Trutok Long Saed Blong God Mo Kraes

?God Hem i Hu?

?Wanem Nem Blong God? God hem wan i talem se: “!Mi nomo mi Jehova! !Hemia nao nem blong mi!” (Aesea 42:8, New World Translation) Nem blong God i stap long Baebol bitim 7,000 taem. Be long plante Baebol, oli karemaot nem ya mo oli putum ol taetel olsem “Masta.” God i wantem se yu “singaot long nem blong hem,” blong yu kam fren blong hem.—Ol Sam 105:1, NW.

Ol Taetel Blong Jehova. Baebol i yusum ol taetel ya blong tokbaot Jehova: “God,” “God we i gat olgeta paoa,” “God we i wokem olgeta samting,” “Papa,” “Masta,” mo “Hae God.” Long plante prea long Baebol, oli joenem wan long ol taetel ya wetem nem blong God, Jehova.—Daniel 9:4.

Bodi Blong God. Yumi no save luk God from we hem i spirit. (Jon 4:24) Baebol i talem se “i no gat man we i luk God.” (Jon 1:18) Baebol i soemaot se ol man oli save mekem God i harem nogud, o oli save “mekem hem i glad.”—Ol Proveb 11:20, NW; Ol Sam 78:40, 41.

Ol Gudfala Fasin Blong God. God i stap mekem i sem mak nomo long olgeta man. (Ol Wok 10:34, 35) Mo tu, ‘oltaem hem i gat sore long man, mo i stap givhan long man long gladhat blong hem. Hem no save kros kwik. Oltaem hem i stap lavem man mo holemstrong promes blong hem.’ (Eksodas 34:6, 7) Be, i gat fo narafala fasin blong hem we oli gud tumas.

Paoa. From we hem i God we i “gat olgeta paoa,” hem i save mekem ol promes blong hem oli kamtru.—Jenesis 17:1.

Waes. Waes blong God i bitim waes blong man. Taswe Baebol i talem se “God nomo i waes.”—Rom 16:27.

Stret fasin. Oltaem nomo God i mekem i stret. Ol fasin blong hem oli “stret olwe,” mo “oltaem hem i stap mekem ol samting we i stret.”—Dutronome 32:4.

Lav. Baebol i talem se “God hem i lav,” i no talem nomo se hem i soemaot lav. (1 Jon 4:8) Taswe, lav i joen long evri samting we hem i mekem, mo i givhan bigwan long yumi.

Ol Man Oli Save Fren Wetem God. God i Papa blong yumi we i stap long heven. (Matiu 6:9) Sipos yumi trastem hem, bambae yumi kam fren blong hem. (Ol Sam 25:14) God i wantem se yu prea long hem mo yu ‘lego ol wari blong yu long hem, from we hem i stap tingbaot yu.’—1 Pita 5:7; Jemes 4:8.

?Jisas Mo Jehova Oli Defren Olsem Wanem?

Jisas i No Sem Mak Long God. Jisas i spesel from we God nomo i wokem hem. Taswe, Baebol i talem se hem i pikinini blong God. (Jon 1:14) Afta we Jehova i wokem Jisas, hem i yusum fasbon pikinini ya olsem “nambawan man blong wok,” blong i wokem ol narafala samting.—Ol Proveb 8:30, 31, NW; Kolosi 1:15, 16.

Neva Jisas i talem se hem i God. Hem i talem se: “[God] i sanem mi mi kam, mo mi kam long nem blong hem.” (Jon 7:29) Taem hem i toktok long wan disaepol blong hem, hem i tokbaot Jehova se “Papa blong mi we hem i Papa blong yufala tu,” mo “God blong mi we hem i God blong yufala tu.” (Jon 20:17) Afta we Jisas i ded, Jehova i mekem hem i laef bakegen blong i go long heven, i sidaon long raet saed blong hem, mo i givim bigfala paoa long hem.—Matiu 28:18; Ol Wok 2:32, 33.

Jisas i Save Halpem Yu Blong Yu Kam Klosap Long God

Jisas i kam long wol blong tijim yumi long saed blong Jehova. Jehova i tokbaot Jisas se: “Hemia Pikinini blong mi. Mi mi lavem hem tumas. Yufala i lesin long hem.” (Mak 9:7) Jisas i save God moa i bitim ol narafala. Hem i talem se: “I no gat man i save Papa, be Pikinini nomo wetem ol man ya we Pikinini i glad blong soem Papa long olgeta, olgeta nomo oli save hem.”—Luk 10:22.

Jisas i soemaot gud ol fasin blong God. Jisas i folemgud fasin blong Papa blong hem, taswe hem i talem se: “Man we i luk mi, hem i luk Papa tu.” (Jon 14:9) Jisas i pulum ol man i kam long God taem hem i soemaot ol fasin blong God long ol samting we hem i talem mo i mekem. Hem i talem se: “Mi nao rod ya, mo mi nao trutok ya, mo mi nao laef ya. I no gat man i save kam long Papa blong mi, sipos hem i no pas long mi.” (Jon 14:6) Hem i talem tu se: “Ol prapa man blong wosip bambae oli wosipim Papa long spirit mo long trutok. Yes Papa i stap lukaot ol man olsem blong oli wosipim hem.” (Jon 4:23) !Traem tingbaot! Jehova i stap lukaotem ol man olsem yu we oli wantem save trutok long saed blong hem.