Sam Rod Blong Mekem Moa Long Wok Blong Prij
1 Bitim 40 yia bifo, wan Wajtaoa blong Janewari 15, 1955 i askem kwestin ya se, “?Yu yu givim bes blong yu?”. Wetem kaen fasin, Wajtaoa ya i soemaot olsem wanem ol man blong Jeova oli save mekem moa long wok blong prij. Tede tu, advaes ya i stret long yumi, from we yumi gohed blong givim bes blong yumi long wok ya.
2 Hemia bigfala loa we i mas pusum yumi long ol wok we yumi mekem: “Yufala i mas lavem Hae God ya we i God blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala.” (Mak 12:30) Yumi soemaot ful lav blong yumi long Jeova taem yumi holem olgeta jans we yumi gat blong mekem se wok blong Kingdom i gohed gud. Naoia i gud yumi tingbaot sam rod blong mekem moa long minista wok blong yumi.
3 Karem Responsabiliti Blong Yufala: Sam brata oli save traehad blong mekem wok blong kam man blong givhan, mo biaen oli save gohed blong kam elda. Long Wajtaoa blong Septemba 1, 1990, (Engglis no Franis), i gat tufala toktok we oli gat nem olsem: “Yu yu stap traehad blong joen fulwan long wok ya?” mo “?Yu yu naf blong mekem moa long kongregesen?” Tufala i leftemap tingting long plante brata blong oli kam naf mo blong oli wantem tekem ol responsabiliti long kongregesen. Traem askem long ol elda blong kongregesen blong yu, olsem wanem yu save kam naf blong kasem moa responsabiliti.
4 Ol elda mo ol man blong givhan we oli no mared, oli mas tingtinggud long jans we oli gat blong fulumap pepa blong go long Ministeriol Trening Skul. I gud sipos yu stat blong save ol samting we Watch Tower Publications Indexes blong 1996 mo 1997 (Engglis, Franis) oli talem long saed blong skul ya. Tekem tufala buk ya, aninit long tok “Ministerial Training School.” ?Yu yu luk we ‘doa i open finis blong mekem wan gudfala wok we bambae i gat plante frut blong hem’? (1 Kor. 16:9a) Plante brata we oli akseptem privilej ya, oli neva tingbaot se wan dei oli save kasem moa privilej, olsem blong mekem wok blong paenia sam ples we i gat nid no kam spesel paenia, wok long Betel, no kam wan elda we i goraon long ol kongregesen—long kantri ya no long narafala ples.
5 Traehad Blong Kasem Fultaem Minista Wok: Ol yangfala we oli kamaot long hae skul, ol woman we oli wok long haos, mo olgeta we oli ritae, oli mas tinghevi long wok blong paenia. I gud yu lukluk bakegen Kingdom Wok Blong Yumi blong Julae 1998, mo yu storeyan wetem ol paenia we oli bin gat sem fasin long laef olsem yu. Ating samting ya bambae i halpem yu blong mekem moa long minista wok, mo kam wan paenia olsem olgeta. (1 Kor. 11:1) ?Yu yu save mekem moa long wok blong prij, kasem 70 aoa mo mekem wok blong ful taem paenia?
6 Bitim 17,000 brata mo sista oli wok long ol branj ofis mo long ol Betel raon long wol. Buk ya Ol Rul Blong Mekem Minista Wok Blong Yumi long pej 110 i eksplenem olsem wanem yu save kam naf blong mekem wok ya. I gud sipos yu ridim toktok ya mo yu traem luk sipos wan dei yu yu save tekem jans blong mekem wok blong Betel.
7 Wok Long Ples We i Nidim Moa Man Blong Wok: ?Yu yu stap laef long wan teritori we ol pablisa oli stap wokem plante taem, mo we i gat plante brata we oli holem responsabiliti finis? ?Yu yu tingbaot blong mekem moa long wok blong prij, mo muf i go long ples we i nidim moa man blong wok? Ating yu save muf i go aotsaed long taon nomo, ples ya we i nidim moa man blong wok. (Matiu 9:37, 38) Yu no mas hareap, mo, yu mas skelemgud evri samting. Yu mas prea blong yu save tingtinggud fastaem. (Luk 14:28-30) Storeyan wetem ol kristin elda mo seket elda. Bambae oli mekem plante toktok wetem yu blong save sipos i moa waes blong muf naoia no long fiuja nomo. Sipos yu wantem raetem wan leta long Sosaeti blong askem long hem weples yu save go, i gud Sevis Komiti blong kongregesen tu i raetem wan leta, i saenem mo i joenem long leta blong yu.
8 Traem Mekem Wok Blong Prij Blong Yu i Kam Moa Gud: Ating yumi wanwan i save mekem se wok blong prij blong yumi i kam moa gud. Be, ?yu mas yu stap traehad long olgeta haf blong wok ya? ?Yu stap prij long ol haos wanwan? ?Yu stap tekem jans blong prij long ol man raonabaot long yu? ?Yu stap mekem ol visit mo Baebol stadi blong yu? Sipos yu mekem wan Baebol stadi, ?yu save kam wan moa gud tija? I gud yu ridim bakegen Kingdom Wok Blong Yumi blong Jun 1996, we i givim sam advaes we yu save yusum blong leftemap tingting blong studen blong yu, go kasem we hem i givim laef blong hem i go long Jeova mo hem i tekem baptaes.
9 Long japta 9 blong buk Ol Rul Blong Mekem Minista Wok Blong Yumi, i gat sam advaes bakegen we bambae oli halpem yumi blong mekem se wok blong prij blong yumi i kam moa gud. I sua se yumi evriwan i wantem tumas givim bes blong yumi long wok blong God. Taswe, naoia nomo, yu mas stat blong tingbaot ol mak long saed blong spirit we yu save kasem. Olsem Pol i talem long 1 Timoti 4:15: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.”