Kasem Blesing From Distrik Asembli Ya “Ol Man Blong Talemaot Kingdom We Oli Wok Strong”

¹ Wan Program We i Wekemap Tingting: !Long distrik asembli we i jes pas, yumi haremgud long ol tok blong wekemap tingting blong yumi! Yumi bin joen wanples blong mekem wan samting nomo, hemia blong rere moa blong wok strong blong talemaot Kingdom blong God. ?Yu tingbaot yet olsem wanem brata we i givim faswan tok i eksplenem mining blong tok ya “talemaot”? ?Long haf ya “Yumi No Mas Fraet, Yumi Save Se Jeova i Stap Wetem Yumi,” yu tingbaot yet, wanem samting we brata i pulum yumi blong stadi dip long hem? ?Wanem ol laef stori we yu yu ridim finis?

² Tok ya we i gat tri haf blong hem, “Ol Traem Oli Soemaot Sipos Bilif Blong Yumi i Strong Gud Mo i Tru,” i tokbaot tri bigfala risen from wanem Jeova i letem ol man oli girap agensem yumi. ?Yu save talem trifala risen ya? ?Wanem risen we Baebol i givim blong ol Kristin oli no joen long politik mo ol faet? ?Ol tok ya oli pulum yumi blong mekem wanem blong rere from ol trabol we yumi save kasem taem yumi no joen long politik mo ol faet? ?Olsem wanem yumi presem Jeova taem yumi winim ol traem mo stanap strong long bilif?

³ ?Weswan haf blong drama ya “Stanap Strong Long Taem Blong Trabol” we i mekem bilif blong yu i strong? ?Olsem wanem yumi save mekem sem mak olsem Jeremaea?

⁴ Pablik tok ya, “Fasin Blong Wol Ya i Stap Jenis” i tokbaot ol bigfala jenis we bambae oli kamaot long fiuja blong lidim yumi i go long bigfala dei blong God we bambae i mekem ol man oli fraet. ?Wanem ol bigfala jenis ya? ?Taem yu lesin long laswan tok ya “Mekem Plante Gudfala Wok Olsem Ol Man Blong Talemaot Kingdom We Oli Wok Strong,” yu yu luksave olsem wanem yu save folem ol advaes ya long wok blong prij?

⁵ Ol Bigfala Advaes Blong Folem: ?Tok ya “Soemaot Fasin Tangkiu” i talem se yumi save mekem wanem blong soemaot bigfala tangkiu long Jeova? ?Bigfala tok blong asembli ya, hemia “Ol Man Blong Talemaot Kingdom Oli Wok Olsem Faea We i Laet,” i pulum yumi blong wok strong olsem hu? ?Tok ya i askem long yumi blong jekem wanem samting long saed blong yumi wan?

⁶ ?Tok ya we i gat tri haf blong hem, “Profet Tok Blong Maeka i Mekem Yumi Strong Blong Wokbaot Long Nem Blong Jeova,” i tokbaot wanem trifala samting we yumi mas mekem blong Jeova i glad long yumi? ?Yumi naf blong mekem ol samting ya? (Maeka 6:8) ?Wanem ol fasin we yumi mas stap klin long olgeta, folem tok ya “Lukaot Long Hat Blong Yu Blong Stap Klin Gud”? ?Tok ya “Lukaot Gud Blong No Giaman” i givim woning se yumi no mas giaman long narafala no letem narafala i giaman long yumi long saed blong wanem samting?

⁷ ?Long tok ya we i gat tri haf blong hem, “Ol Man Blong Talemaot Kingdom Oli Tinghae Long Wok Blong Prij,” yu kasem wanem gudfala poen we yu traem finis long wok blong prij? Tok ya “Ol Storian Long Saed Blong Spirit Oli Leftemap Tingting,” i eksplenem Filipae 4:8. ?Olsem wanem vas ya i save givhan long yumi blong joenem ol samting long saed blong spirit oli go long ol storian blong yumi, mo wetaem yumi mas mekem samting ya?

⁸ Tok ya “Trastem Jeova Fulwan Long Taem Blong Trabol,” i tokbaot olsem wanem yumi save stanap strong taem wan trabol i kasem yumi, olsem wan we yumi laekem hem i ded, trabol long mane, sik, trabol long famle, mo ol slak fasin we oli had blong winim. ?Olsem wanem yumi save trastem Jeova taem ol trabol ya oli kasem yumi?

⁹ Ol Niufala Sas Samting Long Saed Blong Spirit: Yumi glad tumas blong kasem niufala buk ya Worship the Only True God. ?Wanem tingting blong yu taem oli eksplenem olsem wanem blong yusum buk ya? ?Olsem wanem buk ya bambae i givhan long yumi blong pulum ol man oli kam disaepol blong Kraes, afta we yumi stadi narafala buk wetem olgeta?

¹⁰ Mo tu, yumi kasem naesfala buk ya Draw Close to Jehovah. ?Wanem sam nambawan samting long buk ya? ?Weswan pija we yu yu laekem moa? ?Taem yu ridim buk ya, yu harem se yu stap kam klosap moa long Jeova? ?Buk ya i save givhan long hu bakegen?

¹¹ Distrik asembli ya “Ol Man Blong Talemaot Kingdom We Oli Wok Strong” i leftemap tingting blong yumi long saed blong spirit, olsem yumi nidim long taem ya we i fulap long trabol. Blong kasem blesing from nambawan kakae ya long saed blong spirit, yumi mas traehad blong holem ol toktok i stap long tingting blong yumi, gat tangkiu from bigfala presen ya we yumi kasem, mo mekem ol advaes we yumi kasem i wok long laef blong yumi. (2 Pita 3: 14) Sipos yumi mekem olsem, bambae yumi holemstrong long God, mo bambae yumi soemaot se yumi man blong talemaot Kingdom we yumi wok strong olsem Masta blong yumi Jisas Kraes. Long rod ya, bambae yumi leftemap nem blong Jeova, i go antap moa.—Fil. 1: 9-11.