Gohed Blong Mekem Ol Tiokratik Wok Long Hot Taem
1 Long hot taem, yumi gat plante janis blong joen long ol defren wok. From we taem i gud, bighaf blong yumi i wantem spel mo mekem samting we i defren. Be, yumi mas lukaot blong no stopem ol tiokratik wok blong yumi.—Fil. 3:16.
2 ?Yu yu mekem plan finis blong stap long Spesel Dei Asembli long hot taem long yia ya? ?Yu yu tingbaot blong tekem wan we i nidim help long kongregesen blong yu, blong i go wetem yu long asembli ya? Sipos yu soem kaen fasin olsem, yutufala tugeta i save kasem blesing from.
3 ?Sipos yu gat sam fri taem, olsem taem ol pikinini oli spel long skul, yu yu tingbaot finis blong joen moa long wok blong prij? Plante oli luk se hemia wan janis blong mekem wok blong haftaem paenia. Mo plante taem hemia i openem wan rod blong kasem moa wok. Ol famle oli save kasem trufala glad taem oli spenem ful dei tugeta long wok blong prij. ?Nating sipos i olsem wanem, be yu, yu save spenem moa taem long wok blong prij? From we i gat gudfala taem, mo delaet i longfala, plante moa oli save joen long wok blong prij long sapa mo kasem gudfala frut from.
4 ?Yu yu mekem plan blong go spel long wan narafala ples? ?Sipos yes, yu yu mekem plan blong joen long ol miting long ples we bambae yu go long hem? ?Bambae yu go prij wetem ol brata we oli stap long ples ya? Sipos yu mekem ol samting ya long taem blong spel blong yu, bambae yu wetem ol narafala, yufala i save kasem gudfala frut from. (Rom 1:11, 12) ?Mo tu, bambae yu tekem janis blong prij taem yu stap mekem trip blong go spel? Yu mas mekem sua se yu tekem Baebol blong yu mo sam magasin. Yusum sam fri taem blong yu blong stadi mo ridim Baebol. Yu mas rimemba se nating we samtaem yumi nidim blong spel from ol wok we yumi mekem blong winim mane, be yumi no spel long wok blong Jeova.
5 Yes, i tru se ating bambae yumi bisi long hot taem. Be ol pleplei oli save spolem gudfala program we yumi stap folem blong mekem wok blong Kingdom. Yusum gud ol janis we yu gat blong mekem wok long hot taem. Makemaot ol gudfala wok long saed blong spirit we i mas kam fastaem, mo gohed blong mekem olgeta.—Fil. 1:10.