?Wan Samting i Mekem We Yu No Prij Plante?
1 Klosap olgeta man oli bisi. Be ol Witnes blong Jeova oli moa bisi long ol narafala man, from we oli stadi long Tok blong God, oli go long ol miting blong kongregesen, mo oli joen long wok blong prij. Antap long ol samting ya, yumi bisi long wok blong winim naf vatu blong laef, wok long haos, wok long skul, mo plante narafala wok we oli tekem taem blong yumi. Samting ya i wan bigfala traem moa long ol hed blong famle.
2 Long plante ples naoia, laef i had long saed blong mane. Taswe, plante hed blong famle oli mas wok moa aoa mo hadwok moa blong kasem ol samting we famle blong olgeta i nidim. Sipos wok blong olgeta i tekem bighaf blong taem mo paoa blong olgeta, bambae i gat smol taem nomo i stap blong oli save prij. From we ol hed blong famle oli mas givim ol samting we famle i nidim, sam long olgeta oli ting se oli save prij smol nomo. (1 Tim. 5:8) I tru, i no isi tede blong kasem ol samting we yumi nidim blong laef. Be wok blong yumi blong winim mane i no nid blong kam wan samting we i blokem yumi blong talemaot gud nius. (Mak 13:10) Taswe, i gud we yumi traem skelem laef blong yumi.
3 Maet hed blong famle i tingbaot blong wok plante mo putum sam vatu i stap, from we wol ya i stap jenis mo yumi no save wanem trabol bambae i kasem yumi long fiuja. (1 Kor. 7:31) Sipos yumi wok moa, maet i luk olsem we yumi save gat plante moa samting mo gat moa janis blong spel mo pleplei. ?Be, samting ya bambae i mekem famle i moa glad? Bambae oli harem gud moa sipos i no moa gat plante taem blong oli mekem ol samting long saed blong spirit mo blong oli go long ol miting? Yumi mas stap longwe long eni samting we i save spolem yumi long saed blong spirit. Yumi waes sipos yumi folem advaes blong Jisas blong ‘hivimap ol gudgudfala samting long heven,’ mo kam ‘rijman long fes blong God.’—Mat. 6:19-21; Luk 12:15-21.
4 Lukaot Kingdom Fastaem: Jisas i tijim ol man blong hem blong putum ol samting long saed blong spirit fastaem long ol narafala samting. Hem i se: “I nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ ” ?From wanem hem i talem olsem? Hem i eksplenem se: “Papa blong yufala long heven, hem i save we yufala i mas gat olgeta samting ya.” Sipos yumi rili bilivim tok ya, bambae i no gat wan samting we i save blokem yumi blong obei long nekis tok blong Jisas: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu [nid long saed blong bodi] long yufala.” !God bambae i meksua se yumi gat ol samting ya! (Mat. 6:31-33) Naoia, i no stret taem nating blong tingting tumas long wok blong winim vatu, no blong wantem tumas blong haremgud mo stap gud long wan wol we klosap bambae i lus.—1 Pita 5:7; 1 Jon 2:15-17.
5 Bigfala risen blong wok blong yumi, i blong givim ol samting we yumi nidim blong stap laef. ?Be yumi nidim wanem samting? Aposol Pol i raetem se: “Sipos yumi gat kakae blong yumi mo klos blong yumi, hemia i naf, yumi save harem gud.” ?Be, yumi stap traehad blong kasem moa yet? Sipos yes, maet yumi stap karem nogud frut we Pol i givim woning from, i se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.” (1 Tim. 6:8, 9; Mat. 6:24; Luk 14:33) ?Olsem wanem blong luksave sipos tingting ya blong wantem tumas samting i stap blokem yumi?
6 Sipos yumi stap joen smol nomo long wok blong prij from we yumi bisi tumas long ol narafala samting, no sipos yumi no rere blong lego sam samting we yumi nomo i wantem blong talemaot gud nius, ale, maet yumi mas jenisim sam tingting blong yumi long saed blong wanem nao i moa impoten long laef. (Hib. 13:15, 16) Blong tekemaot samting we i stap blokem yumi blong prij plante, i gud we yumi traem mekem laef blong yumi i kam klia moa, yumi no folem wan fasin blong laef we i nidim plante sas samting. Yumi mas yusum taem mo paoa blong yumi blong mekem ol wok long saed blong Kingdom fastaem.
7 Wok We i Mas Gat Frut Blong Hem: Pol i leftemap tingting blong yumi se ‘oltaem yumi mas wok strong long ol wok ya blong Masta blong yumi, from we yumi save finis, se taem yumi wok blong Masta ya blong yumi, be wok ya bambae i mas gat frut blong hem.’ (1 Kor. 15:58) “Wok ya blong Masta blong yumi” we i impoten moa, hemia wok blong talemaot Kingdom mo pulum ol man blong oli kam disaepol. (Mat. 24:14; 28:19, 20) Blong joen fulwan long wok ya, yumi mas makemaot taem blong prij evri wik, mo yumi mas traehad blong no yusum taem ya blong mekem wan narafala samting. (Efes. 5:15-17) Olsem nao, wok blong winim vatu no eni narafala samting bambae i no save blokem yumi blong prij.
8 Taem yumi yusum taem mo paoa blong yumi blong serem trutok blong Baebol wetem ol narafala, yumi kasem nambawan glad ya we i kamaot from fasin blong givim presen i go long narafala. (Wok 20:35) Sipos yumi wok plante blong talemaot Kingdom, yumi save putum tingting blong yumi i stap strong long wan gudfala fiuja, from we ‘God i stap mekem i stret nomo. Mo hem i no save fogetem ol wok ya we yumi mekem. Hem bambae i stap tingbaot we yumi lavem hem.’—Hib. 6:10.