Ol Blesing Blong Jeova Oli Mekem Yumi Rij
1 Plante man oli skelem man se hem i rij folem hamas mane we hem i kasem long pei blong hem. Taswe plante man oli ting se olgeta nao we oli gat plante mane oli moa hapi, mo oli gat evri samting we oli nidim long laef. Be, sore tumas, ol man we oli gat tingting se mane i save givim glad long man, oli rong. (Prija 5:12) Glad blong olwe i no save stap wetem olgeta “we oli strong blong kam rijman” long ol samting long saed blong bodi. (1 Tim. 6:9, NW ) Defren olgeta, ol man blong Jeova oli gat trufala glad mo oli rij moa long olgeta man long wol. (Prov. 10:22; Rev. 2:9) ?Olsem wanem?
2 Ol Samting We Oli Pruvum Se Yumi Rij: Yumi gat fulap dip save long saed blong spirit mo yumi kasem save long Tok blong God, Baebol. Jeova i gohed blong yusum ogenaesesen blong hem long wol ya, blong tijim yumi long saed blong hem mo Pikinini blong hem, blong yumi save kasem ol blesing blong olwe. Stret save i pulum yumi kam klosap long Jeova mo frengud wetem hem. (Jem. 4:8) Fasin blong luksave samting we i gud mo samting we i nogud mo folem ol loa blong God, i blokem yumi long sam kaen sik mo ol denja. Yumi trastem se Jeova bambae i givim olgeta samting we yumi nidim, mekem se yumi harem gud mo yumi gat pis long tingting.—Mat. 6:33.
3 Yumi gat pis mo fasin joengud wetem ol brata blong yumi long saed blong spirit from we yumi wokem ol frut blong spirit blong God long laef blong yumi. From we lav i joenem gud yumi, yumi neva harem olsem se God no ol brata blong yumi oli livim yumi taem yumi fesem trabol.—Gal. 6:10.
4 Laef blong yumi i gat trufala mining. Yumi luk se i wan bigfala blesing blong joen long wok blong talemaot gud nius long fulwol. Yumi kasem bigfala glad taem yumi halpem ol narafala blong oli save frengud wetem God mo joengud tugeta wetem yumi long trufala wosip. Minista wok blong yumi ya we i sas, i givim ona long Jeova mo i mekem yumi harem gud se yumi stap mekem nem blong hem i tabu. Yumi gat wan positif tingting, from we yumi save se hop blong yumi long fiuja bambae i kamtru i no longtaem.
5 Soemaot Fasin Tangkiu Blong Yumi: I gud we yumi soem tangkiu from ol blesing we Jeova givim, we oli mekem se yumi nao ol trufala rijman long wol. (Prov. 22:4) Taem yumi tekem taem evri dei blong tingting dip long wanem we yumi gat, samting ya i save pusum yumi blong talem tangkiu long Jeova from bigfala lav blong hem, mo gohed blong wosipim hem fulwan.