Kasem Moa Glad Long Wok Blong Prij
1 ?Yu yu stap kasem glad taem yu joen long wok blong talemaot gud nius? Sipos yumi no lukaot gud, rabis wol ya i save mekem se yumi sem blong prij, nao yumi lusum glad long wok ya. Taem yumi stap prij long ol man we oli no wantem lesin, samting ya tu i save mekem tingting blong yumi i kam slak. ?Wanem samting we yumi save mekem blong kasem moa glad from wok blong prij?
2 Holem Wan Gudfala Tingting: Sipos yumi holem wan gudfala tingting, samting ya bambae i givhan bigwan long yumi. Wan rod blong mekem olsem, i blong tingting dip long nambawan blesing we yumi gat blong “joen wetem God blong mekem wok blong hem.” (1 Kor. 3:9) Jisas tu i stap wetem yumi long wok ya. (Mat. 28:20) Mo hem i sapotem yumi wetem wan bigfala ami blong ol enjel. (Mat. 13:41, 49) From samting ya, yumi save bilif strong se God i stap lidim yumi long wok ya. (Rev. 14:6, 7) !Taswe, nating se sam man oli no laekem wok blong yumi, be long heven i gat bigfala glad!
3 Rere Gud: Sipos yumi rere gud from wok blong prij, bambae yumi kasem moa glad. I no hadwok tumas blong rere gud. Yu nidim nomo blong tekem smoltaem blong mekem rere wan poen blong tokbaot long ol niufala magasin no long buk we yumi stap seremaot. Jusum wan fastok long haf blong Kingdom Wok Blong Yumi se “?Yumi Tokbaot Wanem Long Ol Magasin?” Lukluk pepa we i stap insaed long Kingdom Wok blong Jenuware 2002, ol “Fastok Blong Yusum Long Wok Blong Prij.” Mo tu, yu save luk long Reasoning buk blong faenem wan gudfala fastok. Sipos yu faenem i had blong ansa long wan tok we plante man oli stap sakem, mekem rere wan ansa we i soemaot se yu stap lesin long samting we oli talem, mo we i lidim storian i go long wan samting we i save pulum intres blong olgeta. Reasoning buk i givhan gud long saed ya. Sipos yumi yusum ol buk olsem, samting ya bambae i givim strong tingting we yumi nidim blong prij wetem glad.
4 Prea Wetem Fulhat: Yumi mas prea blong kasem glad we i stap oltaem. From we yumi stap mekem wok blong Jeova, yumi mas askem long hem blong givim tabu spirit blong hem. Wan frut blong spirit ya, hemia glad. (Gal. 5:22) Jeova bambae i givim paoa long yumi blong gohed blong prij. (Fil. 4:13) Sipos yumi prea long saed blong wok blong prij, samting ya i save halpem yumi blong holem stret tingting taem samfala oli no lesin no oli agensem yumi. (Wok 13:52; 1 Pita 4:13, 14) Sipos yumi fraet smol, prea i save givhan long yumi blong mekem tingting blong yumi i strong mo gohed wetem glad.—Wok 4:31.
5 Wokem Rod Blong Storian: I tru, yumi kasem moa glad long wok blong prij taem yumi save faenem ol man long haos mo givim witnes long olgeta. Maet wok blong yu i karem moa frut sipos yu traem jenisim program blong yu lelebet. Ating yu save jusum wan defren taem blong prij long ol haos wanwan, maet long aftenun no long sapa. Mo tu, taem yu wokbaot long rod blong go long taon, long stoa, taem yu ron long bas, no taem yu stap long ol ples blong spel, yu stap luk ol man. I gud blong mekem rere wan sot fastok mo traem storian smol wetem olgeta we yu luk se oli glad blong toktok. Long ples blong wok no long skul, yu stap storian evri dei wetem ol man. Ating yu save givim wan witnes sipos yu stat storian long wan poen blong Baebol we i save pulum intres blong olgeta. I gat sam gudfala tingting oli stap long fas pej blong pepa we i stap insaed long Kingdom Wok blong Yumi blong Jenuware 2002. Eniwan long ol rod ya oli save mekem se yu kasem moa glad from wok blong prij.
6 !Glad i stap givhan long yumi blong stanap strong longtaem, taswe i impoten tumas we yumi glad oltaem! Sipos yumi traehad blong gat fasin ya, bambae yumi kasem bigfala blesing taem wok ya we bambae yumi neva gat janis blong mekem bakegen, i finis. Tingting ya nomo i save mekem yumi glad moa blong prij.—Mat. 25:21.