Ansa Long Wan Kwestin

◼ ?Taem wan brata mo wan sista i prij tugeta, tufala i mas lukaot long wanem samting?

Yumi gat strong tingting se ol brata mo sista blong yumi oli wantem folem ol rul we oli hae olgeta long saed blong ol fasin blong olgeta. Be, wol ya we yumi stap long hem i doti mo i agri long enikaen fasin nomo, mo ol man oli no folem ol rul long saed blong gudfala fasin. Nating se yumi wantem mekem i stret, yumi mas lukaot oltaem blong no sakem doti long nem blong Jeova, mo blong no joen long fasin we i no stret. Samting ya i minim se yumi mas lukaotgud taem yumi stap prij tu.

Plante taem long wok blong prij, ol sista oli mitim ol man mo ol brata oli mitim ol woman, mo i luk olsem se oli rili intres long trutok. Sipos yumi stap prij yumi wan mo i no gat sam narafala oli stap long haos, i moagud blong stanap long doa bitim we yumi go insaed. Sipos man no woman ya i soem intres, yumi save mekem plan blong gobak wetem wan narafala pablisa, no long taem we ol narafala man oli stap long haos. Sipos i no gat rod blong mekem olsem, i waes blong givim visit ya long wan brata sipos visit i wan man, no long wan sista sipos visit i wan woman. Samting ya i tru tu long saed blong ol stadi we sista i statem wetem man no brata i statem wetem woman.​—Mat. 10:16.

Yumi mas lukaotgud taem yumi jusum wan blong go prij wetem yumi. I tru se sam samtaem ol brata oli save wok wetem ol sista, be i moagud sipos oli mekem long wan grup. Nating se oli stap prij, i no waes we wan man mo woman i spenem plante taem tugeta, tufala nomo, sipos tufala i no mared. Taswe, brata we i lukaot long grup i mas yusum fasin luksave taem hem i putum ol pablisa tugeta blong prij, hemia ol yangfala tu.

Sipos yumi jusumaot rod we i stret oltaem, bambae ‘yumi no mekem sam fasin we narafala i save foldaon long hem,’ mo we yumi save foldaon long hem tu.​—2 Kor. 6:⁠3.