Wan Skul We i Mekem Yumi Rere From Wok We i Impoten Moa
1 Yumi skul blong kasem tijing we bambae i givhan long yumi blong mekem ol samting we yumi wantem mekem long laef. ?Be yu ting se i gat wan samting we i moa impoten, i winim we yumi presem God ya we i Givim Laef long yumi, mo givhan long ol narafala blong kasem save long ol plan mo rod blong hem? Nogat. Tiokratik Skul i blong mekem yumi rere blong tijim ol narafala long bilif blong yumi. Taswe, taem yumi joen long Skul ya evri wik, yumi lanem ol samting we oli stap mekem yumi rere from wan wok we i moa impoten i bitim ol narafala wok long laef.
2 Long Kingdom Wok Blong Yumi las manis, yumi kasem “Program Blong Tiokratik Skul Long Yia 2003.” Program ya i eksplenem olsem wanem bambae yumi mekem skul ya. Maet yu faenem i gud blong holem program ya i stap wetem buk ya Benefit From Theocratic Ministry School Education, we yu mas karem i kam long Tiokratik Skul evri wik. Tingbaot sam haf blong Tiokratik Skul long yia 2003.
3 Fasin Blong Toktok: Stat long Jenuware, evri miting bambae i stat wetem wan tok blong faef menet, long saed blong wan fasin blong toktok, no wan fasin blong rid, stadi, no tij. Elda we i lukaot long skul ya bambae i givim tok ya, sipos no, bambae hem i jusumaot wan narafala elda blong givim. Brata we i givim tok bambae i eksplenem wan fasin blong toktok mo soemaot from wanem i impoten. Hem i save ademap sam moa save i bitim wanem we i stap long buk. Hem i save talem sam eksampol blong Baebol long saed blong fasin ya, mo soemaot olsem wanem blong yusum fasin ya blong toktok. Antap moa, hem i mas soem olsem wanem fasin ya i save givhan long yumi long wok blong prij.
4 Tok N. 1: Ol brata we oli mekem tok ya oli mas “givhan long ol man blong luk olsem wanem ol save ya i save wokgud long laef blong olgeta.” Hemia i min se oli mas soem long kongregesen olsem wanem blong yusum save ya. Sipos yu yu mas mekem tok ya, traem ridim ol advaes long pej 48 mo 49 blong buk ya Ministry School, blong save olsem wanem blong mekemrere tok ya. Mo traem stadi long ol haf we oli stap long indeks blong buk ya aninit long smol stamba tok ya “Practical Application” (Olsem Wanem Blong Mekem Save i Wok Long Laef).
5 Program Blong Baebol Riding: Long ol yia we oli pas, maet yu no bin folemgud program blong Baebol riding evri wik. Be long yia ya, i gud blong mekem tingting blong yu i strong blong folem program ya. Olgeta we oli mekem olsemia, bambae oli ridim fulwan Grik haf blong Baebol long wan yia. Blong luk ol gudfala samting we i save kamaot from wan program blong ridim Grik haf blong Baebol, ridim pej 10, haf 4, long buk ya Ministry School.
6 Ol Bigfala Poen Long Baebol Riding: Naoia, tok ya i longfala moa, hem i ten menet. Hemia i blong mekem se wanwan long kongregesen oli save talem sam poen we oli laekem long Baebol riding blong wik. Brata we i mekem tok ya i no mas bitim taem blong hem. Bambae oli mekem tok ya evri wik, wetem wik we oli askem ol kwestin blong tingtingbak tu. Taem yu stap ridim ol japta blong wik, traem lukaot sam poen we bambae oli givhan long yu mo famle blong yu taem yufala i stadi, prij, mo long laef blong yufala. ?Wanem ol fasin we Jeova i soemaot long ol man mo long ol nesen? ?Yu yu lanem wanem samting we i mekem bilif blong yu i strong mo i mekem se yu yu gat moa tangkiu long Jeova? Yu save talem eni poen nomo long ol japta blong Baebol riding, nating se i kamaot long ol vas we brata bambae i ridim long Tok N. 2, from we brata ya bambae i no talem wan toktok blong eksplenem ol vas ya.
7 Tok N. 2: Faswan studen ya evri wik bambae i ridim Baebol long fored blong kongregesen. Bambae hem i ridim wan haf blong Baebol riding blong wik. Long las wik blong manis nomo, samting ya bambae i defren. Long wik ya, bambae hem i ridim wan haf long Wajtaoa. Studen we i mekem riding ya bambae i no talem wan fastok no lastok. Olsem nao, hem i save putum olgeta tingting blong hem long riding ya, mo traehad blong kamgud moa long fasin blong rid.—1 Tim. 4:13.
8 Tok N. 3 Mo N. 4: Sam long ol tok ya, bambae program i talem wanem haf blong Reasoning buk we sista i save yusum be maet haf ya i no givim plante save, mo long sam narafala tok, maet program i no talem wan haf blong buk, be bambae i givim stamba tok nomo. Olgeta we oli kasem wan tok we Reasoning buk i no givim plante save long hem, no we i gat wan stamba tok nomo, oli gat janis blong rerem tok blong olgeta folem ol save we olgeta nomo oli faenem long ol Kristin buk. Maet samting ya i mekem i isi moa long ol sista blong jenisim toktok blong olgeta blong mekem i stret long samting we ol woman blong haos oli talem.
9 ?Bambae Yu Toktok Long Wanem Kaen Man?: Olsem pej 45 blong buk ya Ministry School i talem, maet brata we i lukaot long skul nomo i talem wanem kaen man bambae yu toktok long hem. Sipos no, ol sista oli save jusum long lis we i stap long pej 82. Sipos ol sista wanwan oli mekem wan tok evri tu manis, oli save finisim ol 30 poen long lis ya long faef yia. Poen namba 30 hemia, “Toktok long man we yu stap mitim plante long ples blong yu.” Taem ol sista oli jusum poen ya, oli mas raetem wanem kaen man nao bambae oli toktok long hem, long pepa we brata i givim taem oli kasem tok ya (S-89). Brata we i lukaot long skul bambae i raetem det blong tok long pej 82 blong buk blong studen, klosap long poen we i soem wanem kaen man we studen i jusum blong toktok long hem. Brata ya i save mekem samting ya long semtaem we hem i makem pepa blong givim advaes.
10 Pepa Blong Advaes: Pepa blong givim advaes i stap finis long buk blong yu, long pej 79-81. Taswe, afta we yu givim wan tok, yu mas soem buk blong yu long brata we i lukaot long skul. Brata ya bambae i mas raetem wan kopi blong poen we studen i stap wok long hem, mo holem i stap blong hem wan.
11 Tingtingbak: Long taem blong tingtingbak long ol bigfala poen blong Tiokratik Skul, bambae brata nomo i askem ol kwestin blong tingtingbak, yumi no moa raetem daon long pepa. Bambae hem i mekem olsem wan taem long tu manis. Ol kwestin ya oli blong 30 menet. Olsem oltaem, ol kwestin we hem i yusum bambae oli stap long Kingdom Wok Blong Yumi. Sipos wik blong ol kwestin i foldaon long wik blong seket asembli no wik we seket elda i stap, bambae kongregesen i folem program blong nekis wik, mo bambae oli seftem ol kwestin i go long wik biaen.
12 Ol Narafala Klas: Long ol kongregesen we i gat moa long 50 man long Tiokratik Skul, maet ol elda oli mekem bitim wan klas. “Long ol narafala klas, maet olgeta studen oli givim tok, no maet i gat tok N. 3 mo 4 nomo.” (Ministry School, pej 285) Ol klas we oli mekem tok N. 3 mo 4 nomo, hemia i blong halpem ol kongregesen we oli gat plante sista long olgeta, be maet oli no gat plante brata blong mekem Baebol riding. Ol elda oli mas jusumaot ol brata we oli nafgud blong oli lukaot long ol narafala klas ya.
13 Namba Tu Man Blong Givim Advaes: Olsem Program Blong Tiokratik Skul i talem, ol elda bambae oli jusumaot namba tu man blong givim advaes. Brata ya bambae i givim advaes long ol elda mo ol man blong givhan we oli givimaot ol bigfala poen blong Baebol riding mo Tok N. 1, be bambae hem i no givim advaes ya long fored blong kongregesen. Brata we oli jusumaot blong mekem wok ya, i mas wan brata we i holem wok longtaem long kongregesen, mo wan brata we ol narafala elda bambae oli respektem advaes blong hem. Hem i mas givim advaes we i leftemap tingting. Hem i save talem sam gudfala tok from gudfala fasin blong toktok mo tij we brata i mekem, mo i save talem wan no tu poen we brata i save kamgud moa long hem. I no nid blong hem i givim advaes evritaem long wan brata we i stap givim plante tok oltaem. Be hem i mas luksave mo kasem save se, nating we ol brata oli naf blong givim ol pablik tok, be oli save kamgud moa yet long ol tok blong olgeta.—1 Tim. 4:15.
14 ?Givim Advaes Long Wanem?: ?Wanem i save givhan long man we i stap givim advaes, blong hem i skelemgud wan tok? Long bighaf blong ol 53 japta long buk ya Ministry School, long namba tri bokis long ol japta ya, i gat sam poen we hem i save lukaotem. Hem i mas makem ol narafala poen mo advaes long buk ya tu, we oli save givhan long hem blong luksave kwiktaem sipos hemia we i givim tok i bin putum ol poen long stret oda, mo sipos tok blong hem i karem frut. Olsem nao, hem i save makem ol kwestin we oli stap antap long pej 55, mo ol tingting long laswan haf blong pej 163.
15 Fulumap Ol Emti Ples: Buk ya Ministry School i gat emti ples long tufala saed blong ol pej, mo sam narafala emti ples tu. Oli blong yu save raetem sam smosmol not taem yu stadi yu wan mo taem yu stap long Tiokratik Skul. (Lukluk pej 77, 92, 165, 243, 246, mo 250.) Yu mas meksua se yu karem buk blong yu i kam wetem yu evri wik. Yu save openem buk blong yu mo folem ol save long faswan tok. Holem buk blong yu i stap open blong ol narafala haf blong skul ya tu. Makemgud ol advaes we brata blong lukaot long skul i givim. Lesingud long ol fasin blong tij, ol kwestin, eksampol, ol wod, ol pijatok, ol pija, mo ol samting we studen i skelem wetem narafala samting. Sipos yu raetem ol gudfala not, bambae yu save tingtingbak long ol gudfala poen ya we yu lanem long skul mo yu save yusum olgeta.
16 Jisas Kraes i save se i no gat wan blesing we i bigwan moa i bitim wok blong talemaot gud nius blong Kingdom. Hemia nao bigfala wok blong hem. (Mak 1:38) Hem i talem se: “Mi mas go long ol narafala vilej tu, mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem.” (Luk 4:43) Yumi bin agri blong folem hem, taswe yumi tu yumi mas bisi long wok ya blong talemaot gud nius, mo yumi mas traehad oltaem blong kamgud moa long ‘sakrefaes we yumi mekem blong presem God.’ (Hib. 13:15, NW ) Blong mekem olsem, yumi mas gat strong tingting blong joen oltaem long Tiokratik Skul, we i mekem yumi rere from wan wok we i moa impoten i winim ol narafala wok long laef.