Fasin Klin i Givim Ona Long God
1 Loa blong Moses i gat ol strong rul long saed blong fasin klin. Oli mekem ol man Isrel oli stap defren long ol narafala man olsem wan nesen we oli mas stap klin long saed blong bodi mo speret. (Lev. 11:35, 36; 15:1-11; Aes. 52:11) Fasin klin ya i karem ona long God mo i givhan long helt blong nesen ya.
2 Tede tu, fasin klin i wan fasin we i makemaot ol man blong Jeova. Be nating se samting ya i makemaot ol man blong Jeova olsem wan grup, ?i tru long wanwan long yumi? Traehad blong yumi long saed blong fasin klin mo fasin blong kipim evri samting long stret oda we wanwan long yumi i gat, i soemaot fasin tangkyu blong yumi long ol rul blong Jeova.
3 ?Olsem wanem long haos blong yumi? ?Hem i mekem ol man oli ting nogud long mesej blong Kingdom we yumi stap talemaot? I tru se samfala oli save ting se yumi stap gyaman taem yumi stap tokbaot blong mekem wol i kam wan paradaes be prapa haos blong yumi i no klin mo yad i fulap long gras we yumi no katem. Sipos haos blong yumi i luk olbaot nomo no smel blong hem i nogud from yumi no folem ol klin fasin, ?yumi save talem se yumi stap folem “eksampel blong fasin klin we i stret long nyufala wol ya we bambae Kingdom blong God i rulum”?—om pej 123, 124.
4 ?Olsem wanem long trak we yumi stap yusum long wok blong prij? ?Hem i klingud, insaed mo afsaed, blong mekem se taem ol man oli luk be i no spolem wok blong prij blong yumi? ?Olsem wanem long klos blong yumi, basket blong buk, mo lukluk blong yumi wanwan? ?Oli klin mo stret, blong no givim nogud tingting long ol man? I gud yumi swim oltaem mo wasem ol klos blong kipim yumi wanwan mo klos blong yumi oli klin.—w89 6/1 pej 16-19 (E. mo F.).
5 ?Olsem wanem sipos wan brata i no moa kea blong klinim bodi blong hem no haos blong hem, mekem se ol man oli tok nogud long kongregesen from? Maet hem i jes nidim sam long yumi blong soem lav mo givhan long hem from maet hem i olfala no sik. Sipos i olsem, i gud blong soem kaen fasin mo halpem hem. Maet wan narafala man i gat problem ya be hem i no luksave; givim advaes long fasin kaen i save givhan long hem blong stretem samting ya. Ol man wanwan we oltaem oli no soem gud eksampel long saed ya oli no kasem mak we oli naf blong karem bigfala wok long kongregesen. I tru, ol elda oli mas lukaot blong no stanemap prapa rul blong olgeta no wanem oli wantem.
6 Ol man we oli jes soem intres oli welkam blong kam mo haremgud long ol lafet long saed blong speret long Haos Kingdom blong yumi. Plante taem, yumi glad blong invaetem ol man from we Haos Kingdom i luk naes mo i klin. Be, yumi mas wok had blong kipim i stap klin. Lukluk raon long Haos Kingdom blong yufala. ?Ol jea, floa, mo ol wol oli klin? ?Yufala i brasem rum blong tolet oltaem? Taem yumi lukluk oltaem long ol floa we oli doti no ol wol we pen i stat kamaot, maet i no longtaem yumi save ting se samting ya i oraet nomo. Be, ol man we i fastaem blong olgeta blong kam, maet oli kasem wan bigfala sapraes we oli no glad long hem. Yumi mas traem bes blong yumi blong mekem Haos Kingdom i stap klin mo i stret oltaem, joen blong mekem wok blong yumi taem we i stret taem blong yumi blong klinim no mekem sam samting i gud bakegen.
7 Yumi save leftemap God blong yumi we yumi no toktok nating, from fasin klin blong bodi blong yumi, haos blong yumi, trak, mo ol Haos Kingdom. Gudfala eksampel blong yumi bambae i no mekem man i foldaon be bambae i talemaot se wosip blong yumi i klin mo i stret.—1 Kor. 10:31, 32; Jem. 1:27.