Ol Miting Oli Givhan Bigwan Long Ol Yangfala

¹ Wan yangfala gel i talem se: “Samtaem mi tingting se mifala ol yangfala, mifala nao i stap kasem moa traem i bitim ol narafala man. Mifala i stap long medel blong ol man we oli slip olbaot, oli tekem drag, mo oli stap drong.” ?Yu yu gat sem tingting olsem? Sipos yes, ?yu ting se wanem nao bambae i halpem yu blong faet agensem ol nogud fasin ya? Yu nidim bilif, mo yu mas bilif strong se olgeta rod blong Jeova oli stret, from we sipos man i no bilif long God olsem, “hem i no save mekem God i glad.” (Hib. 11⁠:⁠6) Fasin blong joen long ol miting blong kongregesen bambae i mekem Kristin bilif blong yu i kam moa strong mo i save givhan long yu blong gat strong tingting blong blokem ol rabis fasin.

² Yu Save Kasem Plante Samting From Ol Miting: ?Wanem i mekem se yu harem gud taem yu kakae tugeta wetem ol fren blong yu? Ating hemia gudfala tes blong kakae mo gudfala kampani blong olgeta we yufala i stap haremgud tugeta. Yes, ol miting blong yumi tu, oli save givim samting we i sem mak, be long saed blong spirit.

³ Ol samting we yumi harem long ol miting oli blong mekem yumi strong moa long bilif. Long ol miting, yumi harem ol tok we oli givhan blong winim ol problem we yumi fesem evri dei mo tu, yumi stadi long ol nambawan profet tok blong Baebol. Long ples ya, yu save harem ol gudfala advaes we oli tijim yu blong gat wan gudfala laef mo blong winim ol traem we yu fesem. Olgeta we yu joen wetem olgeta long ol miting, oli beswan kampani we yu save faenem, mo tingting long saed blong spirit we i stap long medel blong olgeta i save mekem yu harem gud mo yu sef. (Sam 133⁠:⁠1) Yumi no sapraes we wan yangfala i talem se: “Mi spenem fuldei long skul, mo samting ya i mekem mi mi kam slak. Be ol miting oli olsem wan naesfala garen long medel blong wan draeples, we long ples ya, mi save kasem paoa blong fesem ol traem blong skul long nekis dei.” Wan narafala yangfala i talem se: “Mi luksave se taem mi kampani oltaem wetem olgeta we oli lavem Jeova, samting ya i halpem mi blong stap klosap long hem.”

⁴ Taem yu joen long Tiokratik Skul, yu lanem blong faenem ol dip save blong Baebol, mekem wan tok wetem ol save ya, mo biaen, eksplenem save ya wetem prapa tok blong yu long fored blong ol man long Haos Kingdom. !Tingbaot ol gudfala frut we oli save kamaot sipos yu trenem yu wan blong gat gudhan blong tijim ol trutok blong Tok blong God we oli save sevem laef! I no gat wan narafala ples we ol yangfala oli save kasem wan nambawan trening olsemia.

⁵ Olsem Wanem Blong Haremgud Fulwan Long Ol Miting: Blong harem gud fulwan long ol miting, i gat tri impoten poen blong tingbaot. Faswan, hemia blong reregud fastaem, (2) tekpat, (3) mo mekem samting we yu lanem i wok long laef blong yu.

⁶ Rerem Ol Miting: Mekem wan program blong rerem ol miting evri wik. Yu no mas letem homwok, wan haftaem wok blong winim mane, no wan pleplei, i blokem yu blong rerem ol haf we bambae yumi tokbaot long ol miting. Fasin ya blong folem wan gudfala program bambae i givhan bigwan long yu. Samting we i impoten tumas, hemia se yu mas folemgud program blong ridim Baebol evri wik, we i stap wetem program blong Tiokratik Skul. I tekem sam menet nomo evri dei blong ridim mo tingting dip long ol japta we oli stap long program ya. Makemaot wan taem blong rerem Buk Stadi mo Wajtaoa Stadi. Samfala oli mekem samting ya, wan no tu dei bifo long ol miting ya. Sipos yu naf, rerem ol defren haf blong Kingdom Wok blong evri wik.

⁷ Tekpat Long Ol Miting: Baebol i talem se, taem Jisas i gat 12 yia, hem i stap long haos prea, i stap lesin, i askem kwestin, mo givim ansa. (Luk 2⁠:​46, 47) Hemia i minim se hem i joen fulwan long wanem we i stap gohed long taem ya. Ol miting bambae oli givhan moa long yu sipos yu traehad blong tekpat long olgeta.​—⁠Prov. 15⁠:⁠23.

⁸ Yu mas putum tingting blong yu i stap strong long wanem we yu harem long ol miting. Samtaem, fasin blong lesin long wan tok i moa hadwok bitim we yu givim wan tok. ?From wanem? From we tingting blong yu i save flae olbaot taem narafala man i stap toktok. ?Olsem wanem blong winim samting ya? Hemia taem yu tekem not. Raetemdaon ol impoten poen we yu wantem yusum bakegen samtaem biaen. Fasin blong tekem not i save halpem yu blong putum tingting blong yu i stap long program. Mo tu, jekemap olgeta vas, mo folem brata taem hem i stap ridim ol vas ya.

⁹ Antap long samting ya, putum wan mak blong joen long eni haf blong miting we i gat kwestin mo ansa. Bambae yu harem gud moa sipos yu tingting gud fastaem long wanem we yu wantem talem. Ol Proveb 15⁠:28 i talem se: “Gudfala man i tingting gud fastaem, nao biaen i tok.”

¹⁰ Mekem Wanem We Yu Lanem i Wok: Laswan samting, hemia blong mekem samting we yu lanem i ‘wok long laef blong yu.’ (1 Tes. 2⁠:13) Taem yu folem ol nambawan poen ya we yu lanem long evri miting, bambae yu kam klosap moa long Jeova God. Bambae hem i kam olsem wan trufala man long tingting blong yu, mo bambae yu kasem bigfala glad mo yu harem gud taem yu ‘stap folem ol tok ya we oli tru,’ mo yu mekem se oli kam wan haf blong laef blong yu.​—⁠3 Jon 4.

¹¹ Ol yangfala brata mo sista, taem yufala i rerem ol miting evri wik, tekpat long olgeta, mo mekem ol samting we yufala i lanem oli wok, bambae yufala i save harem gud moa from ol miting. Long semtaem, bambae yufala i kasem plante gudfala frut from ol miting ya. Bilif blong yufala bambae i kam moa strong, mo bambae yufala i wantem moa blong stap tru long Jeova, Papa blong yufala we i stap long heven.​—⁠Sam 145⁠:⁠18.