“Yufala i Mas Letem Laet Ya i Saenaot”
1 Wol ya i tudak we i tudak long saed blong spirit. Ol man oli no moa luksave wanem fasin i stret mo wanem fasin i no stret. Laet blong trutok i stap mekem se “ol rabis fasin” we oli blong tudak oli kam long klia ples. Nao ol man oli save stap longwe long ol fasin we oli blong ded nomo. Taswe, Pol i talem long ol Kristin se: “Oltaem yufala i mas holem fasin blong man blong delaet long laef blong yufala.”—Efes. 5:8, 11.
2 “Fasin blong ol man olsem”, we oli stap long delaet, hem i defren olgeta long fasin blong ol man we oli stap long tudak blong wol ya. (Efes. 5:9) Blong stap olsem man blong delaet, yumi mas soem ol gudfala eksampol long saed blong Kristin fasin. Bambae Jisas i glad long yumi sipos yumi mekem olsem. Mo tu, yumi mas soem ol fasin olsem fasin blong holem mo laekem trutok long fulhat blong yumi. Yumi mas soemaot ol fasin ya long evridei laef blong yumi mo long wok blong prij.
3 Tekem Janis Blong Saenaot Olsem Laet: Jisas i talem long ol disaepol blong hem se: “Yufala i mas letem laet ya i saenaot i kasem ol man.” (Mat. 5:16) Yumi soemaot laet blong Jeova taem yumi talemaot Kingdom blong God mo ol stamba tingting blong hem, olsem we Jisas i bin mekem. Yumi saen olsem laet taem yumi go luk ol man long haos blong olgeta mo taem yumi talemaot trutok long ples blong wok, long skul, long ol man klosap long yumi, mo long evri janis we yumi gat.—Fil. 2:15.
4 Jisas i talem se bambae samfala man oli no laekem delaet. (Jon 3:20) Taswe, yumi no kam slak taem bighaf blong ol man oli no wantem “laet ya we i stap saenaot i go long olgeta. Laet ya i kamaot long gud nius blong Jisas Kraes.” (2 Kor. 4:4) Jeova i save wanem we i stap long hat blong olgeta man mo hem i no wantem ol rabis man oli stap wetem ol man blong hem.
5 Taem yumi folem ol loa blong Jeova mo haremgud long laet long saed blong spirit, yumi save soemaot laet ya long ol narafala. Taem oli luk ol fasin blong yumi, nao oli luksave se yumi “gat laet blong laef,” samting ya bambae i pulum olgeta blong jenisim laef blong olgeta blong kam ol man blong karem laet.—Jon 8:12.
6 Taem yumi letem laet blong yumi i saenaot, yumi givim bigfala ona long Man We i Wokem yumi mo yumi halpem ol man we hat blong olgeta i stret blong oli save Hem mo oli gat hop blong gat laef we i no save finis. (1 Pita 2:12) From we yumi gat laet, yumi mas halpem ol man we oli stap long tudak long saed blong spirit blong oli kam long laet mo mekem ol wok blong delaet.