Responsabiliti Blong Yumi Blong Mekem i Gud Long Ol Narafala

¹ Aposol Pol i talem long ol Kristin long faswan handred yia se: “Mo yufala i mas stap mekem ol gudfala fasin, mo yufala i mas stap givgivhan long yufala.” (Hib 13:⁠16) Olgeta ya oli traehad blong halpem ol brata blong olgeta, nating se oli stap long hadtaem. Samting ya i mekem ol Kristin long faswan handred yia oli laekem moa God mo olgeta wanwan bakegen. (Jon 13:35) Hemia wan rod we yumi save yusum blong mekem i gud long ol narafala.

² Blong mekem olsem, Jeova i givim ol samting we yumi nidim blong kam strong long saed blong speret. Mo tu ol samting we yumi nidim blong yusum. I gat plante save we i stap kamaot long ol Wajtaoa mo Wekap! Taem yumi kasem ol magasin ya, yumi harem gud taem yumi ridim olgeta kwiktaem. Mo taem yumi tingtinggud long ol save ya we Baebol i stampa blong hem, yumi save tekem sam poen blong yusum long wok blong prij no taem yumi stap storeyan wetem ol narafala. I sem mak, yumi save tekem taem blong mekemrere ol miting. I impoten tumas blong mekem olsem long ol Wajtaoa stadi evri wik. Stadi wanwan long Tok blong God i givhan long yumi blong gat “tingting blong Kraes.” Mo ol man we yumi stap mitim olgeta, bambae oli harem gud long toktok blong yumi.​—⁠1 Korin 2:​14-16; Sam 19:14.

³ Ol Responsabiliti Blong Yumi: Olgeta we oli laekem Jeova oli givim laef blong olgeta long hem. Taem yumi stap akseptem ol responsabiliti from we yumi givim laef blong yumi finis long Jeova, yumi stap soemaot se yumi man blong Jeova. Yumi stap seraot long wol ya mo ol rabis fasin we Setan i bos long hem. Wan gudfala eksampel we yumi save soem long ol narafala, hemia taem yumi folem fasin we Jisas i soemaot finis long yumi. (1 Pita 2:21) Ol tok long seket asembli oli stap givhan long yumi blong holemtaet long promes we yumi mekem finis long Jeova. Olsem, long 1992 i gat stampa tok ya blong seket asembli se: “Yumi Wanwan i Mas Karem Responsabiliti Blong Yumi.”

⁴ Yumi save leftemap tingting blong ol narafala sipos yumi stap go oltaem long ol miting. Taem yumi mekem stadi blong yumi wanwan mo mekemrere ol miting, hemia i givhan long yumi blong gat plante gudfala save blong serem wetem ol narafala. Blong frengud wetem ol narafala olsem famle, yumi save soemaot intres long ol narafala brata sista. Mo taem yumi tekpat long ol miting, yumi stap soemaot se yumi agri nomo wetem tok blong Pol we i stap long Hibrus 10:​24, 25 mo yumi akseptem responsabiliti blong yumi blong leftemap tingting blong ol narafala man.

⁵ Wantem Ol Responsabiliti: ?Olsem wanem long tiokratik yia long 1992, yumi wantem moa responsabiliti, olsem haftaem paenia no fultaem paenia? I nogud blong putum tingting i strong blong kasem haoa nomo. Yumi save putum olgeta tingting blong yumi long ol jans we yumi gat blong joen long wok blong karem kakae long garen. (Jon 4:​35, 36) Sipos yumi wok oltaem wetem ol paenia mo pablisa we oli gat gudhan long wok blong prij, samting ya i save givhan long yumi blong gat gudhan long wok ya tu. Olgeta long kongregesen oli save gat strong tingting long wok ya taem namba blong haftaem paenia i stap go antap. ?Olsem wanem long yia ya? Yu save askem blong kam fultaem paenia no mekem haftaem paenia long evri manis no sam manis nomo, sipos i gat rod blong mekem olsem.

⁶ I gat ol responsabiliti i stap blong ol brata we oli baptaes finis oli save kasem. (1 Tim. 3:​1-10, 12, 13) Olgeta we oli glad blong mekem wok, oli soemaot taem oli stap givim ol ansa long ol miting, mo ol ansa ya oli no olbaot. Oli soemaot tu, taem oli tekpat long Tiokratik Skul. Mo tu, taem oli akseptem ol wok blong lukaot long sam haf blong Miting Blong Kingdom Wok no mekem pleplei long fored. Ol pikinini tu oli save lukaot gud long fasin blong olgeta insaed long Haos-Kingdom. Sipos hem i taem blong buk stadi grup blong olgeta, oli save givhan blong klinim Haos-Kingdom, no oli save mekem ol narafala samting olsem.

⁷ Jisas i soemaot se hem i glad blong akseptem responsabiliti blong givhan long ol narafala taem hem i talem se: “Mi mi wantem.” (Luk 5:​12, 13) Sipos yumi folem eksampel ya blong hem, yumi save leftemap tingting mo givhan long ol brata blong yumi, mo olgeta we oli intres long trutok. Mo tu, yumi save givhan long olgeta we oli gat gud hat blong joen gud long ogenaesesen blong Jeova. Yumi faenem olgeta ya taem yumi stap prij. Blong akseptem responsabiliti blong yumi se, “yumi mas mekem i gud long olgeta man,” i nidim we yumi gat strong tingting, mo maet yumi mas lego sam samting we yumi nomo i wantem. (Gal. 6:10) Be taem yumi luk ol gudfala frut we i kamaot from, yumi save agri wetem tok blong Pol taem hem i se: “From we ol fasin ya tu oli olsem we yufala i stap kilim anamol blong givim i go long God, we hem i glad tumas long olgeta.”​—⁠Hib. 13:⁠16.