Wok Oltaem Wetem Glad
1 Jisas i talem se long taem ya we hem i kambak bakegen, bambae i sem mak olsem taem blong Noa. Plante man oli no “save se bambae trabol i kam.” (Mat. 24:37-39) Taswe, i sua se long taem ya, plante man bambae oli no lesin long gud nius blong Kingdom. ?Wanem i save halpem yumi blong stap glad oltaem long wok blong talemaot gud nius?—Sam 100:2.
2 Fastaem, yumi mas save se God nao i askem mo i sanem yumi blong talemaot gud nius. Sipos ol man oli no wantem lesin, nating se yumi traem bes blong yumi, hemia i olsem we oli stap sakemaot Jeova. Yumi mas tingbaot se Jeova i glad long yumi, taem yumi holem strong long wok blong prij. Samting ya i bambae i givhan long yumi blong stap glad oltaem long wok blong God.—Jem. 1:25.
3 Seken samting se, i gat sam man yet we bambae oli akseptem rod we Jeova i stap yusum blong sevem man. Nating sipos bighaf blong ol man oli no soem intres, be i gat sam man yet we oli olsem sipsip. Yumi mas hivimap olgeta naoia, from we en i klosap tumas. Yumi mas gohed blong prij “long wan taon no wan vilej” blong “faenem wan gudfala man.”—Mat. 10:11-13.
4 Holem Wan Gudfala Tingting: Tingting blong sam man i foldaon bigwan taem oli luk ol rabis samting we ol giaman skul oli mekem. Tede wol ya i mekem samfala man oli “trabol tumas, oli no moa gat paoa.” (Mat. 9:36) Plante man, tingting blong olgeta i foldaon from we oli no gat wok, oli sik, mo oli harem se oli no sefgud. Taem yumi kasem save long samting ya, bambae yumi wantem moa blong gohed long wok blong yumi. Traehad blong statem storian long saed blong ol bigfala problem we ol man long teritori blong yumi oli stap fesem. Halpem olgeta blong luksave se Kingdom blong God nomo i save finisim ol problem olsem. Yusum ol vas blong Baebol mo ol bigfala poen insaed long ol buk, blong mekem se gud nius i kasem hat blong olgeta.—Hib. 4:12.
5 Ol man we oli glad blong mekem ol samting we tok blong God i talem, oli tingbaot oltaem se: “Glad blong Jeova i olsem strong haos, i stap givim paoa long [yumi].” (Neh. 8:10, NW ) Yumi no nid blong lusum glad blong yumi. “Sipos olgeta long haos ya oli stret, bambae pis i stap wetem olgeta, be sipos oli no stret, bambae pis ya i kambak long yu bakegen.” (Mat. 10:13, NW ) Jeova i stap mekem yumi glad mo yumi strong bakegen, taem yumi gat longfala tingting blong stanap strong long tabu wok blong hem. Mo hem i blesem yumi taem yumi holem strong long hem.