Jeova i Givim Paoa Long Yumi
1 ?Wanem tingting blong yu long saed blong aposol Pol? Taem yumi ridim buk blong Ol Wok, yumi luksave se Pol i wan man we i wok strong long wok blong Jeova. ?Olsem wanem Pol i naf blong mekem olgeta wok ya we hem i bin mekem? Hem i talem se: “Mi mi naf blong mekem evri samting long paoa blong Hemia we i stap givim paoa long mi.” (Fil. 4:13, NW ) Paoa we Jeova i givim i save givhan long yumi tu. ?Olsem wanem? Yumi kasem help from paoa ya taem yumi yusumgud sikis samting we Jeova i givim blong mekem yumi kam strong moa long saed blong spirit.
2 Tok Blong God: Yumi mas kakae gud blong yumi stap strong long bodi. Long sem fasin, yumi mas fidim yumi long Tok blong God blong stap strong long saed blong spirit. (Mat. 4:4) Baebol nao i givim paoa we yumi nidim blong stap strong. Taswe blong gohed blong wok strong mo stap glad long trutok, yumi mas mekem stadi yumi wan mo tingting gud long wanem we yumi lanem. I gud sipos yumi traem blong mekem samting ya evri dei.—Sam 1:2, 3.
3 Prea: I impoten tumas blong kam klosap moa long Jeova. Samting ya i tru moa long taem we yumi nidim help. Jeova i yusum spirit blong hem, blong givim paoa long olgeta we oli askem help blong hem tru long prea. (Luk 11:13; Efes. 3:16) Baebol i pulum yumi blong “prea oltaem.” (Rom 12:12) ?Yu yu stap mekem samting ya?
4 Kongregesen: Ol miting blong kongregesen oli givim paoa mo oli leftemap tingting blong yumi. Yumi haremgud long fasin joengud we i stap bitwin ol brata sista blong yumi. (Hib. 10:24, 25) Taem tingting blong yumi i foldaon from wan trabol, ol brata sista oli leftemap tingting blong yumi bakegen mo oli givhan long yumi wetem lav.—Prov. 17:17; Pri. 4:10.
5 Wok Blong Prij: Fasin blong joen oltaem long wok blong prij i halpem yumi blong tingting oltaem long Kingdom mo ol blesing blong hem. Taem yumi givhan long wan narafala blong kasem save long Jeova, yumi haremgud tumas. (Wok 20:35) I tru se i no evriwan we i save muf i go long ples we i gat bigfala nid blong talemaot gud nius mo i no evriwan we i save mekem wok blong paenia. Be yumi evriwan i save joen long wok blong prij.—Hib. 6:10-12.
6 Ol Kristin Elda: Yumi kasem blesing from wok blong ol elda we oli leftemap tingting mo givhan long yumi. Jeova i givim wok long olgeta blong oli lukaot gud long ol man blong hem olsem we man i lukaot gud long sipsip blong hem. (1 Pita 5:2) Ol seket elda oli leftemap tingting blong ol kongregesen we oli visitim, olsem we Pol i mekem long taem blong hem bifo.—Rom 1:11, 12.
7 Eksampol Blong Olgeta We Oli Stap Tru Long God: Gudfala eksampol blong olgeta we oli holemstrong long wok ya, long taem bifo mo long taem blong yumi tu, i leftemap tingting mo i givim paoa long yumi. (Hib. 12:1) Taem yu nidim paoa, i gud blong ridim sam stori we oli leftemap tingting. Olsem ol stori long ol magasin blong yumi long saed blong laef blong sam Witnes, no sam gudfala ripot long Yearbook, no sam long ol gudfala stori long saed blong histri blong ol Witnes blong Jeova long buk ya Proclaimers.
8 Wan brata, we i gat samwe long 95 yia, i lanem trutok taem hem i yangfala nomo. Taem hem i yangfala yet, hem i kasem sam traem long bilif blong hem. Fastaem, sam long olgeta we oli joen long kongregesen blong hem oli lego ogenaesesen blong Jeova. Antap long samting ya, hem i faenem se wok blong prij long ol haos wanwan i strong tumas blong mekem. Be, nating se hem i harem olsem, oltaem hem i dipen long Jeova blong givhan long hem. I no longtaem biaen hem i stat blong haremgud long minista wok blong hem. ?Mo olsem wanem long brata ya tede? Nating se hem i gat problem long saed blong helt, hem i stap wok yet long Betel long Brooklyn, olsem wan memba blong Hed Kampani. Hem i no sore nating we hem i bin holemstrong long ogenaesesen blong Jeova.
9 Wan sista, we i stap long Betel blong Inglan, i baptaes taem hem i gat 13 yia nomo. Wan yia afta we hem i baptaes, hem i statem wok blong paenia tugeta wetem brata blong hem. Mo wan yia afta we hem i statem paenia, papa blong hem i kalabus from we hem i no joen long Seken Bigfala Faet Blong Wol. Oltaem sista ya i trastem Jeova blong givim paoa long hem, mo hem i gohed blong mekem wok blong trufala God. Samtaem biaen, hem i mared long wan brata we i stap tru long God, mo tufala tugeta i mekem wok blong Jeova. Afta we sista ya i mared 35 yia, hasban blong hem i ded. Long taem ya bakegen, sista ya i trastem Jeova blong givim paoa long hem. Hem i holemstrong long Jeova kam kasem naoia, mo hem i wantem gohed blong mekem wok blong Jeova blong olwe wetem ol narafala man we bambae oli laef long wol ya.
10 Jeova i givhan mo i givim paoa long ol man blong hem we oli stap tru long hem. “Olgeta we oli taed, hem i stap givim paoa long olgeta, mo olgeta we oli no strong, hem i stap mekem olgeta oli strong bakegen.” Yumi save kasem bigfala paoa ya we i no gat en blong hem, sipos yumi yusumgud olgeta sikis samting ya we yumi tokbaot antap. Rimemba se: “Olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta i stap mekem olgeta oli strong bakegen. . . . Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.” (Aes. 40:29-31) Pol i dipen bigwan long paoa blong Jeova, mo yumi mas mekem sem mak.