Ol Man Oli Mas Save Nem Blong God
1. ?Save long nem blong God i save mekem wanem long ol man?
1 ?Yu yu mekem wanem long faswan taem we yu harem nem blong God? Ating plante man oli harem olsem woman ya we i talem se: “Long faswan taem we mi luk nem blong God long Baebol, mi mi krae. Mi harem gud tumas blong save nem blong God stret mo blong yusum nem ya tu.” Long tingting blong woman ya, save long nem blong God i wan impoten samting we i givhan long hem blong save Jeova olsem wan trufala man mo blong stat fren gud wetem hem.
2. ?From wanem i impoten we yumi hareap blong tijim ol narafala long saed blong Jeova?
2 ?From Wanem Yumi Mas Talemaot Nem Ya? Nem blong God i joen wetem ol fasin blong hem, stamba tingting blong hem, mo ol wok blong hem. Mo nem ya i joen tu wetem fasin blong God blong sevem man. Aposol Pol i raetem se: “Olgeta man we oli singaot long mi long nem blong mi, mi bambae mi sevem olgeta.” Be Pol i mekem yumi tingting se, “?Bambae oli save singaot long God olsem wanem” sipos oli no kasem save fastaem se Jeova hem i hu mo sipos oli no bilif long hem? Taswe i impoten we naoia ol Kristin oli mekem ol man oli save long nem blong God mo ol samting we i joen wetem mining blong nem ya. (Rom 10:13, 14) Be i gat wan risen we i bigwan moa from wanem yumi mas talemaot nem ya long ol man.
3. ?Wanem faswan bigfala risen from wanem yumi prij?
3 Long ol yia 1920, ol man blong God oli stadi Baebol nao oli luksave se i gat wan toktok we i mas kamaot klia long heven mo wol. Toktok ya hemia se hae rul blong God nomo i stret mo nem blong hem i tabu. Bifo we Jeova i spolem ol rabis man blong karemaot doti we oli sakem long nem blong hem, hem i wantem se “olgeta man long wol” oli mas harem trutok long saed blong hem. (Aes. 12:4, 5; Esik. 38:23) Taswe faswan bigfala risen from wanem yumi prij, hemia blong presem Jeova long fes blong olgeta man mo blong leftemap nem blong hem long fored blong olgeta. (Hib. 13:15) Lav we yumi gat long God mo long ol man raonabaot long yumi, bambae i pusum yumi blong joen fulwan long wok ya we God nomo i putum long han blong yumi.
4. ?Wanem i mekem se naoia, taem ol man oli harem nem blong God, oli tingbaot ol Witnes blong Jeova?
4 “Oli Holem Nem Blong Hem”: Long 1931 yumi karem nem ya ol Witnes blong Jeova. (Aes. 43:10) Stat long taem ya, ol man blong God oli talemaot nem ya long evri ples. Oli wok strong blong mekem olsem, taswe buk ya Proclaimers long pej 124 i talem se: “Long fulwol naoia, sipos wan man i yusum nem ya Jeova long toktok blong hem, kwiktaem nomo ol narafala man bambae oli talem se hem i wan Witnes blong Jeova.” ?Ol man oli luksave yu tu from samting ya? Fasin tangkiu we yumi gat long Jeova from we hem i gud tumas, i mas pusum yumi blong wantem “talemaot hae nem” blong hem long evri janis we yumi gat.—Sam 20:7; 145:1, 2, 7.
5. ?From wanem fasin blong yumi i impoten taem yumi holem nem blong God?
5 From we yumi ol man blong “holem nem blong hem,” yumi mas folem gud ol hae rul blong hem. (Wok 15:14; 2 Tim. 2:19) Plante taem, samting we ol man oli luksave fastaem hemia gudfala fasin blong ol Witnes blong Jeova. (1 Pita 2:12) Neva yumi wantem we ol man oli tok nogud long nem blong God from we yumi slak blong folem ol rul blong Baebol no from we yumi putum wosip blong hem long seken ples long laef blong yumi. (Lev. 22:31, 32; Mal. 1:6-8, 12-14) I moagud sipos fasin blong laef blong yumi i soem se yumi tinghae long janis ya we yumi gat blong holem nem blong God.
6. ?Wanem blesing we yumi gat naoia mo blong olwe?
6 Tede yumi luk se tok blong Jeova i stap kamtru we i se: “Bambae ol man long olgeta nesen oli presem nem blong mi, i stat long is, i go kasem long wes.” (Mal. 1:11, NW ) I gud yumi gohed blong talemaot trutok long saed blong Jeova. Yes ‘nem blong hem i tabu mo i gud yumi presem hem oltaem, gogo i no save finis.’—Sam 145:21.