Joen Long Ol Miting—“Yufala i Mas Mekem Samting Ya Moa”
1 Long ol yia we oli pas finis, fasin blong joen wanples i wan impoten samting long laef blong ol man blong Jeova. Ol man Isrel oli kam wanples long haos blong God mo long ol narafala haos prea blong olgeta, blong mekem trufala wosip, kasem tijing blong God, mo blong joengud wetem glad. Sem mak long ol faswan Kristin, oli no lego fasin ya blong joen tugeta. Long ol las dei ya we laef i strong tumas, yumi nidim blong “mekem samting ya moa,” from we ol trabol mo traem oli stap kam antap moa. Taswe yumi nidim paoa long saed long speret we kongregesen i givim. (Hib. 10:25, NW) Makem trifala risen ya from wanem yumi go long ol miting.
2 Blong Joengud Tugeta: Baebol i givim advaes ya long yumi se ‘yumi mas stap toktokgud long yumi blong mekem tingting blong yumi i strong, mo yumi mas givgivhan long yumi.’ (1 Tes. 5:11) Taem yumi joen wetem ol man we oli laekem God, samting ya i givim ol gudfala tingting long yumi mo i pusum yumi blong mekem ol gudfala wok. Be sipos yumi stap yumi wan nomo, yumi save gat ol tingting we oli krangke, no yumi save tingbaot yumi wan nomo, no maet yumi save gat ol nogud tingting we oli pusum yumi blong mekem wan sin.—Prov. 18:1.
3 Blong Kasem Tijing: Ol Kristin miting oli tijim yumi oltaem long Baebol. From tijing ya, lav we yumi gat long Jeova i save stap strong oltaem long hat blong yumi. Ol miting ya oli soemaot long yumi olsem wanem blong mekem “olgeta samting we God i wantem” long laef blong yumi. (Wok 20:27) Ol miting oli trenem yumi blong gat gudhan long wok blong prij mo tijim gud nyus, hemia samting we yumi nidim moa naoia blong kasem bigfala glad ya we i save kamaot taem yumi faenem mo givhan long olgeta we oli wantem save trutok blong Baebol.
4 Blong Stap Sef: Long rabis wol ya, kongregesen i wan trufala sefples long saed long speret, wan ples blong pis mo lav. Taem yumi kam long ol miting, tabu speret blong God i gat bigfala paoa long yumi. Nao frut we i kamaot hemia, “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.” (Gal. 5:22, 23, NW) Ol miting oli givim paoa long yumi blong stanap strong mo blong gat strong bilif. Oli rerem yumi blong ol traem we oli save kasem yumi yet.
5 Taem yumi kam long olgeta miting, yumi luk olsem wanem tok blong Ol Sam 133:1, 3 i kamtru. Hem i se: “I gud tumas taem ol man blong God oli stap wanples, we oli gat wan tingting nomo. Fasin ya i gud tumas.” Nomata weples ol man blong God oli wok mo oli joen tugeta tede, “long ples ya . . . Hae God i promes finis blong givim gudfala samting blong hem long ol man blong hem, we hemia laef ya we i no save finis.”