Savegud Ol Brata Blong Yu

¹ Fasin fren blong yumi wetem ol narafala man blong wosip i go moa bitim fasin blong go long miting wetem olgeta long Haos Kingdom. Yumi man blong mekem wok blong God, mo samting ya i mekem yumi gat wan fasin fren long saed blong speret wetem Jisas. (Mak 3⁠:34, 35) Mo samting ya i mekem yumi gat wan fasin fren long saed blong speret olsem famle wetem ol narafala long Kristin kongregesen, ol brata mo sista blong yumi long saed blong speret, we yumi kasem oda blong laeklaekem olgeta. (Jon 13⁠:35) Taswe, olgeta we oli stap joen wetem ‘ol memba blong famle blong God’ oli mas traehad blong savegud ol narafala.​—⁠Efes. 2⁠:19.

2 Save Nem Blong Ol Brata Blong Yu: ?Yu yu save nem blong olgeta brata mo sista long Buk Stadi blong yu? Kolosap oltaem grup i smol nomo, taswe i isi blong save nem blong bighaf blong olgeta, no maet olgeta evriwan we oli stap joen long hem. Sipos yu no save nem blong olgeta, ?yu save talem se yu savegud olgeta?

³ ?Olsem wanem sipos yu traem blong save sam narafala, antap moa ol pikinini we oli stap kam long ol miting long Haos Kingdom? Maet samtaem yumi stap joen nomo wetem wan smol grup blong ol fren. Nating se i no rong blong joen oltaem wetem samfala, yumi no wantem holem fasin blong talem halo mo storeyan we i leftemap tingting long samfala nomo. Yumi mas ‘go moa’ blong savegud olgeta brata mo sista blong yumi. (2 Kor. 6⁠:11-13) I klia se samting ya i minim tu se yumi save nem blong olgeta.

⁴ Ol brata we oli stap gat haf long ol miting blong kongregesen oli mas traehad blong save ol nem blong olgeta we oli stap kam long ol miting. Taem oli singaotem nem blong olgeta long platfom, samting ya i mekem oli harem se ol narafala oli glad long ansa blong olgeta, mo long semtaem, i givhan long ol narafala blong save nem blong olgeta. I tru, oltaem bambae i gat sam nyuwan no sam we oli visita nomo long medel blong ol man we oli stap lesin, we bambae i mekem i had blong save evri nem. Be, sipos yumi gat trufala fasin traehad, samting ya bambae i leftemap tingting blong ol narafala mo i soemaot wan trufala fasin blong intres long narafala.​—⁠Rom 1:​11, 12.

⁵ Mekem Faswan Step Blong Savegud Olgeta: Ol brata we oli goraon oli savegud plante brata mo sista. ?Oli mekem olsem wanem? Long tri rod: (1) Oli wok oltaem wetem olgeta long wok blong prij; (2) sipos oli naf, oli akseptem taem ol brata oli invaetem olgeta blong visitim olgeta long haos blong olgeta; mo (3) oli mekem faswan step blong talem halo long ol bigman mo ol pikinini long ol miting.

⁶ ?Yu luk sam rod blong joen wetem plante moa brata mo sista blong yu mo blong yu savegud olgeta? Yumi save askem ol narafala blong joen wetem yumi long wok blong prij. Prij long ol haos wanwan, mekem ol visit, go long ol Baebol stadi, no seremaot magasin long rod, oli sam nambawan rod blong savegud olgeta. I gud tu blong invaetem ol narafala blong kam long haos blong yu, maet oli save kakae no dring ti wetem yu samtaem. Fasin blong tekem faswan step blong toktok wetem ol nyuwan no olgeta we oli sem, bambae i save givhan bigwan long olgeta long saed blong speret, be tu i save karem plante blesing.​—⁠Wok 20:35; 1 Tes. 5:⁠11.

⁷ Pol i savegud ol brata blong hem. Taem hem i tokbaot sam long olgeta, hem i yusum stret nem blong olgeta. Taem hem i yusum stret nem blong olgeta long ol leta blong hem, samting ya i pruvum se hem i intres long olgeta, i no tingbaot hem wan nomo, mo i gat trufala lav long olgeta. (1 Tes. 2⁠:17; 2 Tim. 4⁠:19, 20) Fasin traehad blong yumi blong savegud ol brata blong yumi bambae i givim blesing long yumi evriwan.