Fasin Tangkyu Blong Yu Long Ded Blong Kraes
1 “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli gofri.” (Mat. 20:28) I no gat man we i laef long wol ya we i save mekem samting ya we Jisas Kraes i mekem long olgeta man. From laef blong hem mo ded blong hem long pos, yumi save kasem nambawan presen ya, laef we i no save finis. Be, plante man oli no soem fasin tangkyu long samting we Kraes i bin mekem.
2 Tingbaot store blong Jisas wetem ten man we oli gat leprosi. Taem oli luk Jisas, oli singaot long hem se: “Jisas, Masta, plis yu sore long mifala.” (Luk 17:13) Hem i sore long olgeta, nao hem i talem long olgeta olsem we Loa blong olgeta i talem, blong oli go talemaot long ol pris. Taem olgeta oli stap wokbaot i go long rod, bodi blong olgeta oli kamgud bakegen.
3 Be wan long olgeta nomo i gobak long Jisas blong talem tangkyu long hem. ?Olsem wanem long ol naen narafala man we oli gat leprosi? Olgeta oli gohed long rod blong olgeta oli no tingbaot blong talem tangkyu long man we i mekem olgeta oli kamgud bakegen. (Luk 17:15-17) ?Yumi olsem hu? Yumi wantem kam olsem man ya we i gobak long Jisas. Hem i rili gat fasin tangkyu. ?Yumi rili gat fasin tangkyu from ded blong Kraes?
4 Soem Fasin Tangkyu Blong Yumi: Long evri yia Sosaete i givim sam vas long Baebol blong ridim long wik bifo Memoriol. Ol vas ya blong Baebol oli stap long 1992 Calendar of Jehovah’s Witnesses, long ol dei ya Epril 12-17. Yumi save soem fasin tangkyu sipos yumi ridim ol vas ya mo tingting dip long ol store we i kamaot long laef blong Jisas bifo hem i ded.
5 Wok blong prij i haf blong fasin tangkyu we yumi save soemaot from Memoriol blong ded blong Jisas. Ol elda bambae oli mekemrere ol plan long ol paenia mo ol pablisa blong oli save mekem moa wok blong prij long Epril.
6 Hemia i manis we oltaem plante taosen man oli joen blong mekem wok blong haftaem paenia. Long Epril las yia i gat 13 man we i joen blong mekem wok ya long Vanuatu. ?Yu yu save mekem olsem long Epril ya? Sipos yu no save mekem haftaem paenia, mekem plan blong joen moa long wok blong prij sipos yu gat jans blong mekem olsem.
7 Halpem Ol Narafala Man Blong Oli Gat Fasin Tangkyu: Long evri yia long taem blong Memoriol, plante man we oli intres oli stap joen wetem yumi. Eksampel, long las Epril i gat 10,650,158 man oli kam long Memoriol long fulwol, mo i gat bitim 6,370,000 man long olgeta ya oli intres long trutok. Samting ya i soemaot olsem wanem ogenaesesen i save gru bigwan.
8 Yumi mas yusum smol pepa ya we Sosaete i prentem blong invaetem ol man, mekem ol plan blong tekem ol Baebol studen mo ol man we oli intres oli kam long Memoriol. Yu mas glad blong invaetem ol man blong oli kam.
9 Halpem olgeta blong oli luksave from wanem i mas gat Memoriol, hu i save kakae bred mo waen, mo ol samting ya oli pija blong wanem. (1 Kor. 11:23-26) Mo tu, tokbaot hop blong ol man we oli kakae bred mo dring waen mo olgeta we oli kam lukluk be oli no tekem bred mo waen. (Jon 10:16; Rev. 14:3, 4) Samting ya bambae i givhan long olgeta blong oli kasem save se olgeta man oli mas soemaot se “oli bilif” mo oli mas luksave we fasin blong kam long Memoriol blong ded blong Kraes long wan yia hem i no naf.—Jon 3:16.
10 Memoriol blong ded blong Kraes hem i wan impoten samting. Taem yumi mekemrere gud from, yumi soemaot se yumi rili gat fasin tangkyu long olgeta samting we Jeova mo Kraes tufala i mekem long yumi. Sipos yumi givhan long ol Baebol studen mo ol narafala man we oli intres blong oli gat fasin tangkyu long Memoriol, samting ya bambae i givhan long olgeta blong soemaot bilif tu long ransom we Jeova i mekemrere tru long Jisas Kraes.