Ol Gudfala Fastok Blong Seremaot Laef Foreva Buk
1 Jisas i gat gudhan blong yusum ol fastok. Hem i save wanem we hem i mas talem blong wekemap intres blong man. Wan dei, hem i askem nomo long wan woman Sameria blong givim sam wora long hem, ale long rod ya, hem i statem wan storeyan wetem hem. Kwiktaem nomo, samting ya i pulum tingting blong woman ya, from we ‘ol man Jyu oli no save joen wanples wetem ol man Sameria.’ Biaen, storeyan ya i halpem woman ya mo plante narafala tu blong kam man blong bilif. (Jon 4:7-9, 41) Yumi save lanem sam samting long eksampel blong Jisas.
2 Taem yu stap mekemrere blong givimaot Laef Foreva buk, i gud yu askem long yu wan se, ‘?Long teritori blong mifala, ol man oli wari moa long wanem samting? ?Wanem poen bambae i pulum tingting blong wan yangfala, wan olfala, wan hasban, no wan waef?’ Yu save mekemrere moa long wan fastok mo yu save plan blong yusum hemia we i stret long samting we i hapen.
3 From we plante man oli wari long saed blong ol famle we oli stap seraot, maet yu save talem se:
◼ “Ol traem blong evridei laef oli mekem bigfala trabol long ol famle tede. ?Yu ting se weples yumi save faenem help? [Wet long ansa.] Baebol i save halpem yumi bigwan. [Ridim 2 Timote 3:16, 17.] Baebol i givim ol gudfala advaes we oli save halpem ol famle blong stanap strong. Makemgud samting we buk ya, Yu Save Laef Foreva Long Paradaes Long Wol, i tokbaot long pej 238.” Ridim paragraf 3 mo askem man blong tekem buk.
4 Sipos yu tokbaot wan nyus we i kamaot long ples blong yumi, maet yu save talem se:
◼ “?Yu harem nyus long saed blong [talem nyus we ol man ples oli wari long hem]? ?Wanem tingting blong yu long saed ya? [Letem man i ansa.] Nyus ya i mekem yu yu tingbaot se bambae wol ya i kasem wanem mak long ol fasin nogud blong hem, ?i tru? Baebol i talem se, ol samting ya oli pruvum se yumi stap laef long ol lasdei.” Ale tokbaot ol save we oli stap long Laef Foreva buk, pej 150 kasem 153.
5 Plante man oli wari long saed blong fasin blong brekem loa we i stap kam antap bigwan. Maet yu save yusum ol fastok aninit long ol tok ya “Crime/Safety” (“Fasin Blong Brekem Loa/Stap Sefgud”) long pej 10 blong “Reasoning” buk:
◼ “Mifala i stap toktok wetem ol man long saed blong fasin blong stap sefgud. I gat plante fasin blong brekem loa raonabaot long yumi, mo ol fasin ya oli gat paoa long laef blong yumi. ?Yu ting se i nidim wanem blong ol man olsem yumi, oli harem se oli sefgud taem oli wokbaot long rod long naet?” Maet yu save ridim Ol Sam 37:10, 11 mo tokbaot ol blesing we bambae Kingdom blong God i mekem. Yu save yusum pej 156 kasem 158 long Laef Foreva buk.
6 Sipos yu wantem yusum wan fastok we i moa isi, maet yu save yusum fastok ya we yumi faenem antap long pej 12 long “Reasoning” buk:
◼ “Mifala i stap leftemap tingting blong ol man we oli stap raonabaot long mifala blong tingbaot nambawan fyuja we Baebol i tokbaot. [Ridim Revelesen 21:3, 4.] ?Yu glad taem yu harem samting ya? [Letem man i ansa.] Japta 19 blong buk ya i tokbaot ol narafala blesing we ol man we oli obei long God bambae oli kasem aninit long Kingdom blong God.” Ale, askem man blong karem Laef Foreva buk.
7 Fasin blong mekemrere wan gudfala fastok i save halpem yu blong kasem ol man we oli hanggri from stret fasin.—Mat. 5:6.