Ol Tok We Jeova i Talem Bakegen, ?Oli Stap Wekemap Yumi Long Saed Blong Speret?
1 Man blong raetem ol Sam i presem Jeova, i se: ‘Oltaem mi mi stap tingting long ol tok we yu talem bakegen mo bakegen long mi.’ (Sam 119:99) Hibru tok we oli tanem i kam ‘talem bakegen mo bakegen,’ i karem mining se Jeova i stap mekem yumi tingbaot ol loa, oda, rul, komanmen, mo toktok blong hem. Sipos yumi lesin long olgeta, bambae oli wekemap yumi long saed blong speret, mo mekem yumi hapi.—Sam 119:2.
2 Yumi ol man blong Jeova, oltaem yumi stap kasem tijing mo advaes. Plante long ol toktok ya, yumi harem finis. Yumi glad long ol tok ya we i leftemap tingting blong yumi, be yumi stap fogetem. (Jem. 1:25) Wetem longfala tingting mo lav, Jeova i stap talem ol tok ya bakegen mo bakegen. Aposol Pita i raetemdaon sam long ol toktok we hem i talem bakegen, blong ‘wekemap yumi, blong mekem tingting blong yumi i stret, mo blong mekem yumi tingbaot bakegen ol loa blong Masta.’—2 Pita 3:1, 2.
3 Bakegen mo bakegen, yumi kasem ol tok blong soemaot olsem wanem stadi wanwan mo fasin blong go oltaem long ol miting i impoten tumas. Yumi stap kasem ol tok ya from we ol wok ya oli impoten tumas, blong yumi stap strong long saed blong speret.—1 Tim. 4:15; Hib. 10:24, 25.
4 Samting we i hadwok moa long samfala, i blong mekem Kristin wok ya blong prij. Samting ya i nidim fasin traehad, strong tingting, mo fasin blong no lego. Nating se i hadwok long yumi, yumi kasem help blong ‘stanap strong,’ taem yumi putum ‘ol but we oli olsem ol tul blong talemaot gud nyus.’—Efes. 6:14, 15.
5 Tingting we i pusum yumi blong wok, i no olsem we yumi save nomo long ol tok blong Jeova. Aposol Pol i mekem yumi tingbaot se, hat nao i stap pusum yumi blong ‘talemaot tok ya long maot blong yumi, blong God bambae i sevem yumi.’ (Rom 10:10) Sipos yumi gat strong bilif, mo sipos hat blong yumi i laekem ol tok we Jeova i stap talem bakegen mo bakegen, bambae yumi wantem toktok blong presem nem blong hem.—Sam 119:36; Mat. 12:34.
6 Taem yumi wok strong blong mekem ol gudfala wok, yumi save se bambae yumi kasem glad from. (Ekles. 2:10) Pol i talem se glad i wan frut blong tabu speret blong Jeova, mo se yumi mas traehad blong fulap oltaem long glad. (Gal. 5:22) Pita i talem tu se sipos yumi “traehad” blong kamgud moa, bambae yumi karem frut long wok blong prij, mo samting ya bambae i givim glad.—2 Pita 1:5-8.
7 Taem yumi kasem wan trabol, yumi mas tingbaot strong tingting blong ol aposol, taem oli talem se: “Mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” (Wok 4:20) Yumi kasem paoa blong gohed, taem yumi tingbaot se sipos ‘oltaem yumi mekem fasin ya, bambae yumi save sevem yumi, wetem ol man we oli stap lesin long yumi.’—1 Tim. 4:16.
8 Yumi no harem nogud no kam kros, taem yumi kasem ol tok bakegen mo bakegen. Defren nao, yumi gat bigfala fasin tangkyu from ol nambawan advaes ya. (Sam 119:129) !Long hadtaem ya we yumi stap long hem, yumi talem tangkyu long Jeova we hem i stap talem ol tok bakegen mo bakegen, blong wekemap yumi long saed blong speret, mo blong pusum yumi blong wok strong long ol gudfala wok!—2 Pita 1:12, 13.