Ansa Long Wan Kwestin

◼ Taem wan brata i givim pablik tok, ?hem i mas ridim hamas vas blong Baebol?

Fastaem, brata we i givim pablik tok i mas tingbaot sam impoten samting. Hem i mas tingbaot stamba samting we bambae hem i tokbaot mo sipos tok ya i nidim blong ridim ol wanwan vas long wan japta long Tok blong God no i no nidim blong mekem olsem.

I impoten tu blong tingbaot se, taem brata we i givim pablik tok i ridim wan vas, hemia i no jes blong pruvum se wanem we hem i stap tokbaot i kamaot long Baebol. No gat. Bigfala risen blong yusum wan vas blong Baebol i blong sapotem gud wanem we hem i stap tokbaot blong mekem se bilif blong olgeta we oli stap lesin i kam strong moa. Taem brata ya i ridim wan stamba vas blong pablik tok, mo olgeta we oli stap lesin oli luk stret wanem we Baebol blong olgeta i talem, samting ya bambae i gat bigfala paoa long tingting blong olgeta. Be sipos brata ya i ridim tumas vas, samting ya bambae i mekem i hadwok long olgeta blong tekem not mo blong folem ol bigfala poen.

Taem wan brata i stap folem plan blong tok we Sosaeti i givim, i no nid blong talem no ridim evri vas we i stap long plan ya. Sam vas blong Baebol we i stap long plan ya, oli jes blong givhan long brata we i givim tok blong rerem gud tok ya. Maet ol vas ya oli givim sam niufala tingting long hem no oli givhan long hem blong savegud sam rul blong Baebol mo blong kasem save bigfala plan blong tok ya. Brata ya i mas faenemaot weswan vas i impoten blong yusum long tok blong hem mo askem ol man we oli stap lesin blong folem long Baebol blong olgeta taem hem i ridim mo i eksplenem vas ya. Sipos i gat sam narafala vas we i sapotem vas ya, hem i save ridim no jes tokbaot ol vas ya nomo. I impoten tumas we brata we i givim tok i skelemgud ol vas we bambae hem i ridim.

Taem brata we i stap givim tok i ridim ol vas, hem i mas ridim stret insaed long Baebol, be i no long wan pepa we hem i prentemaot long kompiuta. Taem hem i askem olgeta we oli stap lesin blong tekem wan vas, hem i mas talemaot klia buk blong Baebol, japta, mo vas we bambae hem i ridim. Fasin blong spel smol blong askem wan kwestin no blong talem from wanem i impoten blong ridim vas ya, i givim janis long olgeta we oli stap lesin blong oli faenem vas. I gud blong talem bakegen buk mo vas we bambae yu ridim blong mekem se ol brata sista oli save rimemba vas ya. Be, i nogud blong talem namba blong pej we vas ya i stap long hem. Stret rod blong yusum Baebol long pablik tok bambae i halpem olgeta we oli stap lesin blong kasem blesing from paoa blong Tok blong God taem brata we i stap givim tok i eksplenem Baebol.​—Hib. 4:12.