Wok We i Mekem Yumi Haremgud
1 Tok blong Baebol i mekem man i harem gud sipos hem i lesin gud long tok ya mo i folem long laef blong hem. (Sam 19:7, 8) Tok ya i givhan long ol man blong oli kam fri long ol giaman tijing mo rabis fasin, mo i mekem se oli gat wan gudfala tingting long saed blong fiuja. Be, i no ol man we oli harem gud nius nomo we oli kasem wan gudfala samting from. Olgeta we oli serem ol trutok ya blong Baebol wetem ol narafala, olgeta tu oli harem gud.—Prov. 11:25.
2 Wok Blong Prij i Givim Paoa: Jisas i talem se olgeta we oli rere blong karem yok blong hem mo kam ol Kristin disaepol, oli mas mekem wok ya blong prij mo halpem ol narafala blong olgeta tu oli kam disaepol. Taem oli mekem olsem, ‘bambae oli faenem pis long laef blong olgeta.’ (Mat. 11:29) Jisas tu i kasem paoa from wok blong prij. Wok ya i olsem kakae blong hem. (Jon 4:34) Ol 70 disaepol we hem i sanemaot olgeta blong oli prij, oli harem gud tumas taem oli luk we Jeova i givhan long olgeta.—Luk 10:17.
3 Tede tu, plante Kristin oli faenem se wok blong prij i givim paoa long olgeta. Wan sista i talem se: “Wok blong prij i mekem mi mi harem gud from we i mekem se mi yusum laef blong mi long wan gudfala samting mo i no blong nating nomo. Taem mi stap prij, ol trabol we mi mi gat mo ol wari blong evri dei laef oli no moa bigwan.” Wan narafala sista we i prij plante i talem se: “Wok blong prij . . . i mekem mi mi luksave evri dei se Jeova i rili stap, mo i givim pis mo glad we mi no save kasem long wan narafala wok.” !Yes, i wan bigfala ona blong “joen wetem God blong mekem wok blong hem”!—1 Kor. 3:9.
4 Yok Blong Kraes i No Hevi: Jisas i talem long ol Kristin se ‘oli mas traehad’ wetem ful paoa blong olgeta. Be hem i no askem yumi blong mekem samting we yumi no naf blong mekem. (Luk 13:24) Yes, wetem lav, hem i singaot yumi blong ‘joen wetem hem blong karem yok blong hem.’ (Mat. 11:29, futnot NW ) Olgeta we oli gat sam trabol long laef blong olgeta, oli save sua se God i glad long wok we oli mekem wetem olgeta paoa blong olgeta, nating se oli no save mekem plante.—Mak 14:6-8; Kol. 3:23.
5 !Yumi harem gud tumas blong mekem wok blong wan God we i tinghae long wanem wok we yumi naf blong mekem blong leftemap nem blong hem! (Hib. 6:10) I gud we oltaem yumi traehad blong mekem bes blong yumi.