Mekem Wok Blong Jeova We i No Gat Samting i Blokem Yufala From

¹ “!Olgeta we Hae God i God blong olgeta, olgeta ya bambae oli haremgud!” (Sam 144⁠:15) ?Ol tok ya blong King Deved oli tru yet, nating se ol dei naoia oli nogud? (Efes. 5⁠:​16) !Yes! Ol Kristin oli faenem glad yet taem oli mekem wok blong Jeova. Ol samting oli no isi long yumi. Setan i stap mekem plante trabol long yumi long taem ya we ‘laef blong wol ya i kam strong tumas,’ be samting ya i no daonem tingting blong yumi. (2 Tim. 3:​1, 2) Ol hadtaem we oli stap kam moa strong oli wan pruf we i soem se taem i kolosap blong Kingdom blong God i karemaot rabis wol ya mo putum wan nyufala wol we i klin long ples blong hem. (2 Pita 3:13) Tudak blong wol ya i no daonem no karemaot hop blong yumi we i mekem yumi glad; defren olgeta, hop blong yumi long saed blong Kingdom i saenaot moa strong. ?Yu yu glad blong mekem wok blong Jeova olsem wan laet long wol ya we i tudak?​—⁠Fil. 2:⁠15.

² Wanwan long yumi, i mas lukaotgud olsem wanem yumi stap mekem wok blong Jeova. ?From wanem? From Setan i wan bigfala man blong tanem tingting blong yumi. Wan diksonari i talem mining blong tok ya “tanem tingting” olsem “blong tanem i go long saed,” “lidim (tingting blong wan man) i go long wan defren samting no long plante defren rod long semtaem,” mo “blong mekem tingting i fasfas no konfyusum man wetem ol defren filing no ol defren tingting we oli pusum hem.” Stat taem hem i kamdaon long wol ya, Setan i stap “gyaman” long ol man blong lidim olgeta oli go krangke. Hem i yusum plante trik blong pulum tingting blong man i gowe long ol samting we oli impoten long taem blong yumi. (Rev. 12⁠:9) Nating se ol Wetnes blong Jeova oli givim olgeta fulwan blong talemaot Kingdom long handred yia we oli pas, ?hamas man oli luksave ol impoten samting long saed blong mekem nem blong God i klin mo leftemap hae rul blong hem tru long Kingdom blong God? Smol man nomo. (1 Jon 5⁠:19) From we Setan i bin pulum plante bilyan man long wol ya, denja we i stap naoia se hem i save pulum tingting blong yumi blong mekem se yumi lego wok blong Jeova. Sore tumas, sam long ol brata blong yumi oli konfyus from ol samting we Setan i yusum blong pulum olgeta. Oli letem tingting blong olgeta i go long ol defren rod. I gat plante defren samting we oli save pulum man tede. Traem luk sam long olgeta.

³ Problem Long Saed Blong Mane Mo Fasin Blong Laekem Ol Sas Samting: Long plante kantri long wol, fasin we i no gat wok, mo laef we i sas i mekem ol man oli wari. I tru, yumi mas gat kakae, klos, mo haos blong yumi mo famle blong yumi. Be sipos yumi letem yumi blong wari bigwan long ol samting we yumi nidim long laef, ol wari ya bambae oli bos long tingting blong yumi. Fasin blong kasem ol samting long saed blong bodi i save kam impoten samting long laef bitim sapot we yumi givim long wok blong Kingdom. Aposol Pol i givim advaes long samting ya long Hibrus 13⁠:​5, 6. Jisas Kraes i promes long yumi se olgeta we oli stap lukaot Kingdom fastaem oli no nidim blong wari; Jeova bambae i givim wanem yumi rili nidim. (Mat. 6⁠:​25-34) Ol paenia mo ol narafala man blong wok fultaem long wok blong Jeova long olgeta ples long wol oli save talem se samting ya i tru.

⁴ Wol blong Setan i stap leftemap fasin blong laekem ol sas samting. Bigfala tingting we i pusum plante milyan man se, oli wantem kasem moa sas samting no lukaotgud long olgeta. Ol semkaen fasin olsem blong pulum man oli bin stap long taem blong Jisas. Wan yangfala man we i rij i askem Jisas long wanem hem i mas mekem blong kasem laef we i no save finis. Jisas i ansa se: “Sipos yu wantem kam stret gud olgeta [no, gat olgeta fasin we yu nidim], yu go, yu salemaot olgeta samting blong yu, yu tekem mane blong olgeta, yu go givim long ol puaman, nao bambae yu yu gat plante samting blong yu long heven. Ale, yu kam, yu biaen long mi, yu man blong mi.” (Mat. 19⁠:​16-23) I klia se, ol sas samting blong yangfala man ya oli blokem hem blong mekem wok blong God wetem ful laef blong hem. Hat blong hem i stap long ol rij samting blong hem. Jisas i save se yangfala man ya i save haremgud sipos hem i sakemaot ol samting ya we oli stap pulum hem. Ol samting ya oli blokem hem blong givim hem fulwan long wosip blong God. ?Olsem wanem long yu? ?Yu yu faenem se yu stap wok moa haoa long wok blong yu blong kasem mane jes blong holemtaet fasin blong laef we naoia yu stap long hem? ?Samting ya i stap spolem yu long wok blong Jeova? ?Ol sas samting blong yu oli kakae moa taem mo paoa blong yu mekem se i no gat taem blong wok long intres blong Kingdom? (Mat. 6:24) ?Yu save tekemaot mo stretem sam samting long laef blong yu, blong yu save givim moa taem long ol samting long saed blong speret?

⁵ Ol Samting Blong Evri Dei Laef: Sipos yumi no lukaotgud, bambae yumi bisi tumas long ol samting blong evri dei laef ale yumi stat blong ting nating long ol samting long saed blong speret. Tingbaot ol man long taem blong Noa. Oli bisi tumas long fasin blong joen wetem ol narafala grup blong man, kakae mo dring, mared mo mekem ol yangfala blong olgeta oli mared, ale oli no tingbaot mesej blong woning blong Noa long saed blong Bigfala Wora we i stap kam. Bifo we oli luksave samting ya, Bigfala Wora i kam mo i kilim olgeta. Ol samting long laef we oli pulum olgeta oli mekem olgeta oli lusum laef from. Jisas i talem se: “Long taem we mi, mi Pikinini blong Man bambae mi kamtru, bambae i olsem.” (Mat. 24:37-39) Yes, bighaf blong ol man tede oli stap tingbaot prapa laef blong olgeta nomo mekem se oli no tingbaot mesej blong givim woning we yumi stap karem i go long olgeta. Oli soemaot se oli no tingbaot nating ol samting long saed blong speret.

⁶ ?Laef blong yu i kam fulap long fasin blong joen oltaem wetem ol narafala man blong haremgud wetem olgeta mekem se yu no moa tingbaot tumas ol samting long saed blong speret? Wan taem, Mata mo Meri oli gat jans blong invaetem Jisas long haos blong tufala. Meri i stap lesingud long wanem Jisas i talem. Long defren fasin, Mata i ‘stap harem nogud, i stap trabol long plante samting.’ Mata i stap tingbaot tumas blong stap olsem wan gudfala woman blong mekem welkam long man. Hem i no luksave nid blong tekem taem blong lesin long Jisas. Jisas i poenemaot long Mata wetem kaen fasin se hem i no nidim blong mekem bigfala kakae; hem i mas tingbaot moa ol samting long saed blong speret. ?Yu nidim blong mekem advaes ya i wok long laef blong yu? (Luk 10:38-42) Jisas i givim woning tu se yumi mas lukaot long yumi wanwan blong yumi no kakae tumas mo dring plante, ale tingting blong yumi i no moa stap klia. Long taem ya we i impoten tumas long histri blong man, yumi nidim blong stap wekapgud fulwan.​—⁠Luk 21:​34-36.

⁷ Ronem Ol Pleplei: Wan long ol bigfala samting we Setan i yusum blong pulumaot yumi long wok blong Kingdom hemia fasin blong ronem ol pleplei. Plante milyan man long Krisendom oli putum ol pleplei long ples blong God. Oli laekem moa blong pleplei bitim we oli stadi dip long Tok blong God. (2 Tim. 3⁠:⁠4) I tru, ol gudfala pleplei blong mekem bodi mo tingting i haremgud oli no rong. Be fasin blong spenem plante taem evri wik long ol samting olsem televisin, sinema, video, spot, ridim ol buk, no sam samting we yumi laekem blong mekem oltaem, oli save mekem hat blong yumi i kam nogud mo pulum yumi i go longwe long Jeova. (Jer. 17⁠:​9; Hib. 3⁠:12) ?Olsem wanem samting ya i save hapen? Long taem blong ol Kristin miting, yu save faenem se yu stap tingbaot narafala samting; maet samtaem yu wantem se miting i finis kwik blong bambae yu save gobak long haos mo gohed blong ronem ol pleplei. I no longtaem, bambae yu faenem se yu stap lukaot sam risen blong stap long haos bitim we yu go long ol miting no joen long wok blong prij. Naoia i taem blong luksavegud sipos fasin blong ronem ol samting ya i kam wan samting we i stap pulum tingting blong yu. (Luk 8⁠:14) ?Yu ting se yu save yusum sam long ol gudfala haoa we yu stap yusum blong pleplei, long fasin we i moa gud blong kam strong moa long saed blong speret?

⁸ Fasin Blong Traem Stretem Ol Problem Blong Man Oli Kakae Taem: Samfala oli foldaon long trap ya blong mekem sam wok blong traem stretem ol problem we ol man oli stap kasem tede. I nidim blong ol Kristin oli lukaot blong no joen long ol rao blong wol blong traem stretem ol problem blong komuniti no ol faet we oli blong nating nomo, blong traehad blong winim kruked fasin. (Jon 17⁠:16) Olgeta samting ya oli haf blong plan blong Setan blong mekem se ol man oli no lukluk long advaes blong Baebol mo oli no luksave stampa samting we i tru se i gat wan ansa nomo we i save stretem ol trabol blong olwe​—⁠hemia Kingdom blong God. Sipos yumi harem nogud from wan trabol we i spolem yumi no i mekem i no stret long yumi, yumi mas lukaotgud blong tingting blong yumi i no trabol tumas no yumi wantem givimbak mekem se yumi fogetem se yumi wanem kaen man​—⁠ol Wetnes blong Jeova. Antap long evri samting, hem i Jeova we oli mekem nogud long hem mo i nem blong hem we yumi mas mekem i tabu.​—⁠Aes. 43:​10-12; Mat. 6:⁠9.

⁹ Evriwan oli wantem holemtaet gud helt, be tingting plante long ol samting we ol man oli mekem mo fasin blong spenem tumas taem blong lukluk long ol tingting blong man mo ol meresin oli save mekem wan man i tingbaot oltaem long saed blong ol samting blong helt nomo. I gat plante man we oli leftemap plante defren kaen kakae blong mekem man i no fatfat tumas, ol meresin, mo fasin blong holem bodi blong man blong mekem man i haremgud long bodi mo tingting, plante long ol fasin ya oli agensem olgeta bakegen. Long saed blong helt i wan disisen blong wanwan man, sipos disisen ya i no agensem ol rul blong Baebol. Oltaem yumi mas holemtaet ful tras long Kingdom blong God olsem meresin blong ol problem blong man.​—⁠Aes. 33:24; Rev. 21:​3, 4.

¹⁰ Stanap Strong, No Muf: Taem en i stap kam kolosap, Setan bambae i wok strong moa blong pulumaot yu long wok blong Jeova. “Yufala i mas stanap strong long bilif blong yufala, blong blokem hem.” (1 Pita 5:⁠9) ?Olsem wanem? Yu mas fidim yu wetem ol tingting blong God. (Mat. 4⁠:⁠4) No letem ol samting blong wol oli pulum yu mo famle blong yu blong yufala i no moa gat taem we yufala i nidim blong tingting dip mo blong tingtingbak long kwaet fasin long Tok blong God. Long taem blong kakae, famle i save storeyan tugeta long ol ekspiryens mo ol narafala samting long saed blong speret we oli save leftemap tingting. Holemstrong oltaem long program blong stadi wanwan mo rere long ol miting.

¹¹ Taem ol wari oli mekem se tingting blong yu i no stap kwaet, putum ol trabol blong yu long Jeova tru long prea. Yu save bilif strong se hem i stap tingbaot yu. (1 Pita 5⁠:⁠7) Letem pis blong God i lukaot long hat mo tingting blong yu. (Fil. 4⁠:​6, 7) No letem ol samting blong pulum yu oli mekem se yu no moa lukluk klia long saed blong speret. Putum Jeova i stap fored blong yu oltaem, olsem Jisas i bin mekem. (Wok 2⁠:25) Lukluk oltaem stret long fored long mak blong yu we yu wantem kasem, olsem Proveb 4⁠:​25-27 i leftemap tingting blong yumi se: “Long saed blong ol ae blong yu, oli mas lukluk i go stret nomo, yes, ol ae blong yu we oli kliagud oli mas lukluk stret long fored blong yu. Mekem ol rod blong yu oli stret, mo bambae ol rod blong yu oli stanap strong. Yu no mas tanem i go long raet saed no long lef saed.”

¹² Go long ol miting oltaem, mo stretem yu wan blong mekem se yu lesingud oltaem long advaes we i kamaot long Tok blong God. (Hib. 2:1; 10:​24, 25) Mo i nogud blong lukluk long ol pleplei we rabis wol ya i save givim, i moa gud blong traem kasem mak ya blong holemtaet wan minista wok we i karem frut. Samting ya nao i givim glad mo fasin blong haremgud blong olwe. (1 Tes. 2⁠:​19, 20) Laswan samting, no letem eni samting no eni man i pulumaot yu long tabu wok blong yu. “Yufala i mas stanap strong. Yufala i mas no kam slak bakegen. Oltaem yufala i mas wok strong long ol wok ya blong Masta blong yumi. Yufala i save finis se taem yufala i wok blong Masta ya blong yumi, be wok ya bambae i gat frut blong hem.”​—⁠1 Kor. 15⁠:⁠58.