“?I Save Gat Wan Taem We Olgeta Man Bambae Oli Laeklaekem Olgeta?”
1 Wan nambawan mesej we i leftemap tingting blong ol man mo mekem oli haremgud, bambae i goaot long 169 lanwis long olgeta ples blong wol. ?Wanem ya mesej ya? ?Mo olsem wanem bambae ol man oli kasem?
2 Mesej ya i long saed blong fasin blong laekem ol man raonabaot long yumi. Hem i stap insaed long Kingdom Nyus Namba 35, we nem blong hem se “?I Save Gat Wan Taem We Olgeta Man Bambae Oli Laeklaekem Olgeta?” Kingdom Nyus ya i sot nomo, mo i tokbaot ol samting we i stap kamaot long wol ya. Hem i soem se stampa blong plante trabol we i mekem man i harem nogud mo hat blong hem i soa, hemia se ol man oli no laeklaekem olgeta. Hem i eksplenem from wanem ol man oli no moa laekem ol narafala raonabaot long olgeta, antap moa long taem blong yumi. Mo tu, hem i talem wanem bambae i kamaot long fyuja from samting ya.
3 Mo tu, Kingdom Nyus Namba 35 i soem se i gat plante milyan man long wol tede we oli gat trufala lav long ol man raonabaot long olgeta. Hem i makemaot olgeta we oli stap stanemap bakegen fasin we Kraes i bin folem—hemia fasin blong wosip long faswan handred yia. Lav blong ol man raonabaot long yumi we Jisas i tijim ol man long hem, i mak blong trufala wosip ya.—Luk 10:25-37.
4 Lastok blong Kingdom Nyus Namba 35 i eksplenem se i no longtaem, bambae olgeta man long wol oli laekem ol man raonabaot long olgeta, taem Kingdom blong God we Kraes i king blong hem bambae i rul. Traket ya i pulum olgeta man blong kasem buklet ya ?Wanem Samting We God i Wantem Yumi Blong Mekem? blong kasem save olsem wanem oli save joen long plan ya we i stanap long lav, mo we Tok blong God i eksplenem fulwan.
5 ?Hu Bambae i Givimaot Mesej Ya? Long manis Oktoba mo Novemba, ol Wetnes blong Jeova long olgeta ples blong wol bambae oli givimaot mesej ya long saed blong fasin blong laekem ol man raonabaot long yumi, i go long olgeta fren, famle, mo ol man raonabaot long olgeta. Mifala i leftemap tingting blong olgeta evriwan we oli kasem mak finis we oli naf blong prij, blong oli joen long wok ya blong seremaot Kingdom Nyus Namba 35.
6 Bigfala mak blong wok ya i blong pulum ol man blong wantem mekem wan Baebol stadi long buklet ya, Samting We God i Wantem no long Save buk. Mo tu, sipos olgeta man blong Jeova oli mekem wok ya wetem fulhat blong olgeta, bambae yumi givim wan bigfala wetnes long saed blong God ya blong lav, Jeova, mo Pikinini blong hem, Jisas Kraes.