Ansa Long Wan Kwestin

◼ ?Olsem wanem yumi save mekem ol miting oli kamgud moa?

Ating samfala oli ting se hem i wok blong ol elda mo ol man blong givhan nomo blong mekem miting blong kongregesen i gud, from we olgeta nao oli givim ol tok mo lidim ol miting. Be, yumi evriwan i save givhan blong mekem se ol miting oli tijim mo pulum intres blong yumi. Yumi save givhan long ten rod, blong mekem ol miting oli kamgud moa:

Reregud fastaem. Taem yumi reregud from ol miting, yumi intres moa long olgeta. Taem yumi evriwan i reregud, ol miting oli laef mo oli leftemap tingting blong yumi moa. Go oltaem long miting. Evriwan long miting oli haremgud taem oli luk bigfala namba blong man i stap, mo samting ya i mekem tingting i strong moa se i impoten tumas blong kam long ol miting. Kam long stret taem. Sipos yumi sidaon bifo we miting i stat, yumi save joen long faswan singsing mo prea. Long rod ya, bambae yumi kasem olgeta gudfala samting blong miting ya. Karem ol buk wetem yumi. Sipos yumi karem Baebol mo ol buk we yumi yusum long miting oli kam wetem yumi, yumi save folemgud ol save we i kamaot, mo bambae yumi kasem save moa. No letem samting i pulum ae blong yumi. Ating yumi lesin moa taem yumi sidaon long fored. Sipos samfala oli toktok long smol voes, mo oli go plante taem long tolet, samting ya i save blokem yumi blong lesingud. Givim ansa. Taem plante long yumi i leftemap han mo givim ansa, ol tok we yumi talem blong soemaot bilif, i save leftemap tingting mo mekem ol narafala oli strong moa. Givim ol sot ansa. Samting ya i mekem se plante narafala oli gat jans blong givim ansa tu. Ol sot ansa blong yumi oli mas tokbaot save we yumi stadi long hem nomo. Mekem ol tok blong yumi. Sipos yumi wan studen long Tiokratik Skul no yumi gat wan haf blong mekem long Miting Blong Kingdom Wok, yumi mas reregud, lanemgud ol toktok blong yumi long haos, mo traehad blong no letem wan samting i blokem yumi blong mekem tok ya. Talem gudfala toktok long ol narafala we oli givim tok no ansa. Talem tangkyu long ol narafala from fasin traehad blong olgeta. Samting ya i save leftemap tingting blong olgeta mo pulum olgeta blong traehad moa nekis taem. Leftemap tingting blong ol narafala. Ol gudfala tok blong talem halo mo storeyan smol wetem ol narafala bifo mo afta long miting, oli mekem yumi evriwan i haremgud moa, mo yumi kasem moa gudfala samting long ol ­miting.