Intenasnal Wok Blong Bildim Ol Haos Kingdom Long Sam Kantri Blong Yurop
1 Long ol yia we oli pas, plante kantri blong Yurop, speseli Is Yurop, oli bin putum tabu long wok blong ol Witnes blong Jeova. Plante taem, tabu ya we oli putum long ol Witnes hem i rili strong. Ol brata oli no save holem miting long open ples, mo i no gat rod blong oli save gat wan Haos Kingdom. Be long ol yia we oli jes pas, Jeova “i mekem ol bigbigfala wok blong givhan long yumi. !Long taem ya, yumi glad we yumi glad!”—Sam 126:3.
2 Stat long 1983, strong fasin we gavman i mekem long ol Witnes blong Jeova i stat blong godaon. Long 1989, Polan mo Hangari tufala i rejistarem ol Witnes blong Jeova finis, olsem wan skul we gavman i luksave. Long 1991, Rasia i rejistarem ol Witnes blong Jeova. Stat long taem ya, wok i gru bigwan long Rasia mo long ol narafala kantri we bifo oli pat blong Soviet Yunion. Bitwin long manis Maj 1996 mo Oktoba 1998, Hed Kampani i agri blong givim lon long ol branj ofis we oli lukaot long 11 kantri blong Yurop blong olgeta ya oli save bildim 359 Haos Kingdom.
3 Taem yu lukluk ol pija we oli stap long pepa ya, tingbaot se Jeova i rili stap mekem sam bigbigfala mo nambawan samting blong ol man blong hem. (Sam 136:4) Yumi mas glad blong luk se presen mane we ol brata raon long wol oli givim, i stap go long ol gudfala wok ya. Hemia i laenap gud wetem wanem we Jisas i talem long Jon 13:35 se: “From we yufala i stap lavlavem yufala, bambae olgeta man oli luksave se yufala i man blong mi.”
4 Plan ya we i blong givhan long ol kantri we oli no gat naf mane blong bildim ol Haos Kingdom, i givhan long kantri ya Romania long Yurop. Stat long Julae 2000 kasem naoia, oli bildim 36 Haos Kingdom long kantri ya. Long Yukren tu, oli bildim 61 Haos Kingdom long yia 2001 mo long yia 2002 oli bildim 76 narawan bakegen, evriwan oli folem sem plan no stael nomo we i mekem se i isi mo i kwik moa blong bildim. Mane we ol brata sista oli sakem long bokis ya Presen Mane blong ol Haos Kingdom, i givhan finis blong bildim plante handred Haos Kingdom long Bulgaria, Kroasia, Masedonia, Moldova, Rasia, mo Sebia mo Montenegro.
5 Long sam kantri, wok blong bildim ol Haos Kingdom, i no isi. Ol brata oli mas traehad plante blong toktok mo rerem ol pepa we i nidim, bifo we oli save statem wok blong bildim wan Haos Kingdom. Hemia i tekem tumas taem. Mo tu, praes blong bildim wan Haos Kingdom long ol ples ya long Yurop i sas moa i bitim ol ples olsem Afrika mo Saot Amerika. Be, from we namba blong ol man we oli stap joen long wosip blong Jeova i stap kam antap bigwan long ol kantri ya blong Yurop we oli pua, i nidim plante handred Haos Kingdom yet.
6 !Yumi glad tumas blong luk we wok blong bildim ol Haos Kingdom i stap gru! Plante stori oli soemaot se wok ya i bin givim gudfala witnes long ol ples we ol niufala Haos Kingdom oli stanap. Long sam ples, ol bigman blong taon oli sapraes blong luk we ol brata oli glad nomo blong folem ol rul we munisipaliti i putumap long saed blong bildim ol haos.
7 Aesea i talem tru nomo taem hem i talemaot se trufala wosip bambae i kam antap long taem blong yumi. God i yusum profet ya blong talemaot se: “Long stret taem blong hem, bambae mi [Jeova] mi mekem samting ya i kamtru kwiktaem nomo.” (Aes. 60:22) Yes, ol ten yia we oli jes pas, oli rili wan taem we Jeova i mekem wok blong hem i spid long Is Yurop. Bambae Jeova i blesem traehad blong yumi blong mekem wok ya blong bildim plante Haos Kingdom i hareap moa, taem yumi gohed blong givim wanem we yumi naf blong givim long Presen Mane blong ol Haos Kingdom. Mane ya i save givhan blong mekem trufala wosip i gru moa long plante ples long Yurop, mo blong givim bigfala witnes moa long “olgeta man long wol ya.”—Wok 13:47.
[Tok blong pija long pej 3]
Plante Haos Kingdom oli stap long wan haos ya nomo, hemia long Moscow, Rasia
[Tok blong pija long pej 4-6]
Ol Niufala Haos Kingdom Long Is Yurop
Strumica, Masedonia
Daruvar, Kroasia
Sokal, Lviv, Yukren
Bitola, Masedonia
Mladost, Bulgaria
Plovdiv, Bulgaria
Krasnooktyabrskiy, Maykop, Rasia
Bački Petrovac, Sebia mo Montenegro
Tlumach, long Distrik blong Ivano-Frankivsk, Yukren
Rava-Ruska, long Distrik blong Lviv, Yukren
Stara Pazova, Sebia mo Montenegro
Zenica, Bosnia mo Hesegovina
Sokal long Distrik blong Lviv, Yukren
Zhydachiv long Distrik blong Lviv, Yukren