I Nidim Plante Moa Brata Blong Joen Long Wok Blong Paenia
1 Pol i talem long yumi blong ‘wok strong oltaem long wok blong Masta.’ (1 Kor. 15:58) Blong mekem olsem, plante oli joen long wok ya blong paenia. !Stat long Septemba las yia, 13 oli joen long wok blong paenia long trifala kantri aninit long branj-ofis blong yumi!
2 Bighaf blong olgeta we oli paenia, oli ol sista. (Sam 68:11) !Bambae kongregesen i kasem bigfala glad sipos plante moa brata oli save joen long wok blong fultaem paenia! (Sam 110:3) I tru se plante brata oli gat impoten wok blong mekem blong lukaot long famle blong olgeta, mo blong sapotem olgeta. Samfala oli wok strong tu blong lukaot long kongregesen long saed blong speret. Yumi talem bigfala tangkyu long ol man ya we oli stap hadwok blong leftemap Kingdom.—1 Tim. 4:10.
3 Nating se i olsem, ?i gat sam moa brata we oli save joen long wok blong paenia? Sipos waef blong yu i stap paenia, ?yu yu save joen wetem hem? Sipos yu no moa wok from yu olfala, ?yu yu agri se i i moagud blong spenem taem blong yu long wok blong prij fultaem, bitim we yu mekem wan narafala samting? Sipos yu rere blong finis long skul, ?yu yu tingting dip mo prea long saed blong jans blong joen long wok blong paenia, olsem wan rod blong kasem moa blesing, maet blesing blong prij long ples we i gat moa nid long teritori we branj i lukaot long hem?—Efes. 5:15-17.
4 Wan brata i salem gudfala bisnes blong hem mo i faenem haftaem wok blong mekem se hem i save paenia. From gudfala eksampel ya, tri long fofala pikinini blong hem oli kam paenia taem oli finis long skul. Namba fo i rere blong joen wetem olgeta tu. Brata ya mo famle blong hem oli kasem plante blesing.
5 Wan Bigfala Doa i Open: Wok blong paenia i save openem ‘wan bigfala doa blong mekem gudfala wok.’ (1 Kor. 16:9) Ol brata we oli paenia, oli save kasem plante wok insaed long kongregesen. Taem oli wok strong long wok blong prij, samting ya i mekem olgeta oli kam strong long saed blong speret mo oli gohed kwik long ol tiokratik wok. Wok blong paenia i save openem doa blong kasem ol narafala blesing blong wok tu. Hem i save lidim man blong kam wan spesel paenia no blong wok long Betel. Afta we wan man i paenia blong wan yia, hem i save go long Paenia Skul. Ol man blong givhan mo ol elda we oli no mared, oli save putum mak blong go long Ministeriol Trening Skul. Ol hasban mo waef we oli naf, oli save fulumap pepa blong go long skul blong Gilead. Maet sam brata oli save kam naf blong mekem wok blong seket elda. Yes, wok blong paenia i openem doa long ol bigfala blesing ya blong wok insaed long ogenaesesen blong Jeova.
6 Ol brata we oli save jenisim sam samting long laef blong olgeta blong joen long wok blong fultaem paenia, oli save kasem moa glad we i kam from we oli givim moa.—Wok 20:35.