“Yufala i Stap Lukaotgud”

¹ Taem Jisas i talem ol tok ya long Matyu 26:​38-41, hem i stap kam kolosap long wan hadtaem, we i bitim ol narafala taem long laef blong hem. Taem ya i moa impoten bitim ol narafala taem long histri blong man. Laef blong olgeta man i dipen long samting we i hapen long taem ya. Ol disaepol blong Jisas oli mas “stap lukaotgud.”

² Tede, yumi stap kolosap tumas long taem ya we Jisas bambae i kam blong mekem tufala wok ya, blong sevem man mo blong kilim man i ded. Yumi ol Kristin, we yumi stap lukaotgud mo luksave se taem ya i impoten tumas, yumi no jes stap nating nomo mo wet blong hem i sevem yumi. Yumi save se yumi mas rere oltaem. Yumi mas ‘stap traehad tumas mo hadwok’ long ol wok blong Jeova. (1 Tim. 4:10) ?Olsem wanem long yumi wanwan? ?Yumi stap lukaotgud?

³ Jekemgud Yumi Wanwan: Jisas i givim narafala woning ya tu se: ‘Yufala i mas luklukgud long laef blong yufala.’ (Luk 21:​34, 35) Yumi wanwan i mas luklukgud long yumi, blong mekem sua se ‘tingting blong yumi i klingud, mo i no gat man we i gat poen long yumi, taem yumi stap laef long medel blong ol man we oli gat ol krangke fasin, mo oli agens long evri samting.’ (Fil. 2:15) ?Yumi stap folem ol Kristin fasin long laef blong yumi evri dei? ?Yumi stap folem Jisas mo obei long ol rul we Tok blong God i talem? Yumi mas ronwe long ol fasin we oli no Kristin, we ol man blong wol ya, we i “stap long paoa blong Setan,” oli stap mekem. (1 Jon 5:19; Rom 13:​11-14) Taem yumi jekemgud yumi wetem Baebol, ?yumi rili stap lukaotgud, olsem Jisas i talem long yumi blong mekem?

⁴ Ol elda oli mas lukaotgud blong wok strong long ol wok blong olgeta long kongregesen. Oli save se oli mas talemaot long fes blong God se oli lukaot long ol sipsip ya olsem wanem. (Hib. 13:17) Ol hed blong ol famle oli gat wan spesel wok blong lidim ol famle blong olgeta long ol rod blong Jeova. (Jen. 18:19; Jos. 24:15; skelem wetem 1 Timote 3:​4, 5.) !Mo tu, i impoten tumas we yumi evriwan i folem loa blong Baebol blong laeklaekem yumi! Hemia fasin we i makemaot ol trufala Kristin.​—⁠Jon 13:⁠35.

⁵ Lukaotgud Blong Givim Woning Long Ol Narafala: Fasin blong lukaotgud i no minim nomo se yumi stap luklukgud long yumi wanwan. Yumi kasem wan wok tu, blong mekem ol narafala man oli kam disaepol blong Jisas. (Mat. 28:​19, 20) Lav we yumi gat long ol man raonabaot long yumi, i mas pusum yumi blong givim woning long olgeta, blong oli save faenem rod blong laef tru long bigfala trabol we kolosap nao bambae i spolem wol ya. Hemia wok blong olgeta Kristin. Hemia wan impoten haf blong wosip blong yumi. (Rom 10:​9, 10; 1 Kor. 9:16) Long wok ya blong sevem laef blong ol man, plante taem yumi faenem ol man we oli no intres, mo samfala oli agensem yumi stret. Be yumi gat responsabiliti blong gohed nomo, nating se bighaf blong ol man oli no wantem harem woning ya. (Esik. 33:​8, 9) Trufala lav we yumi gat long God mo long ol man raonabaot long yumi, bambae i pusum yumi blong gohed oltaem.

⁶ Naoia i no wan taem blong slak mo no kea. Yumi mas lukaot blong no letem ol wari blong laef evri dei oli pulum tingting blong yumi tumas. Mo tu, yumi no mas joen tumas long ol pleplei mo fasin blong haremgud long wol ya, gogo oli kam olsem wan trap we yumi foldaon long hem. (Luk 21:​34, 35) Naoia, bitim olgeta taem bifo, i gat bigfala nid blong wekap mo lukaotgud. Taem ya we Jisas Kraes bambae i jajem mo panisim rabis wol ya, i stap kam kwik tumas. Olgeta nomo we oli stap wekap, reregud mo lukaotgud, bambae oli laef. !Sipos yumi obei long ol advaes blong Jisas, mo yumi “gat paoa blong ronwe long olgeta trabol ya,” bambae yumi glad tumas biaen!​—⁠Luk 21:⁠36.