Soemaot We Yu Stap Gohed Moa
1 Tingtingbak long faswan taem we yu harem mesej blong Kingdom. Ol isi trutok oli wekemap tingting blong yu blong wantem kasem moa save. I no longtaem, yu luksave se yu mas jenisim fasin blong laef blong yu from we ol rod blong Jeova oli hae moa long ol rod blong yu. (Aes. 55:8, 9) Yu gohed gud, ale yu givim laef blong yu long Jeova mo tekem baptaes.
2 Afta we yu bin gohed gud long saed blong speret blong sam taem, yu gat sam slak fasin yet we yu mas winim. (Rom 12:2) Maet yu fraet long ol man, we i mekem se yu fraet blong go prij. No ating yu no stap soemaot olgeta frut blong tabu speret blong God. Be yu no bin lego—yu gat strong tingting blong gohed moa, ale yu putum ol tiokratik mak we yu wok blong kasem.
3 Maet yu bin givim laef blong yu long Jeova plante yia finis. Taem yu tingtingbak, ?yu luk se yu gohed moa? ?Yu yu kasem sam mak we yu bin putum? ?Yu yu stap wok strong olsem “fastaem”? (Hib. 3:14) Timote i wan bigman long saed blong Kristin fasin mo i bin folem ol fasin ya blong plante yia finis, taem Pol i talem long hem se: “Yu mas stap mekem ol wok ya. Yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed moa.”—1 Tim. 4:15.
4 Yumi Mas Jekem Yumi Wan: Taem yumi tingtingbak long laef blong yumi, ?yumi luk se yumi gat sam slak fasin yet we oli stap taem yumi jes kam long trutok? ?Yumi mestem sam mak we yumi bin putum? Sipos yes, ?from wanem i olsem? Nating se yumi wantem gohed moa, maet yumi gat tingting se yumi save mekem samting ya samtaem biaen. Ating yumi bin letem ol wari blong laef no trabol blong wol ya i blokem yumi.—Luk 17:28-30.
5 Yumi no save jenisim ol samting we oli hapen finis, be yumi save jenisim ol samting long fyuja. Yumi save jekemgud yumi long trufala fasin, luksave ol slak fasin blong yumi, nao rili traehad blong kamgud moa. Maet yumi mas traehad moa blong soemaot ol frut blong tabu speret blong God, olsem bos long tingting, kwaet fasin, mo longfala tingting. (Gal. 5:22, 23) Sipos i hadwok long yumi blong joengud wetem ol narafala no blong folem advaes blong ol elda, i impoten we yumi wokem fasin daon mo no tinghae tumas long yumi wan.—Fil. 2:2, 3.
6 ?Yumi save soem se yumi stap gohed moa from fasin blong traehad blong kasem wok long kongregesen? Sam brata, sipos oli traehad moa, maet oli save kam naf blong mekem wok blong man blong givhan no elda. Maet sam long yumi i save stat long wok blong fultaem paenia. Plante narafala, ating oli naf blong kam haftaem paenia. Mo sam narafala bakegen, maet oli wantem kamgud moa long fasin blong stadi wanwan, givim moa ansa long ol miting, mo karem moa frut long wok blong prij olsem ol pablisa long kongregesen.
7 I tru, i stap long yumi wanwan blong luksave wanem samting yumi mas wok long hem blong gohed moa. Yumi save sua se sipos yumi rili traehad blong “kam bigman long Kraes,” samting ya bambae i mekem glad blong yumi i kam bigwan moa, mo bambae i mekem we yumi givhan long kongregesen blong karem moa frut.—Hib. 6:1.