?Yu Save Go Long Ples We i Nidim Moa Man Blong Prij?
1 ?Samtaem yu bin tingbaot blong muf i go long ples we i nidim moa man blong talemaot Kingdom? ?Sipos oli askem long yu se, “plis yu kamkros . . . yu givhan long mifala,” bambae yu mekem olsem aposol Pol? (Wok 16:9, 10) Plante kongregesen oli nidim ol famle we oli strong long saed blong spirit, ol paenia blong halpem olgeta blong wokem teritori, no oli nidim ol elda mo ol man blong givhan we oli nafgud blong lidim kongregesen. Long sam teritori, i gat plante vilej longwe long bus mo plante aelan. Maet Haos Kingdom we i klosap long ol ples olsem, i stap plante kilometa longwe. Maet i had blong faenem wok long ol ples ya. ?Yu yu rere blong muf i go long wan ples olsem? ?Mo olsem wanem yu save mekem wan gudfala wok long ples ya?
2 Nidim Bilif Mo Tras Long God: God i lidim Ebram, woman blong hem, nefiu blong hem, mo olfala papa blong hem, Tera, oli aot long taon ya Uru, blong oli go long Haran we hem i 1,000 kilometa longwe. (Jen. 11:31, 32; Neh. 9:7) Taem Tera i ded, Ebram i gat 75 yia blong hem. Nao Jeova i givim oda long hem blong aot long Haran wetem ol famle blong hem, mo go long wan kantri we God bambae i soemaot long hem. Ebram, Sarae, mo Lot, “oli aot.” (Jen. 12:1, 4, 5) I tru se, Ebram i no muf i go long ples we i nidim moa man blong prij. Be blong muf i go long narafala ples, hem i nidim wan samting. ?Wanem samting ya?
3 Ebram i nidim bilif mo tras long God. Hem i mas jenisim tingting mo fasin blong laef blong hem. Hem i harem se i stap sefgud klosap long ol famle blong hem, be hem i mas lego olgeta. Hem i trastem Jeova se bambae hem i lukaotgud long hem mo famle blong hem. Plante man tede tu, oli soemaot long sem fasin se oli trastem Jeova.
4 Mekem Wok Blong Smoltaem: ?Yu yu kasem finis ol sas blesing we oli kamaot taem yu prij long wan teritori farawe? Long sam kantri las yia, plante taosen pablisa oli bin givhan long plante handred kongregesen we oli no naf blong wokem fulwan teritori blong olgeta. Hemia i minim se sam long ol pablisa ya oli mas mekem ol longfala trip. ?Traehad blong olgeta i karem frut?
5 Wan brata i raetem se: “Taem oli askem long mi blong tekem wan grup blong ol pablisa i go prij long wan teritori farawe, mi mi fraet lelebet. Be biaen, mi mi agri blong go mo naoia mi no sore from. Trip ya i jenisim laef blong mi. Evri dei, mi talem tangkiu long Jeova from janis we mi bin gat blong joen long wok ya.” Wan narafala brata we i stap long trutok 20 yia finis, i talem se, long olgeta samting we i hapen long ol yia ya, hemia wan samting we bambae i neva save fogetem. Wan yangfala i talem se: “!Hemia beswan samting we i bin hapen long laef blong mi!” Bighaf blong ol pablisa oli agri se smoltaem ya we oli wok long ples we i nidim moa man blong prij, i mekem se oli gat moa tangkiu from minista wok. Traem storian wetem olgeta we oli joen long wok ya finis. Bambae yu luk se oli kam strong moa long saed blong spirit, mo sipos oli gat janis bambae oli mekem wok ya bakegen.
6 Olgeta we oli go smoltaem blong prij long ol ples we i nidim moa man, oli luk se samting ya i givhan long olgeta long wan narafala rod tu. Yes, oli kasem plante save we i givhan long olgeta “blong kaontem praes” bifo we oli muf i go long wan narafala ples.—Luk 14:28, NW.
7 Jeova i gat strong tingting ya se ol man oli mas talemaot gud nius “long olgeta ples long wol” bifo we en i kam. (Mat. 24:14) ?From we yu save samting ya finis, yu yu rere blong muf i go long ples we oli nidim moa man, sipos yu naf blong mekem olsem? I gat plante ples we oli gat nid. Seket elda blong yu i save talem weples yu save givhan.
8 Muf i Go Long Ples We i Gat Nid: ?Yu yu ritae finis long wok blong yu? ?Sipos yu muf, bambae yu gat naf mane blong sapotem yu evri manis? ?Sipos no, yu save statem prapa bisnes blong yu? ?Yu save gohed wetem bisnes blong yu tru long telefon no kompiuta nomata wanem ples yu stap long hem? ?Sipos yu no save muf i go long wan narafala ples, yu save givhan long wan memba blong famle blong yu blong mekem olsem?
9 Sipos yu bin prea mo tingting dip long samting ya, nao yu harem se yu naf blong muf i go long ples we i nidim moa man blong prij, tokbaot samting ya wetem famle blong yu mo wetem ol elda long kongregesen blong yu. Biaen, raetem wan leta mo pasem i go long ol elda long kongregesen, blong olgeta tu oli save raetem tingting blong olgeta mo sanem i go long branj ofis.
10 ?Bambae yu talem wanem long leta blong yu? Yia we yu yu gat, det we yu yu tekem baptaes, wok we yu stap mekem long kongregesen, sipos yu mared no nogat, mo sipos yu gat pikinini we oli skul yet. Skelemgud wanem we yu nidim, mo talem nem blong ples we yu wantem go long hem. ?Yu yu yusum wan narafala lanwis?
11 ?Yu yu gat strong tingting long saed blong wok blong prij mo yu yu rere blong soemaot strong tingting ya? ?Ol samting long laef blong yu oli stret blong yu muf i go long ples we i nidim moa man blong prij? !Sipos yes, tingbaot ol bigfala blesing we Jeova bambae i gohed blong givim long olgeta we oli trastem hem, mo olgeta we oli soemaot se oli rere blong lego samting we olgeta nomo i wantem!—Sam 34:8; Mal. 3:10.