Ol Yangfala Oli Nidim Wan Gudfala Eksampel
1 Yumi glad tumas blong gat ol yangfala oli stap wetem yumi we namba blong olgeta i stap kam antap mo we oli stap ‘presem nem blong Jeova.’ (Ol Sam 148:12, 13) Plante long olgeta oli no gat plante yia yet. Fasin blong olgeta blong gru long saed blong speret i stanap bigwan long trening mo eksampel we ol papa mama mo ol narafala bigman long kongregesen oli givim. Be, yumi no mas tingting nating long paoa we ol narafala yangfala oli gat long olgeta, speseli olgeta we oli bigwan moa, we oli gat bitwin 13 mo 19 yia mo olgeta we oli bigman finis. Sipos yu yu gat yia olsem, ol tok ya oli save givhan long yu.
2 Ol yangfala we oli no kasem 13 yia yet oli traem blong folem fasin blong olgeta we oli bigwan olsem 13 kasem 19 yia. Oli wantem gat fasin olsem olgeta we oli joen oltaem wetem olgeta mo we oli tinghae long olgeta. Oli tinghae moa long ol narafala yangfala we oli gat moa yia mo we i luk olsem se oli gat save mo oli bigman finis. From samting ya, maet oli save folem fasin blong yu mo fasin blong toktok blong yu, mo tu fasin blong yu blong laekem ol samting long saed blong speret mo fasin joen blong yu long ol wok blong kongregesen.
3 Olsem wan yangfala we yu gat bitwin 13 mo 19 yia, yu gat jans blong soem gudfala eksampel long olgeta be tu yu gat wan hevi responsabiliti. Stret naoia, ating ol yangfala fren blong yu oli stap wajem eksampel blong yu. Askem yu wan se, “?Mi mi stap pulum olgeta we oli yangfala moa long mi long wanem rod? ?Mi mi gat fasin blong tinghevi long ol impoten samting, ronwe long ol krangke fasin mo ol rong ‘samting we ol yangfala oli wantem’? ?Mi mi stap soem fasin obei mo respek long papa mama blong mi, long ol elda, mo ol narafala bigman?” (2 Tim. 2:22; Kol. 3:20) Wanem we yu stap talem mo mekem i save kam bigfala samting we i pusum ol narafala yangfala we oli stap luk fasin blong yu, blong gohed moa long saed blong speret.
4 Talemaot mesej blong Kingdom i bigfala wok blong kongregesen. Fasin blong yu blong wantem joen mo blong joen oltaem long hem i save leftemap tingting blong ol fren blong yu blong wok strong moa. Sipos yu gat jans blong mekem wok blong paenia, bambae samting ya i pusum ol fren blong yu blong mekem sem mak. Givim ansa long ol miting mo givhan blong mekem ol defren wok we i nidim blong mekem long Haos Kingdom, i wan gudfala eksampel tu.
5 Nating se Timote i gat bitim 19 yia blong hem taem Pol i givim advaes ya long hem, yufala we i gat 13 kasem 19 yia, yufala i save mekem i wok tu: “Long ol tok mo wok blong yu, yu mas soemaot stret fasin long fes blong ol Kristin man. Oli mas luk fasin blong yu blong laekem tumas ol man, mo blong bilif, mo blong mekem laef blong yu i klin gud.” (1 Tim. 4:12) Fasin blong yu blong glad blong wok strong mo joen fulwan long wok blong Jeova i save pusum ol fren blong yu mo olgeta we oli yangfala moa long yu we oli stap lukluk yu, blong oli folem wan gud rod, i save givhan long olgeta blong gohed moa blong kam bigman long saed blong speret. (Efes. 4:13) Ol yangfala we oli gat 13 kasem 19 yia mo oli stap long wan famle we i jes stat nomo blong stadi, ol fasin we oli luk long yu i save pulum olgeta oli kam long trutok.
6 Impoten moa, fasin blong yu blong traehad blong soemaot ol fasin blong God, i givim ona long Jeova mo ogenaesesen blong hem. (Prov. 27:11) Olgeta we hat blong olgeta i stret we oli stap lukluk ol fasin ya, bambae oli sapraes blong luk we fasin blong yu i defren olgeta long fasin blong ol yangfala blong wol. Taswe yu gat wan spesel jans blong givhan long olgeta we oli yangfala moa long yu, mo long semtaem, yu stap joen bigwan long wok blong presem nem blong Jeova.—Sam 71:17.