Onagud Long Jeova Evri Dei
1 “Man we i wantem kam waes, nambawan samting blong hem i mekem, hem i mas tinghevi long Hae God, mo i mas ona gud long hem.” (Sam 111:10) Samting ya i pusum yumi blong mekem samting we i gud mo i givhan long yumi blong tanem baksaed long samting we i nogud. (Prov. 16:6) Fasin blong ona gud olsem, i soemaot bigfala respek long Man We i Wokem yumi. Fasin ya i pusum yumi blong no mekem hem i harem nogud mo blong no brekem ol loa blong hem. Hemia i wan fasin we yumi nidim blong wokem mo soemaot long laef blong yumi evri dei.—Prov. 8:13.
2 Evri dei, ol tingting blong wol ya blong Setan oli gat bigfala paoa blong pulum yumi blong folem ol rabis fasin blong hem. (Efes. 6:11, 12) Bodi blong yumi we i no stretgud olgeta i gat sin mo i isi blong hem i mekem wanem we i nogud. (Gal. 5:17) Taswe, blong obei long ol loa blong Jeova, stap glad, mo kasem laef, yumi mas ona gud long hem evri dei.—Dut. 10:12, 13.
3 Long Hibrus 10:24, 25 (NW ) yumi kasem advaes ya blong joen wanples blong leftemap tingting blong yumi. ‘Samting ya, yumi mas mekem moa’ from taem we yumi stap long hem naoia. I impoten tumas blong kam long miting oltaem sipos yumi wantem stap strong long ol las dei ya. Sipos yumi fraet blong brekem ol loa blong God samting ya i pusum yumi blong kam long ol miting mo tinghae long risen blong miting se i wan sas samting. Olgeta we oli ona gud long God oli luk fasin blong joen long ol Kristin miting olsem wan blesing we i sas tumas.
4 Wan narafala rod blong ona gud long God, hemia blong obei long oda ya blong talemaot gud nius blong Kingdom. (Mat. 28:19, 20; Wok 10:42) Wan long ol faswan mak long wok blong prij i blong halpem ol narafala blong wokem fasin blong ona gud long Jeova mo obei long ol samting we hem i talem. Yumi save mekem olsem taem yumi visitim bakegen ol man, traehad blong statem Baebol stadi, mo tijim ol narafala long ol loa blong God. Long rod ya, yumi soem ona long Jeova mo lav long ol man raonabaot yumi.—Mat. 22:37-39.
5 Olgeta we oli no ona gud long God oli no gat tangkiu from ol samting long saed blong spirit, nao rabis win blong wol ya, no ol tingting blong hem, oli pulum olgeta. (Efes. 2:2) I gud yumi mekem wan strong disisen blong “stap mekem wosip long [God] long fasin we hem i glad long hem, we yumi ona long hem, mo yumi fraet long hem tu.” (Hib. 12:28) Long rod ya, bambae yumi kasem ol blesing from yumi stap ona gud long Jeova evri dei.