeta finis? Maet bambae yumi pulum tingting blong plante moa man sipos yumi sot nomo long ol toktok blong yumi, be yumi tok stret long ol man. Yumi mas talem long ol man se yumi stap long doa blong olgeta from we yumi intres long olgeta mo yumi wantem se olgeta tu oli harem gud.
SEREMAOT TRUTOK BUK
4 Long manis Janewari, yumi save soemaot se yumi intres long narafala man taem we yumi seremaot Trutok buk. Taem yumi talemaot gud nyus long wok blong prij, yumi wanwan i sapotem Kingdom blong God mo yumi wantem we ol man oli putum bilif blong olgeta long hem. Ol man oli stap tokbaot Kingdom ya plante taem long ol prea blong olgeta, be oli no save hem. Taswe Trutok buk i wan gudfala tul blong givhan long olgeta.
5 Ol japta blong buk ya oli tokbaot sam gudfala poen we yumi save yusum blong toktok wetem ol man. Taem we yufala i seremaot buk ya, yufala i save yusum japta 1 mo 12, mo makemgud ol poen we ol man blong teritori blong yufala maet i intres long hem. Makem se japta 1 i eksplen long plan blong God long saed blong wol. I gat sam narafala gudfala poen long japta 12, we oli stret gud long stampa tok blong prij blong manis.
6 I klia nomo se tingting blong yumi i strong moa mo yumi gat moa paoa sipos yumi prij evri wik. Mo tu, bambae yumi stanap strong long saed blong speret sipos oltaem, yumi stadi long Tok blong God mo yumi joen long ol miting blong kongregesen.—Hib. 10:23-25.
LEFTEMAP TINGTING BLONG OL NARAFALA BLONG OLI STAP STRONG
7 Yu yu save givhan long yu wan mo leftemap tingting blong ol narafala taem we yu prij wetem olgeta. (Gal. 6:10) Yu save askem blong go prij wetem ol paenia mo ol elda. Long sem fasin, yu save leftemap tingting blong olgeta we oli no prij oltaem no maet oli no moa prij. Bambae oli luk we yu yu rili intres long laef blong olgeta long saed blong speret.
8 Yumi evriwan i gat nid blong stanap strong long wok blong Jeova, yumi no mas kam slak long ol las dei ya we oli strong. From we yumi stanap strong, bambae yumi gohed nomo blong mekem ol gudfala wok blong Jeova, nating se i gat trabol no ol man oli no kea long yumi. (Hib. 10:36-39) Yumi mas prea long Jeova blong hem i givim paoa long yumi. (Aes. 40:29-31) Yumi save askem long hem blong hem i halpem yumi blong yumi stanap strong, mo blong yumi gat positiv tingting oltaem. Yumi no mas foget se yumi stap mekem wok blong God. Hem i stap luk wanem samting yumi stap mekem long wok blong hem, mo hem i no save fogetem yumi. (Hib. 6:10) !Taswe bambae yumi no kam slak! Be narakaen olgeta, bambae yumi “wok strong long ol wok blong Masta blong yumi,” mo yumi trastem Jeova blong hem i mekem yumi kam strong oltaem long ‘nambawan wok ya.’—1 Korin 15:58; Gal. 6:9.