Givim Gudfala Witnes Long Ol Man Raonabaot Long Yu
1 Jisas i bin talem se “yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Mat. 22:39) I sua se yu yu stap “mekem i gud” long ol brata sista blong yu. ?Be yu save go moa blong soem lav long olgeta we oli stap raonabaot long yu? (Gal. 6:10) ?Wanem sam rod blong mekem olsem?
2 Soemaot Se Yu Wan Witnes: ?Ol man raonabaot long yu oli save se yu yu wan Witnes? ?Sipos oli no save, from wanem yu no visitim olgeta taem yu stap prij? !Maet yu sapraes long risal blong visit ya! Sipos yu harem se yu naf, traem tekem janis blong prij long olgeta. Taem yu stap afsaed long haos blong yu, maet yu luk olgeta long yad blong olgeta no oli stap wokbaot long rod. I gud we yu smael long olgeta mo talem halo long olgeta. Storian wetem olgeta. Tokbaot bilif blong yu, ples we Haos Kingdom i stap, mo wanem we yumi stap mekem long ol miting. Talemaot hu ol narafala raonabaot long hem, we olgeta tu oli stap go long ol miting. Askem olgeta blong kam long ol miting. Yu mas gat strong tingting blong givim gudfala witnes long saed blong gud nius long olgeta man we yu yu save olgeta.—Wok 10:42; 28:23.
3 Soemaot Gudfala Fasin: Kaen fasin blong yu i save givim bigfala witnes, mo maet i givim janis blong yu blong prij long narafala. Mo tu, kaen fasin ya i save “leftemap tok blong God.” (Taet. 2:7, 10) Soemaot trufala intres long olgeta we oli stap raonabaot long yu. Frengud wetem olgeta mo soem se yu kasem save long tingting mo filing blong olgeta. Respektem olgeta taem oli wantem stap olgeta nomo mo taem oli no wantem noes. Sipos wan long olgeta i sik, tingbaot olgeta mo askem sipos oli nidim help. Taem wan niufala famle i muf i kam long eria blong yu, i gud blong go talem halo long olgeta. Kaengud fasin blong yu i save pulum narafala blong gat gudfala tingting long saed blong yumi, mo i mekem Jeova i glad.—Hib. 13:16.
4 Klinim Ples Mo Haos Blong Yu: Blong givim gudfala witnes long ol man raonabaot long yu, yu mas klinimgud haos blong yu. Wan haos mo yad we i klin mo i no olbaot, i soemaot fasin blong yumi. Be wan haos we i doti mo we olting i stap olbaot, i save daonem mesej blong Kingdom we yumi stap talemaot. Taswe i impoten tumas blong meksua se haos, yad, mo trak blong yu oli klingud.
5 I gud we yumi soem se yumi tingbaot olgeta we oli no memba blong Kristin kongregesen. Long rod ya, yumi pruvum se yumi lavem olgeta we oli stap raonabaot long yumi. ?Wanem risal i save kamaot from fasin ya? Yes, taem “oli luk ol gudfala wok blong yufala,” bambae sam long olgeta oli “leftemap nem blong God.”—1 Pita 2:12.