Putum Tingting Blong Yu i Stap Long Ol Samting Blong Heven
1 Wan haf blong magasin ya The New York Times blong Desemba 31, 1994, i tokbaot ol man we oli laef long taem blong yumi, mo tingting blong olgeta long saed blong fyuja. Hem i talem se: “Oli stap fraet long fyuja. Oli fraet long saed blong wok, sik, mane, mo olgeta trabol long wol.” Long olgeta ples, filing blong fraet long saed blong laef i stap. Minista wok blong yumi olsem ol Wetnes blong Jeova, i mekem se evri dei yumi mitim ol man we oli gat filing olsem. I tru se yumi fesem sem trabol olsem olgeta ya. Be bilif mo tras blong yumi long ol trufala promes long Tok blong God, oli mekem se yumi gat wan narafala tingting long saed blong laef mo fyuja blong ol man.—Aes. 65:13, 14, 17.
2 Positif tingting blong yumi mo trufala hop we yumi gat, i stap pulum plante man we hat blong olgeta i stret, blong oli lesin long mesej we yumi karem i go long olgeta. Plante we tingting blong olgeta i foldaon mo oli harem se laef i strong tumas, oli haremgud bakegen taem oli toktok wetem yumi. Samfala oli agri blong stadi Baebol wetem yumi from we oli laekem samting we oli harem. Be wanwan long ol man ya oli wantem talemaot ol prapa problem blong olgeta fastaem. Yumi save tekem taem blong lesin long wari blong olgeta, be yumi no mas fogetem mak blong yumi, hemia blong tijim ol man long ol nambawan trutok long Tok blong God.
3 Yumi mas soem sore long olgeta we oli stap harem nogud from fulap trabol. Jisas i soemaot rod, taem hem i talem tok ya long Matyu 11:28: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi.” Yumi wantem leftemap tingting blong ol man long sem fasin. Be makemgud we, long en blong vas 28, Jisas i talem se: “Bambae mi mi givim spel long yufala.” Hemia samting we yumi mas mekem. Yumi mekem olsem taem yumi talemaot ol gudfala promes long Tok blong God. Taem yumi lesingud long narafala, yumi soem se yumi gat intres mo yumi tingbaot narafala. Mo samting ya i impoten tumas blong mekemgud wok ya blong talemaot gud nyus blong Kingdom. Olsemia nao, yumi givhan long ol narafala blong luksave se Kingdom ya nomo i save stretem ol problem blong ol man.—Mat. 24:14.
4 Wok blong yumi i no blong mekem olsem dokta long ol sikman. Be hem i wok we aposol Pol i eksplenem long Fas Timote 4:6. Hem i wan minista wok we i stanap long ol ‘gudfala tingting,’ ol tijing we oli stap long Tok blong God. Olgeta we oli gat prapa trabol blong olgeta no oli gat trabol long saed blong filing, oli nidim we narafala i leftemap tingting blong olgeta blong trastem Jeova. Tijim olgeta blong ‘putum tingting blong olgeta long ol samting blong heven’—ol samting we oli joen wetem hop blong Kingdom. (Kol. 3:2) Taem oli putum tingting blong olgeta i stap long Tok blong God, oli save kam strong from bigfala paoa we hem i gat long laef blong olgeta.—Hib. 4:12.
5 Taswe, mak blong yumi i blong givhan long ol man blong putum tingting blong olgeta long ol fasin we oli ‘stret, oli klingud, oli mekem yumi haremgud mo we ol man oli stap ona long olgeta.’ (Fil. 4:8) Sipos oli putum tingting blong olgeta i stap long hop blong Kingdom nomo, oli save kasem sem blesing olsem yumi. Olgeta tu oli save kasem glad from save ya se bambae Jeova i stretem ol trabol blong olgeta tru long Kingdom blong hem.—Sam 145:16.