Ol Wetnes Blong Jeova—Ol Trufala Man Blong Talemaot Gud Nyus
1 Jisas Kraes i givim wok ya blong talemaot gud nyus i go long olgeta disaepol blong hem. Hem i talem klia long olgeta se oli mas prij long saed blong gud nyus blong Kingdom. (Mat. 24:14; Wok 10:42) Ol faswan disaepol blong hem oli soemaot rod long saed ya, taem oli talemaot Kingdom long evri ples we oli faenem man, mo long olgeta haos wanwan, i no long ol haos wosip blong olgeta nomo. (Wok 5:42; 20:20) !Tede, ol Wetnes blong Jeova oli pruvum se oli ol trufala Kristin man blong talemaot gud nyus, from we oli stap prij long saed blong Kingdom long 232 kantri, mo oli baptaesem bitim wan milyan disaepol long ol tri yia we oli pas! ?From wanem wok blong yumi blong talemaot gud nyus i karem bigfala frut olsem?
2 Gud Nyus Ya i Mekem Yumi Glad Tumas: Ol man blong talemaot gud nyus, oli man blong prij, no man blong karem mesej blong gud nyus. Taswe, yumi gat wan blesing we i givim bigfala glad long yumi, taem yumi talemaot Kingdom blong Jeova. Hemia nomo i rili gud nyus long olgeta man we oli stap harem nogud. Yumi hapi tumas long save ya we yumi kasem finis long saed blong nyufala heven we bambae i rul wetem stret fasin, mo nyufala wol no Paradaes we bambae i fulap long ol man blong bilif. (2 Pita 3:13, 17) Yumi nomo i bilif fulwan long hop ya, mo yumi wantem tumas blong talemaot hop ya long ol narafala man.
3 Trufala Lav i Pusum Yumi: Wok blong talemaot gud nyus i wan wok blong sevem laef blong ol man. (Rom 1:16) Hemia nao from wanem yumi kasem bigfala glad taem yumi talemaot mesej blong Kingdom. From we yumi trufala man blong talemaot gud nyus, ale, yumi laekem ol man, mo fasin ya i pusum yumi blong talemaot gud nyus long olgeta. Yumi talemaot long ol famle blong yumi, ol man we oli stap raonabaot long yumi, ol fren, ol man we yumi jes mitim olgeta, mo ol narafala man bakegen. Taem yumi mekem wok ya wetem fulhat blong yumi, yumi stap soemaot long nambawan fasin se yumi gat trufala lav long ol man ya.—1 Tes. 2:8.
4 Tabu Speret Blong God i Givhan Long Yumi: Baebol i promes se taem yumi mekem wok blong planem sid blong Kingdom mo putum wora long hem, Jeova bambae ‘i mekem sid ya i gru.’ Hemia nao samting we yumi luk se i stap kamaot long ogenaesesen blong yumi tede. (1 Kor. 3:5-7) Tabu speret blong God i givhan long yumi blong talemaot gud nyus, mo i mekem se wok ya i karem plante frut.—Joel 2:28, 29.
5 Antap long tok blong 2 Timote 4:5 we i pulum yumi blong “mekem wok ya blong talemaot gud nyus,” lav we yumi gat long ol man tu, i mas pusum yumi blong talemaot nambawan gud nyus blong Kingdom long evri jans we yumi gat. Yumi save sua se Jeova bambae i gohed blong blesem wok ya blong yumi.