?Olsem Wanem Blong Yusum Buk Ya Save Blong Mekem Disaepol?
1 Wan gudfala mak we ol Kristin oli wantem kasem, i blong tijim trutok long ol narafala mo mekem disaepol blong olgeta we oli ‘stret blong kasem laef we i no save finis.’ (Wok 13:48; Mat. 28:19, 20) Ogenaesesen blong Jeova i givim wan nambawan tul blong halpem yumi blong mekem samting ya—buk ya Save Blong Lidim Yu Long Laef We i No Save Finis. Nem blong hem i makem long tingting blong yumi se i impoten tumas blong mekem ol Baebol stadi wetem ol man, from we laef we i no save finis i dipen long fasin blong olgeta blong kasem save long saed blong Jeova, we hem wan nomo i trufala God, mo save long saed blong Pikinini blong hem, Jisas Kraes.—Jon 17:3.
2 Buk ya Save i stap naoia olsem nambawan buk we Sosaeti i prentem blong yusum long ol Baebol stadi. Wetem buk ya, yumi save tijim trutok long ol man long fasin we i isi, i klia, mo i kwik. Samting ya bambae i givhan blong kasem hat blong olgeta we yumi stap tijim olgeta. (Luk 24:32) Be i tru tu se, hemia we i lidim stadi i mas yusum ol gudfala fasin blong tij. From samting ya, mifala i mekemrere atikol ya blong givim advaes mo blong tokbaot bakegen sam rod blong tij we oli wokgud finis. Wetem fasin luksave, mo sipos yu tingbaot ol samting long laef blong wanwan man, maet yu save yusum sam no olgeta advaes ya we i stap. Putum pepa ya i stapgud samples, mo ridim bakegen plante taem. I gat defren poen long hem we maet oli givhan long yu blong kamgud moa long fasin blong yusum buk ya Save blong mekem disaepol.
3 Lidim Baebol Stadi Long Fasin We i Gohedgud: Rili intres long ol studen wanwan, olsem we bambae oli kam ol Kristin disaepol mo brata no sista blong yumi long saed blong speret. Soem kaen fasin, frengud wetem olgeta mo toktok wetem glad. Lesingud, olsem nao, bambae yu kasem save gud long studen ya—fasin we hem i gruap long hem mo laef blong hem. Samting ya bambae i halpem yu blong luksave beswan rod blong givhan long hem long saed blong speret. Yu mas wantem blong givim taem mo paoa blong yu blong halpem studen ya.—1 Tes. 2:8.
4 Taem yu statem stadi finis, i moa gud sipos yu gohed long Save buk folem stret oda blong ol japta. Samting ya bambae i mekem se studen i save gohed sloslou blong kasem save long trutok, from we buk ya i tokbaot ol save blong Baebol folem wan stret oda we i isi blong folem. Traem mekem se stadi i no dip tumas mo i pulum intres blong man, olsem nao stadi i gat laef long hem mo i gohed gud. (Rom 12:11) Sipos ol samting long laef blong studen i gud mo hem i kasem save kwik, maet yufala i save finisim wan japta long wan stadi blong wan haoa, we yufala i no nidim blong hareap tumas. Ol studen oli gohed moa gud taem tija mo studen tugeta oli mekem sua se oli stap evri wik blong mekem stadi. Taswe, wetem bighaf blong ol man, maet yumi save finisim ol 19 japta blong buk ya samwe long sikis manis no smol moa nomo.
5 Statem evri stadi wetem sam sot toktok we i pulum studen blong intres long ol save we bambae hem i kasem. Bambae yu luk we nem blong evri japta i stampa poen insaed long japta ya, mo yumi mas makemgud poen ya long tingting blong studen. Ol smol stampa tok long japta oli soem ol bigfala poen, mo oli givhan long yu blong makemgud stampa poen blong japta. Lukaotgud se yu no toktok tumas. I moagud blong traem pulum studen blong talemaot tingting blong hem. Askem ol kwestin we oli lidim tingting blong studen. Askem kwestin long ol save we hem i gat finis, blong givhan long hem blong tingtinggud mo kasem stret ansa. (Mat. 17:24-26; Luk 10:25-37; lukluk School Guidebook, pej 51, haf 10.) Folemgud ol poen we oli stap finis long Save buk. Sipos yu talem tumas narafala poen, yu save kavremap ol bigfala poen mo pulum studen blong tingbaot samting we i no stap insaed long stadi, mo tu, i save mekem stadi i kam longfala tumas. (Jon 16:12) Sipos hem i askem wan kwestin we i no joen wetem stadi, plante taem yu save tokbaot long en blong stadi. Olsem nao, yu save finisim wan japta evri wik we i no gat samting i blokem. Eksplenem long studen se, bighaf blong ol kwestin blong hem, bambae oli kasem ansa long ol japta biaen.—Lukluk School Guidebook, pej 94, haf 14.
6 Sipos studen i bilif strong long Triniti, sol i no save ded, helfaea, no sam narafala gyaman tijing, mo sipos ol poen long buk ya Save oli no naf blong mekem hem i kasem save, yu save givim Reasoning buk no wan narafala buk long hem we i tokbaot tijing ya. Talem long hem blong ridim, mo se bambae yu tokbaot poen ya wetem hem afta we hem i tingting dip long ol samting we hem i ridim.
7 Statem mo finisim stadi wetem prea blong askem Jeova blong lidim mo blesem stadi. Samting ya i save mekem hem i tinghevi long stadi ya, i mekem se hem i gat respek, mo i pulum hem blong luksave se Jeova nao i stap tijim hem. (Jon 6:45) Sipos studen i stap smok yet, maet yu mas askem long hem blong no smok taem yufala i stap mekem stadi.—Wok 24:16; Jem. 4:3.
8 Yusum Ol Vas, Pijatok, mo Kwestin Blong Tingtingbak, Blong Tijimgud Man: Nating se tija i bin stadi hamas taem long ol save ya, oltaem wan gudfala tija i mekemrere stadi fastaem, mo i tingbaot olsem wanem stadi i stret long wanwan studen blong hem. Samting ya i givhan blong tingbaot sam kwestin we maet studen ya i save askem. Blong tijimgud, yu mas kasem klia ol bigfala poen long japta. Jekem ol vas blong luk olsem wanem oli joen wetem ol save ya, mo jusum sam blong ridim long stadi. Tingbaot olsem wanem yu save yusum ol pija, pijatok, mo ol kwestin long en blong japta, blong tijim man.
9 Sipos yu yusumgud ol vas, bambae yu halpem studen blong luksave se hem i rili stap stadi long Baebol. (Wok 17:11) Yusum bokis long pej 14 blong Save buk, “Yusumgud Baebol Blong Yu,” blong tijim hem blong faenem ol vas. Soem long hem olsem wanem blong luksave ol vas we oli raetem fulwan insaed long buk. Sipos i gat taem, faenem mo ridim ol vas we oli stap be we oli no raetem olgeta fulwan. Askem long studen blong talem olsem wanem ol vas ya oli sapotem mo mekem i klia ol poen long paragraf. Makemgud ol impoten haf blong ol vas, blong mekem se hem i kasem save long ol risen blong ol bigfala poen long stadi. (Neh. 8:8) Kolosap oltaem, tija i no nidim blong ademap sam moa vas bitim olgeta we oli stap finis long buk. Tokbaot from wanem i impoten blong save nem mo oda blong ol buk long Baebol. Maet i givhan long studen sipos hem i ridim Wajtaoa blong Jun 15, 1991, pej 27-30. Taem yu luk se i stret, pulum hem blong yusum New World Translation. Sloslou, yu save soem long hem olsem wanem blong yusum ol gudfala samting insaed long Baebol ya, olsem ol refrens long medel blong pej mo indeks long ol wod blong Baebol.
10 Stadi 34 long Theocratic Ministry School Guidebook i eksplenem se ol pijatok oli pulum tingting blong man, mo mekem i isi moa blong hem i kasem ol nyufala poen. Oli gat paoa long tingting mo filing, taswe oli save mekem se mesej i gat moa paoa bitim olgeta trutok we yumi save talem. (Mat. 13:34) Buk ya Save i gat plante pijatok blong tijim man, we oli isi be oli gat paoa. Eksampel, wan pijatok long japta 17 i givhan long studen blong luksave olsem wanem Jeova i stap givim kakae, klos, mo haos long saed blong speret tru long Kristin kongregesen. Yumi save yusum ol nambawan pija long buk ya Save blong kasem filing blong ol studen. Haf 18, aninit long stampa tok ya long pej 185, “Glad Blong Luk Ol Man We Oli Laef Bakegen,” bambae i gat moa paoa long studen sipos hem i luklukbak long pija long pej 86. Samting ya i save pulum hem blong tingbaot laef bakegen olsem wan trufala samting we bambae i kamaot aninit long Kingdom blong God.
11 Long evri stadi, ol Baebol studen oli mas gohed moa long saed blong speret. From samting ya, yu no mas fogetem blong askem ol kwestin long bokis long en blong evri japta, “Jekem Save Blong Yu.” Lesingud, be i no blong harem nomo ol save we hem i kasem long hed blong hem tru long stadi. Plante long ol kwestin ya oli blong pulum studen blong talemaot samting we i stap long hat blong hem. Wan eksampel, long pej 31, kwestin we i go long studen se: “?Wanem ol fasin blong Jeova God we yu yu laekem tumas?”—2 Kor. 13:5.
12 Trenem Ol Studen Blong Mekemrere Stadi: Wan studen we i ridim stadi fastaem, mo i makem ol ansa, mo i tingbaot olsem wanem blong talem ansa long prapa toktok blong hem, bambae hem i gohed kwik moa long saed blong speret. From eksampel blong yu mo ol tok we yu talem blong leftemap tingting blong hem, yu save trenem hem blong reregud from stadi blong hem. Soem buk blong yu long hem, mo soem olsem wanem yu bin putum laen aninit long ol impoten toktok. Eksplenem olsem wanem blong faenem ol stret ansa long ol kwestin. Maet i givhan long studen sipos yu mekemrere wan japta wetem hem. Pulum hem blong yusum ol prapa tok blong hem blong talemaot tingting blong hem. Long taem ya nomo, bambae yu luksave sipos hem i stap kasem save long ol poen. Sipos hem i ridim ansa stret long buk nomo, traem pulum hem blong tingting, Blong mekem olsem, askem long hem olsem wanem bambae hem i eksplenem poen ya long wan narafala man.
13 Pulum studen blong jekem ol vas we oli no raetem fulwan long buk, taem hem i mekemrere buk blong hem evri wik, from we maet i no gat taem blong ridim olgeta vas taem yufala i stap stadi. Talem sam gudfala toktok blong presem hem from fasin traehad blong hem long stadi. (2 Pita 1:5; lukluk Wajtaoa blong Ogis 15, 1993, pej 13 mo 14, blong luk sam moa samting we tija mo studen tufala i save mekem blong lanem moa long Baebol stadi.) Long rod ya, studen i stap kasem trening blong mekemrere mo givim ol gudfala ansa long ol miting blong kongregesen. Hem i stap lanem ol gudfala fasin blong stadi hem wan, we bambae i givhan long hem blong gohed moa long trutok afta we Baebol stadi we yu yu mekem wetem hem long buk ya Save i finis.—1 Tim. 4:15; 1 Pita 2:2.
14 Lidim Ol Studen Oli Go Long Ogenaesesen Blong Jeova: Hem i wok blong man we i mekem disaepol blong lidim studen i go long ogenaesesen blong Jeova. Studen bambae i gohed moa kwik blong kam wan bigman long saed blong speret taem hem i luksave mo i gat tangkyu from ogenaesesen ya, mo taem hem i luksave se hem i mas joen long hem. Yumi wantem se hem i glad blong joen wetem ol man blong God mo hem i wantem kam long Haos Kingdom, ples we Kristin kongregesen i save sapotem hem long saed blong speret mo filing.—1 Tim. 3:15.
15 Oli wokem buklet ya Ol Wetnes Blong Jeova—Oli Joengud Blong Mekem Wok Blong God Long Olgeta Ples Blong Wol, blong halpem ol man blong savegud ogenaesesen ya we Jeova i stap yusum tede long wol blong mekem wok blong hem. Taem stadi i stap gohed gud, traem givim buklet ya long hem. Taem yu jes stat blong stadi wetem wan man, singaot hem i go long miting, mo gohed blong askem hem. Eksplenem long hem wanem i stap hapen long ol miting. Yu save talem long hem nem blong wan pablik tok we bambae i kamaot, no soem wan haf blong Wajtaoa we bambae yumi stadi long hem long miting. Maet yu save karem hem i go luk Haos Kingdom taem i no gat wan miting i stap gohed. Olsem nao, bambae hem i no fraet blong go long wan nyufala ples we hem i no save long hem. Maet yu save talem long hem se bambae yu karem hem i go long miting long trak blong yu. Taem hem i go long miting, mekem se hem i haremgud mo i no fraet. (Mat. 7:12) Tekem hem blong sekhan long ol narafala Wetnes, wetem ol elda tu. Yumi hop se bambae hem i tingbaot kongregesen olsem famle blong hem long saed blong speret. (Mat. 12:49, 50; Mak 10:29, 30) Maet yu putum wan mak we hem i mas traem kasem, olsem kam long wan miting evri wik, mo afta we hem i kasem mak ya, putum wan moa we hem i save kasem.—Hib. 10:24, 25.
16 Taem yufala i gohed blong stadi long buk ya Save, tokbaot gud ol haf we oli makem nid blong joen oltaem long ol miting blong kongregesen. Yu save mekem samting ya long pej 52, 115, 137-139, 159, mo japta 17. Talemaot prapa filing blong yu long saed blong tangkyu we yu gat from ogenaesesen blong Jeova. (Mat. 24:45-47) Toktokgud long saed blong lokol kongregesen mo ol samting we yu yu lanem long ol miting. (Sam 84:10; 133:1-3) I gud sipos studen i save lukluk olgeta video blong Sosaeti, olsem Jehovah’s Witnesses—The Organization Behind the Name. Blong faenem sam moa rod blong pulum studen i go long ogenaesesen, lukluk Wajtaoa blong Novemba 1, 1984 pej 14-18, (Maj 1, 1985 pej 22-26 long Franis) mo pej insaed long Kingdom Wok Blong Yumi, Epril 1993.
17 Pulum Ol Studen Blong Prij Long Ol Narafala: Risen from wanem yumi stadi wetem ol man i blong mekem ol nyufala disaepol we bambae oli givim wetnes long saed blong Jeova. (Aes. 43:10-12) Hemia i min se tija i mas pulum studen blong toktok wetem ol narafala long saed blong ol samting we hem i stap lanem long Baebol. Hem i save mekem olsem wetem wan isi kwestin nomo: “?Olsem wanem bambae yu eksplenem poen ya long famle blong yu?” no “?Bambae yu yusum wanem vas blong pruvum poen ya long wan fren?” Tokbaot gud ol haf blong Save buk we oli makem wok blong prij, olsem pej 22, 93-95, 105-106, mo japta 18. Taem samting ya i stret, maet yumi save givim sam traket long hem blong yusum, taem hem i tekem jans blong prij long ol narafala. Talem long hem blong askem ol memba blong famle blong hem sipos oli wantem joen long stadi. ?Hem i gat sam fren we oli glad blong stadi tu? Askem nem blong olgeta we oli intres.
18 Sipos studen ya we yumi hop se bambae i kam wan disaepol, i go long Tiokratik Skul mo Miting Blong Kingdom Wok, hem i save kasem moa trening mo help we i pusum hem blong kam wan pablisa blong gud nyus. Taem hem i talem se hem i wantem joen long Tiokratik Skul no kam wan pablisa we i no baptaes, hem i mas kasem ol mak we pej 98 mo 99 blong Minista Wok buk i tokbaot. Sipos wan samting long laef blong hem i no stret yet, yu save lukluk long ol buk blong Sosaeti blong faenem ol save long poen ya, mo serem save ya wetem hem. Eksampel, maet wan studen i stap faenem i hadwok tumas blong lego tabak no wan narafala drag. Reasoning buk i givim ol strong risen we oli stanap long Baebol, from wanem ol Kristin oli mas ronwe long ol fasin ya we oli save spolem hem. Mo pej 112 i tokbaot wan rod we i bin givhan long plante blong lego ol fasin ya. Prea wetem hem long saed ya, samting ya bambae i tijim hem blong dipen long Jeova blong givhan long hem.—Jem. 4:8.
19 Rod we yumi mas folem blong luksave sipos hem i naf blong joen long wok blong prij, i stap long Wajtaoa blong Janewari 15, 1996, pej 16, haf 6. Taem studen i naf, i gud blong mekem sam pleplei wetem hem blong givhan long hem blong rere blong go long wok blong prij blong fastaem. Long fasin we i no daonem tingting blong hem, tokbaot ol poen we ol man long ples blong yu oli stanemap, mo ol toktok we oli yusum blong traem blokem yumi. Sipos i gat rod, i gud blong tekem hem fastaem i go long wok blong prij long evri haos wanwan, mo afta, gohed blong trenem hem long ol narafala haf blong minista wok. Sipos yu mekem storeyan blong yu long ol haos i sot mo i isi, bambae hem i no faenem i had tumas blong mekem sem mak. Toktokgud long saed blong wok blong prij mo leftemap tingting blong hem. Soem se yu glad blong prij, mo hem tu bambae i kasem mo soemaot sem tingting ya. (Wok 18:25) Ol nyufala disaepol oli mas wantem blong kam ol pablisa blong gud nyus we oli prij oltaem mo wok strong. Maet yu save givhan long hem blong wokem wan gudfala program blong prij. Blong hem i save kamgud moa long fasin blong hem blong prij long ol narafala, maet yu save talem long hem blong ridim Wajtaoa blong Ogis (Novemba) 15, 1984 pej 15-25; Julae 15, 1988, pej 9-20; Janewari 15, 1991, pej 15-20; mo Janewari 1, 1994, pej 20-25.
20 Pulum Ol Studen Blong Wantem Givim Laef Long Jeova mo Baptaes: Sipos hat blong wan studen i stret, ating hem i save lanem naf long buk ya Save, blong givim laef blong hem i go long God mo tekem baptaes. (Skelem wetem Wok 8:27-39; 16:25-34.) Be, bifo we wan man i wantem givim laef blong hem long Jeova, hem i mas wokem fasin blong onagud long Hem. (Sam 73:25-28) Taem yu stap mekem stadi wetem hem, lukaot ol jans blong halpem hem blong gat fasin tangkyu from ol gudfala fasin blong Jeova. Tokbaot ol dip filing blong yu long saed blong God. Halpem hem blong rili laekem mo frengud wetem Jeova. Sipos hem i rili save God mo laekem hem, bambae hem i stap tru long Hem olwe, from we fasin blong fasgud long God i joen wetem filing we yumi gat long Jeova from ol gudfala fasin blong hem.—1 Tim. 4:7, 8; lukluk School Guidebook, pej 76, haf 11.
21 Traehad blong kasem hat blong studen. (Sam 119:11; Wok 16:14; Rom 10:10) Hem i mas luksave olsem wanem trutok i joen wetem laef blong hem, mo mekem disisen olsem wanem bambae hem i yusum ol trutok we hem i stap lanem. (Rom 12:2) ?Hem i rili bilif long trutok we hem i stap lanem evri wik? (1 Tes. 2:13) Blong halpem hem, yu save askem kwestin blong faenemaot tingting blong hem, ol kwestin olsem: ?Wanem tingting blong yu long poen ya? ?Olsem wanem yu save wokem samting ya long laef blong yu? From ol ansa blong hem, yu save luk wanem we yu nidim blong mekem blong kasem hat blong hem moa. (Luk 8:15; lukluk School Guidebook, pej 52, haf 11.) Ol tok kolosap long pija long pej 172 mo 174 long buk ya Save, oli askem se: “?Yu yu prea long God finis blong givim laef blong yu i go long hem?” mo “?I gat wan samting i stap blokem yu yet blong yu no save baptaes?” Maet ol kwestin olsem oli naf blong pusum studen ya blong tekem aksin.
22 Rod blong folem taem wan pablisa we i no baptaes i wantem tekem baptaes, i stap long Wajtaoa blong Janewari 15, 1996, pej 17, haf 9. Oli wokem buk ya Save blong mekem ol man oli naf blong ansa long “Ol Kwestin Blong Olgeta We Oli Wantem Tekem Baptaes,” we oli stap long pej 171 blong Minista Wok buk. Ol elda bambae oli askem ol kwestin ya long olgeta. Sipos yu bin tokbaot gud ol ansa long ol kwestin long buk ya Save, bambae studen i nafgud blong ansa long ol kwestin ya we ol elda oli askem bifo we oli baptaes.
23 Givhan Afta We Oli Stadi Long Fulwan Buk: I klia se sipos wan man i stadi gogo i finisim fulwan Save buk, hem i mas soem sipos hem i rili wantem long hat blong hem blong mekem wok blong God. (Mat. 13:23) Hemia nao from wanem laswan smol stampa tok blong buk ya i askem se: “?Bambae Yu Yu Mekem Wanem?” Ol laswan paragraf oli askem strong long studen blong tingbaot fasin fren we ating hem i stat wokem finis wetem God, nid blong wokem save ya long laef blong hem wan, mo nid blong tekem aksin kwiktaem blong soemaot lav long Jeova. I no gat wan plan se bambae yumi stadi sam narafala buk bakegen wetem olgeta we oli stadi finis long fulwan buk ya Save. Sipos studen i no mekem wan samting blong folem ol save blong God, eksplenem long kaen mo klia fasin, wanem we hem i mas mekem blong gohed long saed blong speret. Yu save go visitim hem sam samtaem. Samting ya bambae i livim rod i stap open, blong hem i save mekem ol samting we hem i mas mekem blong kasem laef we i no save finis.—Ekles. 12:13.
24 Wan nyufala disaepol we i kasem trutok mo i tekem baptaes, i mas gohed moa yet blong kasem save mo dip mining blong save ya. Olsem nao, bilif blong hem i save kam strong gud. (Kol. 2:6, 7) Yu no nid blong gohed blong mekem Baebol stadi wetem hem afta we yufala i stadi finis long fulwan Save buk, be yu save givim taem blong yu blong halpem hem long sam rod we hem i nidim, blong hem i kam bigman long saed blong speret. (Gal. 6:10; Hib. 6:1) Hem tu, hem i save gohed moa sipos hem i ridim Baebol evri dei, stadi long Wajtaoa mo ol narafala buk blong ‘slef we i stret,’ mekemrere ol miting mo joen long olgeta, mo tokbaot trutok wetem ol narafala brata mo sista long kongregesen. (Mat. 24:45-47; Sam 1:2; Wok 2:41, 42; Kol. 1:9, 10) Sipos hem i ridim Minista Wok buk mo folem ol samting we hem i talem, bambae samting ya i givhan long hem bigwan blong folem ol tiokratik rod blong mekemgud minista wok blong hem.—2 Tim. 2:2; 4:5.
25 Kasem Gudhan Blong Tij: Yumi kasem oda blong ‘mekem disaepol blong olgeta man, mo tijim olgeta.’ (Mat. 28:19, 20) Fasin blong tijimgud i joen wetem wok blong mekem disaepol, taswe yumi mas traehad blong kamgud moa long wok blong tij. (1 Tim. 4:16; 2 Tim. 4:2) Blong luk sam moa advaes olsem wanem blong kasem gudhan blong tij, yu save ridim: School Guidebook, stadi 10 mo 15, “Kasem Gudhan Blong Tij” mo “Kasem Hat Blong Ol Man We Oli Lesin Long Yu”; Insight, Buk 2, “Tija, Fasin blong Tij”; Wajtaoa Ogis 1, 1984 (Engglis), “Yusum Ol Samting We Faea i No Save Bonem Blong Mekem Ol Disaepol” mo “Taem Yu Tij, Traem Kasem Hat Blong Man”; Wajtaoa Maj 1, 1986, “?Yu Yu Yusum Baebol Blong Mekem Man i Tingting?”; mo Wajtaoa Febuwari 15, 1996, “?Olsem Wanem Blong Faenem Glad Long Wok Blong Mekem Disaepol?”
26 Taem yu stap traehad blong mekem disaepol wetem buk ya Save, oltaem yu mas prea long Jeova, we ‘hem nomo i stap mekem i gru.’ Askem hem blong blesem fasin traehad blong yu blong kasem hat blong ol man wetem gud nyus blong Kingdom. (1 Kor. 3:5-7) !Bambae yu kasem bigfala glad taem yu tijim ol narafala blong kasem save, gat tangkyu mo tekem aksin folem save ya we i lidim man blong kasem laef blong olwe!