Halpem Ol Narafala Blong Leftemap Jeova
1 Wan impoten mesej i stap goaot long olgeta man blong wol, se: “Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwota mo springwota, mo yufala i mas bodaon long fes blong hem blong mekem wosip long hem.” (Rev. 14:6, 7) Yumi gat bigfala janis blong joen long wok blong talemaot mesej ya. ?Wanem save we ol man oli nidim blong oli naf blong ona gud long God mo leftemap nem blong hem?
2 Nem Blong Hem: Ol man oli nidim blong save nem blong trufala God blong oli save makemaot hem se hem i defren long ol giaman god we ol man oli wosip long olgeta tede. (Dut. 4:35; 1 Kor. 8:5, 6) Ol man blong raetem Baebol oli yusum nambawan nem blong Jeova bitim 7,000 taem. I tru se yumi mas luksave stret taem blong mekem man i save long nem ya blong God, be yumi neva mas haedem nem ya no fraet blong yusum. God i wantem se olgeta man oli save long nem blong hem.—Sam 83:18.
3 Ol Fasin Blong Hem: Blong leftemap nem blong Jeova, ol man oli nidim blong save se hem i wanem kaen God. Yumi mas tijim olgeta long saed blong bigfala lav blong hem, waes blong hem we i bitim olgeta waes blong man, stret fasin blong hem blong jajem man, mo paoa blong hem we i antap olgeta, wetem ol narafala nambawan fasin blong hem tu, olsem fasin sore mo kaengud fasin. (Eks. 34:6, 7) Ol man oli mas lanem tu blong gat gudfala fasin ya blong fraet long God, we i min se oli ona long hem, mo oli mas luksave se blong kasem laef, Jeova i mas glad long olgeta.—Sam 89:7.
4 Kam Klosap Long God: I no longtaem bambae Jeova i jajem wol ya, mo ol man we oli no wantem ded long taem ya, oli mas singaot long Jeova wetem bilif. (Rom 10:13, 14; 2 Tes. 1:8) Hemia i no min se oli save long nem mo ol fasin blong hem nomo. Yumi mas givhan long ol man ya blong oli fren wetem Jeova, mo oli trastem hem wetem fulhat blong olgeta. (Prov. 3:5, 6) Taem oli mekem ol samting we oli lanem i wok long laef blong olgeta, mo oli prea i go long God wetem fulhat blong olgeta, mo oli luksave olsem wanem Jeova i stap givhan long olgeta, ale bilif blong olgeta bambae i kam bigwan moa, mo bambae i pulum olgeta oli kam klosap long hem.—Sam 34:8.
5 I gud yumi wok strong blong talemaot nem blong God mo givhan long ol narafala blong trastem hem fulwan mo blong ona gud long hem. Maet yumi save givhan long plante moa man yet blong oli save Jeova mo leftemap hem olsem ‘God we i stap sevem olgeta.’—Sam 25:5.