?Yu Yu Prij Wetem Strong Tingting?
1 Nating se ol man we oli agensem tufala oli putum tufala long kalabus no oli wantem kilim tufala i ded, Pita mo Jon tufala i gohed blong talemaot mesej blong Kingdom wetem strong tingting. (Wok 4:17, 21, 31) ?Prij wetem strong tingting i minim wanem long yumi tede?
2 Prij Wetem Strong Tingting: Wan tok we i sem mak long “strong tingting” hemia “fasin no fraet” we i minim se man i “mekemap tingting blong hem blong i no fraet nating, i strong naf blong fesem trabol, mo i stanap strong longtaem.” Ol trufala Kristin we oli prij wetem strong tingting, oli no fraet blong toktok long enitaem we oli gat janis blong serem gud nius wetem narafala. (Wok 4:20; 1 Pita 3:15) Samting ya i minim se, long fored blong ol narafala, yumi no sem blong talemaot gud nius. (Sam 119:46; Rom 1:16; 2 Tim. 1:8) Taswe, strong tingting i wan fasin we yumi nidim blong finisim wok blong yumi, hemia blong talemaot gud nius blong Kingdom long taem ya blong en. Fasin ya i pusum yumi blong serem gud nius wetem ol man we yumi faenem olgeta long evri ples.—Wok 4:29; 1 Kor. 9:23.
3 Strong Tingting Long Skul: ?I hadwok long yu blong prij long ol fren blong yu long skul from we yu gat fasin fraet no yu sem? Samtaem i no isi blong mekem olsem; i tru se, hem i rili wan traem. Be Jeova i save halpem yu sipos yu prea blong askem hem blong givim strong tingting long yu blong yu prij long ol narafala. (Sam 138:3) Strong tingting i save givhan blong makemaot yu olsem wan long ol Witnes blong Jeova, mekem se yu save stanap strong agensem ol man blong jikim man. Frut we i kamaot se, wok blong yu blong talemaot gud nius long skul i save sevem laef blong olgeta we oli lesin long yu.—1 Tim. 4:16.
4 Strong Tingting Long Ples Blong Wok: ?Ol man long ples blong wok oli save se yu yu wan Witnes blong Jeova? Maet i gat wan rod nomo blong gud nius i kasem olgeta, hemia sipos yu nao yu prij long olgeta. Strong tingting blong yu bambae i save halpem yu blong faenem taem blong go long ol Kristin miting mo ol asembli.
5 Holem Strong Tingting Taem Yu Kasem Traem: I impoten tumas blong mekem tingting blong yumi i strong taem yumi fesem ol man we oli agensem yumi. (1 Tes. 2:1, 2) Samting ya i halpem yumi blong holem strong long bilif blong yumi taem ol man oli wantem kilim yumi, oli jikim yumi no oli mekem bigfala trabol long yumi. (Fil. 1:27, 28) Strong tingting i halpem yumi blong stanap strong nating se man i traem fosem yumi blong brekem ol rul blong Jeova, God blong yumi. Mo strong tingting i mekem yumi naf blong holemtaet pis insaed long yumi taem narafala i sakem ol tok blong statem wan rao.—Rom 12:18.
6 Nomata wanem traem we wanwan long yumi i kasem, i gud we yumi gohed oltaem blong talemaot gud nius wetem strong tingting.—Efes. 6:18-20.