Storeyan Wetem Fasin Fren i Save Kasem Hat Blong Man
1 Storeyan i minim “fasin we samfala oli joen wanples blong talemaot tingting blong olgeta.” Sipos yumi stat storeyan long wan poen we narafala i wari long hem, samting ya i save halpem yumi blong kasem hat blong hem wetem mesej blong Kingdom. Ol ekspiryens oli soem se i moa gud blong storeyan long fasin we yumi frengud wetem ol man mo long isi fasin, i bitim we yumi jes talemaot wan mesej nomo.
2 ?Olsem Wanem Blong Stat Storeyan Long Fasin We Yumi Frengud Wetem Man?: Blong storeyangud wetem ol man, yumi no nidim blong talem plante, plante tingting mo vas. Yumi nidim nomo blong traem pulum narafala blong toktok wetem yumi. Eksampel, taem yumi storeyangud wetem hemia we i stap long haos kolosap long yumi, yumi no stap toktok long strong fasin, be long isi fasin nomo. Yumi no stap tingbaot nekiswan samting we bambae yumi talem, be yumi ansa long isi fasin long ol tingting we hem i stap talemaot. Sipos yumi soem se yumi rili intres long samting we hem i stap talem, bambae hem i gohed blong toktok wetem yumi. Samting ya i tru tu, taem yumi stap prij long ol narafala.
3 Blong statem ol gudfala storeyan, yumi save tokbaot ol poen olsem fasin blong brekem loa, ol problem blong ol yangfala, ol trabol long ples blong yu, ol trabol long wol, mo samtaem weta. Ol poen we oli stret long laef blong ol man oli gud tumas blong pulum intres blong olgeta. Taem yu gohed blong storeyan, yumi save pulum tingting blong man i go long mesej blong Kingdom.
4 Blong storeyan long isi fasin, i no min se yumi no nidim blong mekemrere fastaem. Yumi mas. Be, yumi no nid blong mekem wan stret plan blong evri toktok we bambae yumi talem, no lanem baehat. Olsem nao, bambae yumi save jenisim storeyan blong yumi blong joen wetem ol samting we man i talem, no ol samting we oli kamaot taem yumi stap storeyan. (Skelem wetem 1 Korin 9:20-23.) Wan nambawan rod blong mekemrere, i blong jusum wan no tu poen long Baebol, mo traem tingbaot ol fasin blong storeyan long tufala ya. I gud sipos yu lukluk ol poen we Reasoning buk i tokbaot.
5 Ol Fasin We Yumi Nidim Blong Storeyangud: Taem yumi storeyan wetem ol narafala, yumi mas soem kaen fasin mo trufala intres. Yumi save soemaot ol fasin ya taem yumi smael mo yumi hapi. Yumi gat beswan mesej long wol blong seremaot. Ol man we hat blong olgeta i gud oli wantem mesej ya tumas. Sipos oli luk se yumi intres long olgeta mo yumi rili wantem serem gud nyus wetem olgeta, ale samting ya i save pulum olgeta blong lesin.—2 Kor. 2:17.
6 Yumi mas haremgud blong storeyan wetem narafala. Taswe, yumi mas toktok long kaen mo waes fasin taem yumi stap talemaot mesej blong Kingdom. (Gal. 5:22; Kol. 4:6) Traehad blong livim man wetem wan gudfala tingting long saed blong ol Wetnes blong Jeova. Sipos yumi mekem olsem, nating se fastaem yumi no kasem hat blong man, maet nekis taem wan Wetnes i storeyan wetem hem, bambae hem i lesin.
7 Wan gudfala storeyan i no kamaot jes from we yumi lanem baehat plante toktok long ol dip save blong Baebol. Yumi mas wekemap intres blong ol man long wan samting we oli wari long hem. Sipos yumi reregud fastaem, bambae yumi save pulum ol man blong storeyangud wetem yumi. Yumi mas traehad blong kasem hat blong olgeta we yumi mitim olgeta, taem yumi stap seremaot beswan nyus we yumi save givimaot, hemia nyus blong ol blesing blong Kingdom we oli no save finis.—2 Pita 3:13.