Folem Fasin Blong Jeova Blong Mekem i Gud Long Ol Man
1 ?Taem san i stap godaon mo yu luk ol naesfala kala long skae, no taem yu harem gud long wan gudfala kakae, yu yu harem se yu wantem talem tangkiu long Jeova, we i Stamba blong fasin ya blong mekem i gud long ol man? Gudfala fasin ya blong hem i save pulum yumi blong wantem mekem i gud long ol narafala. (Sam 119:66, 68; Efes. 5:1) ?Olsem wanem yumi save soemaot fasin ya blong mekem i gud long ol narafala?
2 Long Ol Man We Oli No Gat Bilif: Wan rod blong folem gudfala fasin blong Jeova i blong soem intres long olgeta we oli no Kristin brata no sista blong yumi. (Gal. 6:10) Ol smosmol wok blong mekem i gud long olgeta, i save mekem se oli tingting gud long ol Witnes blong Jeova mo gud nius we yumi talemaot long olgeta.
3 Wan dei, wan yangfala paenia brata i go long klinik, ale hem i sidaon klosap long wan olfala woman we i sik bigwan. Taem we oli singaot brata ya blong i go luk dokta, hem i letem olfala woman ya i go long ples blong hem. Samtaem biaen, hem i mitim woman ya bakegen long maket, mo woman ya i glad tumas blong luk hem. Bifo, woman ya i no stap lesin long gud nius, be naoia hem i luksave se ol Witnes blong Jeova oli rili lavem ol man raonabaot long olgeta. Ale, oli statem wan Baebol stadi wetem hem.
4 Long Ol Kristin Brata Blong Yumi: Yumi folem gudfala fasin blong Jeova taem yumi mekem sam samting blong givhan long ol Kristin brata sista blong yumi. Taem i gat wan disasta, yumi nao yumi ol faswan blong givhan long ol brata blong yumi. Mo tu, yumi soem fasin ya taem yumi karem samfala oli go long miting long trak blong yumi, taem yumi go luk olgeta we oli sik, mo taem yumi traehad blong laekem moa olgeta long kongregesen we yumi no save gud olgeta.—2 Kor. 6:11-13; Hib. 13:16.
5 Wan narafala rod blong Jeova blong mekem i gud long ol man, hemia taem hem i “stap fogivim” olgeta. (Sam 86:5) Yumi save folem fasin ya blong hem tu mo fogivim narafala. Long rod ya, yumi soem se yumi laekem tumas blong mekem i gud long ol narafala. (Efes. 4:32) Mo fasin ya blong fogif i mekem se yumi harem “i gud tumas” blong joen wetem ol Kristin brata sista blong yumi.—Sam 133:1-3.
6 I gud sipos fasin blong Jeova blong mekem i gud tumas long ol man i pulum yumi blong presem hem oltaem mo blong kam fulap long glad. Mo i gud tu sipos fasin blong hem i pulum yumi blong traehad blong mekem i gud long ol narafala oltaem.—Sam 145:7; Jer. 31:12.