Holem Promes We Yumi Mekem Blong Givim Laef i Go Long God
1 Nating se yu jes baptaes, no maet yu baptaes longtaem finis, be ating yu rimemba bigfala taem ya long laef blong yu. Baptaes i no en blong wan resis. Nogat. Hem i stat blong wan longfala laef blong mekem wok blong God, mo yumi gat janis blong mekem olsem gogo i no save finis. (1 Jon 2:17) ?Wanem samting i joen wetem disisen ya blong givim laef i go long God?
2 Folem Eksampol Blong Kraes: Afta we Jisas i baptaes, hem i “statem ol wok blong hem” blong “talemaot gud nius” blong kingdom blong God. (Luk 3:23; 4:43) Long sem fasin, taem yumi tekem baptaes blong soemaot se yumi givim laef blong yumi i go long Jeova, yumi kam ol man blong talemaot gud nius. I tru se maet yumi stap yusum bighaf blong taem mo paoa blong yumi blong kasem ol samting we yumi nidim blong laef. Be, namba wan wok, no wok we i impoten moa long tingting blong yumi, hemia wok blong prij. (Mat. 6:33) Taswe, yumi no ronem mane no haenem. Be yumi blong God, mo yumi wantem ‘tinghae long minista wok blong yumi,’ olsem aposol Pol. (Rom 11:13, NW ) ?Yu yu tinghae long nambawan blesing we yu yu gat blong mekem wok blong Jeova? ?Yu yu tekem evri janis blong mekem wok ya?
3 Olsem Jisas i mekem, yumi tu yumi mas “blokem Setan.” (Jem. 4:7) Jes afta we Jisas i tekem baptaes, Setan i traem hem. Long sem fasin, hem i traehad tede blong spolem olgeta we oli givim laef blong olgeta blong mekem wok blong Jeova. (Luk 4:1-13) From we yumi laef long wol blong Setan, yumi mas stretem yumi wan oltaem. Yumi mas blokem eni samting we i save spolem tingting blong yumi no mekem hat blong yumi i kam nogud. (Prov 4:23; Mat. 5:29, 30) Ol Kristin oli mas tingbaot advaes ya se oli ‘no save sidaon blong kakae long tebol blong Masta, mo bakegen long tebol blong ol devel.’ (1 Kor. 10:21) Hemia i min se yumi mas blokem ol pleplei we oli save spolem gudfala fasin blong yumi, blokem ol rabis fren mo ol denja we oli stap long Internet. I minim tu se yumi mas sakemaot enikaen buk no narafala samting we i kamaot long ol man blong apostasi. Sipos yumi kwik blong luksave ol trap ya no ol narafala trik blong Setan, bambae yumi save holem promes we yumi mekem blong givim laef blong yumi i go long Jeova.
4 Yusum Ol Samting We God i Givim: Jeova i givim fulap samting blong halpem yumi blong laef folem promes we yumi bin mekem. Hem i givim Tok blong hem, Baebol, mo Kristin kongregesen. I gud blong gat fasin ya blong ridim Baebol mo prea long Jeova evri dei. (Jos. 1:8; 1 Tes. 5:17) Yumi mas glad blong go long ol miting blong kongregesen. (Sam 122:1) Yumi mas kampani wetem olgeta we oli fraetgud long Jeova mo we oli folem ol loa blong hem.—Sam 119:63.
5 Jeova i save halpem yu blong holem promes we yu mekem taem yu givim laef blong yu i go long Hem. Mo bambae yu kasem bigfala glad taem yu gohed blong mekem wok blong hem olwe.—Sam 22:26, 27; Fil. 4:13.