?Yu Yu Bisi Tumas?
1 Pol i givim advaes ya se ‘oltaem yufala i mas wok strong long ol wok blong Masta.’ (1 Kor. 15:58) Long program blong yumi, yumi wanwan i mas stadi Baebol evri dei, joen oltaem long wok blong prij, go long olgeta miting, mo traehad long ol wok we yumi mekem long kongregesen. Antap long ol samting ya, yumi mas givhan long ol narafala we oli nidim help. From we yumi gat plante samting blong mekem, samtaem yumi save harem se ol samting ya oli hevi tumas, mo yumi gat tingting se yumi mas faenem sam rod blong katemdaon ol wok we yumi stap mekem.
2 Samtaem i waes mo i stret blong livim sam wok no blong katemdaon wok blong yumi. Samfala oli harem se oli mas mekem evri samting we ol narafala oli askem long olgeta. Sipos yumi no skelemgud laef blong yumi, evri samting i save kam hevi tumas mo yumi wari tumas, mo biaen, yumi save harem nogud.
3 Skelemgud Laef Blong Yumi: Bigfala samting blong givhan long yumi blong skelemgud laef blong yumi, hemia advaes blong Pol blong ‘jusumaot ol samting we oli impoten moa.’ (Fil. 1:10) Hemia i min se yumi mas mekem ol wok we oli impoten moa, mo sipos i gat taem mo evri samting i stret, biaen yumi save lukaot long ol samting we oli no impoten tumas. Ol wok insaed long famle, hemia wan samting we i impoten. I tru se yumi mas mekem sam narafala wok tu we i no long saed blong speret. Be, Jisas i tijim yumi se fasin blong jusumaot ol samting we oli impoten, i mas stanap long rul ya we yumi putum ol samting long saed blong Kingdom long fasples. Fastaem, yumi mas mekem ol wok we oli fulumap promes blong yumi blong givim laef blong yumi i go long Jeova.—Mat. 5:3; 6:33.
4 Wetem tingting olsem, bambae yumi meksua se yumi tekemaot long bisi program blong yumi, ol prapa intres blong yumi we yumi no nidim, tumas pleplei, mo sam wok we yumi no nidim blong mekem blong ol narafala. Taem yumi mekem program blong yumi evri wik, bambae yumi makemaot taem blong mekem stadi wanwan, joen long wok blong prij, go long ol miting, mo mekem ol samting we oli joen wetem wosip blong yumi. Nao yumi save mekem ol narafala samting long taem we i stap, i dipen hamas ol samting ya oli givhan long yumi blong kasem bigfala mak blong yumi, hemia blong kam ol Kristin we oli skelemgud laef blong olgeta mo oli putum Kingdom i stap long fasples.
5 Nating se yumi mekem olgeta samting ya, maet yumi harem yet se evri samting i hevi tumas long yumi. Sipos i olsem, yumi nidim blong obei long tok blong Jisas we i singaot yumi se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala.” (Mat. 11:28) Mo tu, lukluk i go long Jeova, we “evri dei, hem i stap karem ol hevi samting blong yumi,” mo i stap givim paoa long hemia we i taed. Hem i promes se hem i no save letem wan stret man i foldaon. (Sam 55:22; 68:19; Aes. 40:29) Yumi save sua se bambae hem i ansarem prea blong yumi, blong mekem se yumi naf blong gohed long bisi laef blong yumi we i fulap long ol tiokratik wok.
6 Yumi save se bambae yumi gohed blong stap bisi long ol gudfala wok long saed blong Kingdom, mo yumi glad tumas se ol wok we yumi mekem blong Masta, i no blong nating nomo.—1 Kor. 15:58.