Soem Kristin Fasin Blong Stap Tru Long God Taem Kongregesen i Putumaot Wan Famle Blong Yumi
1. ?Wanem samting i save traem fasin blong Kristin blong stap tru long God?
1 Ol memba blong famle oli laeklaekem olgeta tumas. Hemia i mekem wan bigfala traem i kamaot long ol Kristin we kongregesen i putumaot hasban no waef blong olgeta, wan pikinini blong olgeta, papa no mama blong olgeta, no wan narafala famle blong olgeta, no taem wan long famle i raetem leta se hem i no moa wantem stap insaed long kongregesen. (Mat. 10:37) ?Ol Kristin we oli stap tru long God oli mas mekem wanem long ol famle olsem? ?Olsem wanem sipos hem i wan famle we i stap wetem yu long haos? ?Ol samting i defren? Fastaem, bambae yumi luk wanem we Baebol i talem long saed ya. Ol rul ya blong Baebol oli sem mak long man we kongregesen i putumaot, mo man we hem nomo i talemaot se hem i no moa wantem joen long kongregesen.
2. ?Baebol i talem se ol Kristin oli mas mekem olsem wanem long olgeta we kongregesen i putumaot?
2 ?Bambae Yumi Mekem Olsem Wanem Long Olgeta?: Tok blong God i talem long ol Kristin se oli no mas kampani no joen wetem wan man we kongregesen i putumaot. Hem i se: “Yufala i no mas go joen wetem ol man ya [“eniman,” NW ] we oli stap talem se oli brata blong yumi, be oli stap mekem ol sin ya. Sipos oli stap mekem ol fasin nogud wetem woman, no oli stap wantem tumas samting, no oli stap prea long ol narafala god, bambae yufala i no go joen wetem olgeta. Sipos oli stap spolem nem blong narafala man, no oli stap dring we oli lusum hed, no oli stap stil, bambae yufala i no go joen wetem olgeta. Bambae yufala i no go sidaon wetem ol man olsem blong kakae wetem olgeta. . . . Man we i stap mekem sin oltaem, yufala i mas putumaot hem, blong hem i no moa save stap wetem yufala.” (1 Kor. 5:11, 13) Tok blong Jisas long Matiu 18:17 tu i stret long bisnes ya: “Yu mas mekem long hem [brata we kongregesen i putumaot] olsem we hem i wan hiten man, no wan man blong tekem mane blong takis.” Ol man we oli harem tok ya blong Jisas oli save se ol man Jiu long taem blong hem oli no joen nating wetem ol man blong narafala laen [hiten man], mo se oli stap longwe long ol man blong tekem mane blong takis. Taswe, yumi luksave se Jisas i stap tijim ol man blong hem se oli no mas joen wetem olgeta we kongregesen i putumaot.—Lukluk Wajtaoa, Septemba 15, 1981, pej 18-20.
3, 4. ?I tabu blong joen olsem wanem wetem ol man we kongregesen i putumaot, no we olgeta nomo oli talem se oli wantem aot?
3 Hemia i min se ol Kristin we oli stap tru long God oli no tokbaot eni samting long saed blong spirit wetem wan man we kongregesen i putumaot. Be i no hemia nomo. Tok ya blong God i talem tu se yumi “no go sidaon wetem ol man olsem blong kakae wetem olgeta.” (1 Kor. 5:11) Taswe, yumi no kampani wetem wan man we kongregesen i putumaot. Hemia i min se yumi no joen wetem hem long wan piknik, lafet, spot, wokbaot long taon, sinema, no kakae wetem hem long haos no long restoron.
4 ?I stret blong toktok long wan man we kongregesen i putumaot? Baebol i no talem evri smosmol poen, be 2 Jon 10 i givhan long yumi blong luksave tingting blong Jeova long saed ya. Vas ya i talem se: “Sipos wan man i kam long yufala, be hem i no tijim yufala long ol stret tok ya we Kraes i tijim yumi long hem, bambae yufala i no tekem hem i kam insaed long haos blong yufala. Sipos man olsem i kam, be bambae yufala i no talem halo long hem.” Wajtaoa blong Septemba 15, 1981, pej 25, i tokbaot poen ya se: “Taem yu talem ‘halo’ long wan man, hemia faswan step blong storian wetem hem mo maet blong kam wan fren blong hem. ?Bambae yu wantem tekem faswan step ya wetem wan man we kongregesen i putumaot?”
5. ?Wan man we kongregesen i putumaot, hem i lusum wanem bigfala samting?
5 Yes, samting we pej 31 blong semfala Wajtaoa ya i talem, i tru tumas: “Taem wan Kristin i letem sin i kam bos long laef blong hem mo kongregesen i putumaot hem, hem i lusum plante bigfala samting: God i no moa glad long hem, . . . hem i no moa save harem gud blong joen wetem ol Kristin brata blong hem, mo blong joen fulwan wetem Kristin famle blong hem tu.”
6. ?Wan Kristin i no mas joen nating wetem wan famle we i stap long sem haos be kongregesen i putumaot hem? Eksplenem.
6 Wan We i Stap Long Haos: ?Hemia i min se ol Kristin we oli stap long sem haos wetem wan we kongregesen i putumaot, oli no save toktok, kakae, mo joen wetem hem taem oli mekem ol samting ya long evri dei laef blong olgeta? Wajtaoa blong Eprel 15, 1991, long futnot blong pej 22, i talem olsem: “Sipos kongregesen i putumaot wan famle blong wan Kristin we i stap long semfala haos, man ya i save joen yet long ol samting mo wok long haos we famle i mekem evri dei.” Taswe, maet famle i tekem disisen se i no nid blong blokem hem blong i no kakae wetem olgeta mo mekem ol narafala wok insaed long famle. Be long semtaem, oli no wantem givim tingting long ol narafala man se evri samting i sem mak nomo olsem fastaem, taem kongregesen i no putumaot hem yet.
7. ?Olsem wanem fasin joen long saed blong spirit i jenis insaed long famle taem kongregesen i putumaot wan long olgeta?
7 Long saed blong hemia we kongregesen i putumaot no we hem nomo i talemaot se hem i wantem aot long kongregesen, Wajtaoa blong Septemba 15, 1981, pej 28, i talem se: “Naoia, fasin joen long saed blong spirit i brok fulwan. Hemia i sem mak insaed long famle, mo insaed long prapa famle we oli stap long sem haos. . . . From samting ya, famle i mas jenisim fasin joen long saed blong spirit we fastaem i stap long haos ya. Olsem nao, sipos kongregesen i putumaot hasban blong famle, woman blong hem mo ol pikinini bambae oli harem i no stret sipos hem i lidim famle Baebol stadi, Baebol riding, no i mekem prea blong olgeta. Sipos hem i wantem prea, olsem bifo kakae, hem i gat raet blong mekem prea long prapa haos blong hem. Be ol narafala long famle oli save mekem prapa prea blong olgeta long tingting blong olgeta. (Prov. 28:9; Sam 119:145, 146) ?Olsem wanem sipos hemia we kongregesen i putumaot, i wantem stap taem famle i joen blong ridim Baebol no mekem famle stadi? Maet ol narafala long famle oli letem hem i stap blong lesin, sipos hem i no traem blong tijim olgeta no serem ol tingting blong hem long saed blong spirit.”
8. ?Wanem wok we ol Kristin papa mama oli gat yet, long saed blong wan pikinini we i stap long haos blong olgeta be kongregesen i putumaot hem?
8 Sipos kongregesen i putumaot wan yangfala we i no gat naf yia folem loa blong aot long haos blong papa mama blong hem, Kristin papa mama ya i gat wok yet blong tijim mo lukaot long hem. Wajtaoa blong Novemba 15, 1988, pej 20, i talem se: “Bambae tufala i gohed blong givim kakae, klos, mo ples blong slip long hem. Long sem fasin, tufala i mas gohed blong tijim mo stretem hem folem Tok blong God. (Prov. 6:20-22; 29:17) Maet ol papa mama we oli gat lav, oli mekem plan blong stadi Baebol wetem hem, nating se kongregesen i putumaot hem finis. Maet stadi i givhan moa blong stretem hem sipos tufala i mekem stadi wetem hem wan nomo. Sipos no, maet tufala i talem se hem i save gohed blong joen long famle stadi.”—Mo tu, lukluk Wajtaoa blong Oktoba 1, 2001, pej 16-17.
9. ?Wan Kristin i save joen olsem wanem wetem wan famle we i no stap long haos be kongregesen i putumaot hem?
9 Ol Famle We Oli No Stap Long Sem Haos: Wajtaoa blong Eprel 15, 1988, pej 28 i talem se: “Ol samting i defren sipos hemia we kongregesen i putumaot no we hem nomo i talem se hem i wantem aot long kongregesen, i no stap long haos wetem prapa famle blong hem. Maet klosap oli no nid blong joen wetem hem nating. Mo taem oli mas toktok long saed blong wan bisnes blong famle, long taem ya tu bambae oli toktok smol nomo wetem hem.” Hemia i stret long tok blong God se oli no mas ‘joen wetem eniman’ we i no tanem tingting blong hem, be i gohed nomo blong mekem sin. (1 Kor. 5:11) Ol Kristin we oli stap tru long God oli mas traehad blong no joen blong nating nomo wetem wan famle olsem. Mo long saed blong bisnes tu oli mas lukaot se oli mekem bisnes wetem hem taem i gat nid nomo.—Lukluk tu Wajtaoa blong Septemba 15, 1981, pej 29-30.
10, 11. ?Wan Kristin bambae i skelem wanem samting bifo we hem i letem wan famle we kongregesen i putumaot, i kam stap long haos?
10 Wajtaoa i tokbaot wan narafala samting we i save kamaot tu, i se: “?Olsem wanem nao sipos kongregesen i putumaot wan prapa famle blong yumi, olsem wan pikinini no papa mama blong yumi we i stap long defren haos, be biaen hem i wantem kam stap bakegen long haos blong yumi? Famle i save lukluk gud ol samting we i joen wetem bisnes ya mo tekem wan disisen. Olsem nao, sipos kongregesen i putumaot papa no mama blong famle, be biaen hem i sik, i no moa save winim naf mane blong laef, mo i no moa save lukaot long hem wan. Baebol i putum wok long ol pikinini blong hem we oli Kristin, blong oli givhan long hem. (1 Tim. 5:8) . . . Samting we oli mekem blong hem, bambae i dipen long ol nid blong hem, fasin mo tingting blong hem, mo wok we hed blong haos i gat blong mekem famle blong hem i stap gud long saed blong spirit.”—Wajtaoa blong Septemba 15, 1981, pej 28-29.
11 Long saed blong wan pikinini, Wajtaoa ya i gohed olsem: “Sam Kristin papa mama oli bin letem pikinini blong olgeta we kongregesen i putumaot, i kambak long haos blong smoltaem, from we hem i sik long saed blong bodi no i harem nogud tumas long filing blong hem. Be oltaem ol papa mama ya oli mas skelem gud ol samting we i joen wetem bisnes ya. ?Pikinini ya i bin stap hem wan, mo hem i no moa naf blong mekem olsem? ?No hem i wantem kambak nomo from we laef i moa isi wetem famle blong hem? ?Olsem wanem long fasin mo tingting blong hem? ?Bambae hem i karem ‘is’ i kam insaed long famle?—Gal. 5:9.”
12. ?Wanem sam blesing we oli kamaot taem kongregesen i putumaot wan man?
12 Stap Tru Long Jeova Mo Kasem Blesing: Taem yumi obei long plan blong Baebol blong putumaot mo no joen wetem ol man we oli no tanem tingting blong olgeta from sin blong olgeta, samting ya i karem blesing i kam long yumi. Hem i mekem kongregesen i stap klin, mo i soemaot klia se yumi sapotem ol hae rul blong Baebol long saed blong fasin blong laef. (1 Pita 1:14-16) Samting ya i blokem yumi tu, blong ol nogud fasin oli no pulum yumi. (Gal. 5:7-9) Mo i givim janis long man we i mekem rong, blong i karem blesing from fasin stretem we hem i kasem. Fasin ya i save givhan long hem blong ‘kasem frut blong pis, from we [hem i mekem] laef blong hem i stret gud long fes blong God.’—Hib. 12:11.
13. ?Wan famle i mekem wanem jenis, mo wanem frut i kamaot from?
13 Sikis yia finis, kongregesen i putumaot mama blong wan yangfala brata mo sista. Ale, long wan seket asembli, tufala i harem wan tok we i mekem tufala i luksave se tufala i mas jenisim fasin we tufala i stap mekem long mama blong tufala. Stret afta long asembli, yangfala man ya i toktok wetem mama blong hem long telefon, i talem long hem se tufala i laekem hem tumas, be se tufala i no moa save toktok long hem. Bambae tufala i singaot hem nomo sipos i gat wan bigfala trabol no wan akseden. Smoltaem biaen, mama ya i stat kambak long ol miting, mo biaen kongregesen i karem bak hem. Mo tu, man blong hem we i no stap long trutok, i stat stadi mo biaen hem i tekem baptaes.
14. ?From wanem yumi mas stap tru long God mo sapotem kongregesen taem i putumaot wan man?
14 Taem yumi stap tru long God mo sapotem kongregesen we i putumaot wan man, yumi soemaot se yumi lavem Jeova, mo yumi givim ansa long rabis man ya we i stap jikim Jeova. (Prov. 27:11) Mo tu, yumi save sua se Jeova bambae i blesem yumi. King Deved i raetem tok long saed blong Jeova se: “Neva mi mi brekem tok we hem i putum. Olgeta we oli stap obei long yu, oltaem, yu yu stap mekem i gud tumas long olgeta.”—2 Saml. 22:23, 26.