Mekem Haos Wosip Blong Yumi i Stap Gud Mo Naes

1. ?Haos Kingdom i blong wanem?

¹ Long fulwol, i gat bitim 94,000 kongregesen blong ol Witnes blong Jeova. Plante kongregesen oli gat wan Haos Kingdom, hemia stamba ples blong mekem trufala wosip long eria blong olgeta. Long ples ya, oli save joen wetem ol narafala Kristin blong stadi Baebol.

2. ?From wanem i impoten blong meksua se Haos Kingdom i klin mo i naes?

² Program Blong Klinim Haos Kingdom: Olgeta wok we yumi mekem blong Haos Kingdom i stap gud mo klin, i haf blong ol tabu wok we yumi mekem i go long Jeova. Buk ya Minista Wok Blong Yumi, pej 59 mo 60, i talem se: “Taem ol brata oli givim presen mane long Haos Kingdom blong olgeta, no oli mekem wok blong klinim no fiksimap Haos Kingdom, oli mas tinghae long wok ya blong olgeta mo oli harem gud from. Haos Kingdom hem i mas stret long afsaed mo long insaed blong hem, blong leftemap ogenaesesen blong Jeova.” From we yumi yusum Haos Kingdom plante taem evri wik, i nidim we yumi klinim mo fiksimap oltaem. Klosap oltaem, olgeta long kongregesen ya we i yusum Haos Kingdom, oli glad blong mekem wok ya. Olsem long taem blong Baebol, tede tu yumi no mas slak blong ‘wokem gud bakegen’ haos wosip blong yumi.​—⁠2 Kron. 34⁠:10.

3. ?Wanem plan i stap blong klinim Haos Kingdom, mo hu i save joen long wok ya we i wan blesing?

³ I mas gat wan program blong klinim Haos Kingdom evri wik we i stap long notis bod. Sam kongregesen oli mekem wan program blong evri manis. Wanwan buk stadi i mas gat wik blong hem blong klinim Haos Kingdom. Oli save folem wan lis blong ol wok we oli mas mekem. I nidim we olgeta evriwan we oli naf oli joen long blesing ya blong klinim Haos Kingdom evri wik mo mekem i naes. Ol pikinini tu oli save joen long wok ya wetem papa mama blong olgeta, olsem nao, papa mama i save tijim olgeta blong tinghae long wok ya. Olgeta evriwan long kongregesen oli mas wokgud tugeta blong mekem impoten wok ya we i joen wetem wosip blong yumi, olsem nao bambae wok ya i no stap long han blong samfala nomo. Samting ya i tru moa taem i gat moa long wan kongregesen we i yusum Haos Kingdom ya.

4. ?Wanem samting i mas stap, blong kongregesen i save olsem wanem blong klinim Haos Kingdom?

⁴ I gud we wan lis blong ol wok we yumi mas mekem i stap long rum blong kipim ol samting blong klinim Haos Kingdom. Lis ya i save eksplenem wok we yumi mas mekem evri wik, olsem brum, wasem ol windo, waepem ol kabod, sakem ol doti, pasem mop, mo klinim ol tolet. Maet i gat sam wok we yumi nidim blong mekem sam samtaem nomo, olsem putum oel long ol wud, waepem ol jea wetem ol laet mo fan. Olgeta meresin we yumi yusum blong klinim Haos Kingdom, yumi mas putum long wan ples we ol pikinini oli no save tajem. Yumi mas makem klia ol botel tu blong soem wanem samting i stap insaed long olgeta. I gud tu blong raetem smol tok blong soem stret rod blong yusum ol meresin ya.

5. ?I impoten blong meksua se Haos Kingdom i sef, mo yumi mas jekem wanem oltaem? (Lukluk bokis long pej 4.)

⁵ I impoten tumas se i no gat sam samting long Haos Kingdom we oli mekem denja long laef blong man. (Dut. 22⁠:8) Long saed ya, bokis we i stap long pej 4 i tokbaot ol samting we yumi mas jekem oltaem blong mekem se i no gat akseden.

6. ?Hu ya i mekem plan blong fiksimap Haos Kingdom?

⁶ Klinim Mo Fiksimap Ol Samting: Ol elda nao oli mas meksua se kongregesen i fiksimap ol samting long Haos Kingdom. Klosap oltaem, oli jusum wan elda no wan man blong givhan blong lukaot long wok ya. Hem i mekem plan blong ol samting we kongregesen i mas mekem oltaem blong klinim Haos Kingdom, fiksimap ol samting, mo blong gat ol samting we oli nidim blong klinim Haos Kingdom. I impoten se i no gat samting we i denja insaed long Haos Kingdom no long yad blong hem. Taem i gat moa long wan kongregesen we i yusum Haos Kingdom, ol elda oli putumap wan komiti blong lukaot long ol wok blong mekem Haos Kingdom mo yad blong hem i stap klin mo gud. Komiti ya i wok folem advaes blong ol elda.

7. (a) ?Evri yia yumi mas mekem wanem blong Haos Kingdom i stap gud mo naes? (b) ?Sam samtaem, yumi mas mekem wanem wok? (Lukluk bokis long pej 5.)

⁷ Wan taem evri yia oli mas jekemgud Haos Kingdom. Nao ol elda oli mekem plan blong wokem bakegen eni samting we i kam nogud. Oli save askem long ol pablisa blong oli givhan blong wokem gud mo fiksimap ol samting. Evriwan oli mas makem ol smosmol samting tu we oli nidim blong mekem mo oli mas kwik blong wokem ol samting ya.

8. ?Wetaem ol elda oli save toktok i go long Sosaeti long saed blong ol samting we oli mas fiksimap?

⁸ Sipos ol elda oli harem se oli nidim advaes no help blong mekem sam wok long Haos Kingdom, oli save sanem toktok i go long Sosaeti. Maet hemia long saed blong floa, fiksimap ol wol we oli brobrok lelebet, no blokem ruf we i lik.

9. ?Sipos i nidim blong pem wan man blong mekem sam wok, oli mas mekem wanem fastaem?

⁹ Yusum Gud Mane Blong Kongregesen: Bighaf blong wok long Haos Kingdom mo long yad blong hem, ol man long kongregesen nomo oli mekem. Ol hadwok blong olgeta i soemaot bigfala lav we oli gat, mo i givhan bigwan blong mekem se kongregesen i no pem bigfala mane blong narafala i mekem wok ya. Sipos i nidim blong singaot wan man long wol blong i kam mekem wan wok, olsem sprei from ol bebet, ol elda bambae oli jekem praes blong ol kampani we oli mekem wok ya blong luk se hu nao i mekem long praes we i smol moa. Fastaem, oli raetem wan pepa blong soemaot klia ol wok we oli wantem se kampani ya i mekem, no wan lis blong ol samting we olgeta nomo oli nidim blong mekem wan wok. Nao oli givim wan kopi blong lis ya long plante defdefren kampani. Olsem nao, ol kampani we oli talem wan praes oli save finis wanem wok stret i stap insaed long praes ya. Taem ol elda oli kasem praes blong ol defdefren kampani, oli jusumaot hemia we i beswan. Oli mas skelemgud, nating se i wan brata we i talem se bambae hem i mekem wok ya blong wan praes.

10. ?Olsem wanem blong meksua se kongregesen i yusum gud mane blong hem?

¹⁰ Mo tu, ol elda oli mas traem luk sipos munisipol i save katem praes blong takis blong graon blong Haos Kingdom. Taem i gat moa long wan kongregesen we i yusum Haos Kingdom, komiti bambae i mekem wan spesel kaon long bang. Mo bambae oli soemaot ripot blong kaon ya evri manis long ol elda blong olgeta kongregesen we oli yusum Haos Kingdom. Olsem nao, ol elda oli save olsem wanem oli stap yusum mane ya. Hem i wok blong ol elda blong meksua se oli yusumgud mane blong kongregesen.

11. ?Sipos i nidim blong mekem wan bigfala wok blong wokem gud Haos Kingdom bakegen, oli mas mekem wanem?

¹¹ Ol Bigfala Wok Blong Mekem Haos i Gud Bakegen: Taem komiti i ting se oli mas mekem wan bigfala wok blong wokem gud Haos Kingdom bakegen, oli toktok wetem ol elda. Sipos oli agri se i nidim bigfala wok blong mekem gud Haos Kingdom bakegen, no sipos kongregesen i nidim help blong ol man blong ol narafala kongregesen we oli no stap yusum Haos Kingdom ya, bambae oli sanem toktok i go long Sosaeti. Ol brata long ples ya we oli nafgud mo oli gat save long saed ya, bambae oli givim advaes mo lidim wok ya. Sipos i nidim bigfala mane blong mekem wok ya, oli mas faenemaot stret praes blong ol samting mo raetem wan plan blong ridimaot long kongregesen, nao olgeta long kongregesen oli save soem se oli agri.

12. ?Olsem wanem yumi save soem se yumi gat tangkiu from blesing blong go long miting oltaem long Haos Kingdom?

¹² !Yumi tinghae tumas long blesing we yumi gat blong joen wanples long Haos Kingdom! Yumi neva mas kam slak blong go long ol miting no ting nating long olgeta. Taem yumi evriwan i joen blong lukaotgud long Haos Kingdom, yumi givhan blong mekem Haos ya i stap olsem wan ples we i stret blong go long hem blong kasem ol tok we i leftemap tingting blong yumi. Wok ya i stap leftemap klin wosip tu mo i givim ona long nem blong Jeova. I gud we yumi gat strong tingting blong mekem haos wosip blong yumi i stap gud mo naes.

[Bokis blong pija long pej 4]

Lis Blong Jekem Sipos Haos Kingdom i Sef

◻ Wota blong kilim faea i mas stap klosap.

◻ Oli mas jekem ol jea oltaem blong luk se oli no brobrok.

◻ Jekem ol doa mo lada blong meksua se i no gat samting i blokem olgeta, blong i gat laet long olgeta, mo blong ol rel oli strong.

◻ Jekem ol rum blong putum ol samting blong klinim mo wokem Haos Kingdom long hem, blong luk sipos oli klin, sipos ol samting i stap long stret ples blong hem, mo sipos i no gat doti olbaot no ol samting we i save statem wan faea.

◻ Jekem ruf mo tekemaot ol doti long ol aean raon long ruf we wota ren i ron long hem.

◻ Meksua se ol simen we ol man oli wokbaot long hem mo ples blong paking i gat naf laet mo i no gat samting we man i save glis long hem.

◻ Jekem ol rop blong lektrik mo ol fan.

◻ Fiksimap kwiktaem ol ples we oli lik, blong wota i no spolem haos.

◻ Oli mas lokem Haos Kingdom taem i no gat man long hem.

[Bokis blong pija long pej 5]

Lukaot Gud Long Haos Kingdom Mo Yad Blong Hem

◻ Afsaed: ?I nidim blong fiksimap ruf, ol wol, pen, ol windo, mo saen blong Haos Kingdom?

◻ Yad: ?Yad i klin mo i naes? ?Ol simen blong wokbaot long hem, ol fenis mo ples blong paking oli gud yet?

◻ Insaed: ?Floa, kaliko blong windo, ol jea, ol laet, ol tap, pen long wol, mo ol kabod blong ol buk, oli naes yet?

◻ Ol Samting: ?Ol laet, ol maekrofon, ol fan, mo ol windo, oli wok gud?

◻ Ol Tolet: ?Oli klin mo oli wok gud?

◻ Ol pepa blong kongregesen: ?Ol pepa we loa i talem se kongregesen i mas holem, oli gat ol stret save long olgeta no oli blong bifo finis?