Yumi Joen Olsem Wan Bodi Nomo
1 Ating plante taem yu yu stap tingting dip long nambawan wei we God i wokem bodi blong yumi. (Sam 139:14) Ol wanwan haf blong bodi oli wok tugeta. Tok blong God i talem se Kristin kongregesen i olsem wan bodi we ol haf blong hem oli wok gud tugeta. Ol memba blong kongregesen oli wok aninit long Hed blong olgeta, Jisas Kraes. “Hem i stap mekem yumi joen blong kam wan bodi nomo. Mo ol joen blong bodi ya oli stap holem bodi ya, blong i stap strong oltaem.” (Efes. 4:16b) From we ol man blong Jeova oli joen gud, Hem i save yusum olgeta blong mekem ol bigbigfala wok.
2 Ol memba blong kongregesen long faswan handred yia, oli “joen gud long wan grup nomo,” blong givgivhan long olgeta long saed blong spirit mo bodi. (Wok 2:44-47) Wetem help blong Jeova, oli joen olsem wan bodi blong fesem mo winim ol strong trabol. (Wok 4:24-31) Oli talemaot Kingdom long evri ples we oli go long hem. Oli talemaot gud nius long olgeta ples blong wol we ol man oli save long olgeta long taem ya. (Kol. 1:23) Tede, Kristin kongregesen we i wok olsem wan bodi nomo, i mekem sem samting be long fasin we i bigwan moa. ?Wanem ol samting we i mekem se yumi joen olsem wan bodi nomo?
3 Tijing Blong God i Mekem Yumi Joen Gud: Long olgeta ples blong wol, wosip blong yumi i mekem yumi joengud. ?Samting ya i kamtru olsem wanem? Yumi luksave rod we Jeova i stap yusum long wol ya blong givim ‘kakae long saed blong spirit long stret taem blong hem.’ (Mat. 24:45) Mo tu, yumi tinghae long ‘ol man we oli olsem presen’ we hem i putumap olgeta blong oli tijim kongregesen. Taem yumi gat tingting daon mo yumi glad long ol rod we Jeova i yusum blong givim kakae long yumi long saed blong spirit, ale yumi kasem save moa long Tok blong God. Nao samting ya i wokem semfala tingting long yumi evriwan, hemia blong wantem folem ol fasin blong Jisas olsem ol disaepol blong hem. Yumi mas gohed oltaem blong stadi long Tok blong God, mo traehad fulwan blong “kam wan nomo” long saed blong bilif. (Efes. 4:8, 11-13) ?Yu yu stap ridim Baebol evri dei, blong mekem se yu givhan moa blong yumi joen olsem wan bodi?
4 Ol Kristin Miting Oli Mekem Yumi Joen Gud: Lav i pulum yumi blong joen gud long ol Kristin miting. Long ples ya, “yumi stap tingbaot yumi.” (Hib. 10:24, 25) Hemia i no min se yumi stap lukluk ol brata sista blong yumi nomo. Yumi mas traem save gud olgeta. Yumi traem luk olgeta olsem we Jeova i stap luk olgeta, hemia se oli sas. (Hag. 2:7, futnot, NW) Taem yumi lesin long ol tok we ol brata sista oli talem blong soemaot bilif, yumi lavem olgeta moa, mo yumi joen gud moa wetem olgeta. ?Olsem wanem? ?Ol narafala oli stap luk yu oltaem long ol miting blong kongregesen?
5 Joen Tugeta Blong Prij: Taem yumi joen wetem ol Kristin brata blong yumi blong talemaot gud nius, yumi wok olsem wan bodi nomo blong mekem samting we God i wantem. Aposol Pol i bin laekem tumas olgeta we oli ‘givhan long hem blong talemaot Kingdom blong God.’ (Kol. 4:11) Taem yumi wokbaot blong prij, i gud blong tokbaot ol samting we i kamaot long wok blong prij, mo blong traem givgivhan long yumi. Samting ya bambae i halpem yumi blong finisim gud ol Kristin wok blong yumi, mo bambae i mekem se yumi joen gud moa.—Kol. 3:14.
6 Tabu Spirit i Mekem Yumi Joen Gud: Taem yumi traehad blong mekem samting we Jeova i wantem, Hem i blesem yumi wetem tabu spirit blong hem. Samting ya i givhan long yumi blong fogetem ol smosmol rong we narafala i mekem long yumi, nao yumi gohed nomo blong joen gud. (Sam 133:1) Tabu spirit “i stap mekem yumi evriwan i joen gud, mo hem i givim pis long yumi.” (Efes. 4:3) Yumi wanwan i save mekem fasin joen gud i gru moa long kampani blong ol man blong God, sipos yumi soemaot ol frut blong tabu spirit long ol narafala.—Gal. 5:22, 23.
7 Taem yumi wok olsem wan bodi nomo aninit long Hed blong yumi, Kraes, “yumi stap lavlavem yumi, [nao] bodi ya blong Kraes i save kam strong moa.” (Efes. 4:16b) Mo tu, yumi givim ona long Jeova God, we “i stamba blong pis.”—Rom 16:20.