Talemaot Gud Nyus—Karem Moa Frut From Fasin Blong Lesin Gud
1 Blong mekem minista wok blong yumi i karem moa frut, yumi mas luksave se i no gat tu man long wol we tufala i sem mak. Olgeta man wanwan oli gat defren ekspiryens long laef, mo oli wari long defren samting mo oli wantem defren samting. Bigfala samting se yumi mas traehad blong talemaot Kingdom mesej long fasin we i stret long ol man wanwan. Hemia i min se yumi mas soemaot long olgeta man wanwan olsem wanem mesej ya i save gat paoa long laef blong hem wan. Blong karem frut long rod ya, yumi mas lesin gud long ol man.
2 Plante pablisa oli yusum ol gudfala kwestin long ol fastok blong olgeta. Samting ya i pulum man blong haos blong joen long storeyan. Ol kwestin we oli pulum man blong talemaot tingting blong hem, be oli no mekem hem i sem, oli gud moa. Taem man blong haos i toktok, i impoten tumas we yumi lesin gud long olgeta samting we hem i stap talem. Fasin blong lesin gud i soemaot se yumi laekem mo respektem ol man. Sipos yumi mekem olsemia, yumi kasem save long tingting blong man ya. Sipos yumi save long sam samting we i kamaot long laef blong man ya, yumi save gat sore long hem mo putum yumi long ples blong hem. Ale, biaen yumi save leftemap tingting blong hem from hop we Baebol i givim.
RERE BLONG JENIS
3 Aposol Pol i talem se: “Stadi blong faenemaot beswan rod blong storeyan wetem olgeta man wanwan.” (Kol. 4:6, New English Bible) Nating we yumi no save fastaem wanem we man bambae i talem long yumi, be yumi save finis plante trabol we ol man oli stap kasem tede. Taswe yumi save “stadi” mo mekem tingting blong yumi i rere gud blong ansa long ol toktok we man i talem.
4 Wan eksampel: Maet yumi mekemrere finis wan stampa tok long saed blong pis long wol. Be man ya blong haos i talem se hem i jes lusum wok blong hem. ?I stret blong mekem olsem we yu no harem samting we hem i talem? I klia se wok ya blong kasem ol samting we famle blong hem i nidim i wan hevi samting long tingting mo hat blong hem. ?Yu save mekem wanem blong soemaot se yu luksave ol nid blong hem? Yu save putum yu wan i stap long ples blong hem mo soemaot sore long hem from samting ya we i hapen. Afta, long kaen gud fasin, yu save soemaot long hem long Baebol olsem wanem gavman blong God bambae i givim gudfala wok mo ol narafala samting we yumi nidim tu.—Aes. 65:17, 21, 22, 24.
5 Sipos yumi lesin gud long man blong haos, maet yumi faenemaot se sam man blong brekem loa oli mekem i no stret long hem no famle blong hem. Sipos yumi soemaot sore long man ya mo yumi intres long hem wan samting ya i save mekem hat blong hem i rere blong harem trutok. Nao yumi save soemaot long hem se Jeova God i save ol trabol soa blong yumi, mo i no longtaem bambae hem i mekem wan samting blong tekemaot ol rabis fasin long wol.—Lukluk Reasoning From the Scriptures, pej 10, 12, 229-31. (pej 11, 13, 338-340 long Franis.)
6 Tu man i save kam badfren from we oli no storeyan gud tugeta. Taem wan long tufala i toktok, maet narawan i no rili lesin gud wetem tingting mo hat blong hem. Sipos i olsem, hem i save kasem rong save no mestem sam jans blong givhan long narafala. Sipos yumi wokem fasin ya blong lesin gud wetem respek, yumi save kasem moa frut long wok blong talemaot gud nyus, yumi save soemaot intres long ol narafala olsem Jeova i stap mekem, mo yumi save halpem narafala blong fren gud wetem God mo ol man blong hem.—Jem. 1:19; g74 11/22 pp. 21-3. (g75 8/3 pp. 21-23 long Franis).